21 جولائی 2019
تازہ ترین
 تمام قوتیں دہشتگردی کے متاثرین کو قومی دھارے میں لائیں، بلاول

تمام قوتیں دہشتگردی کے متاثرین کو قومی دھارے میں لائیں، بلاول

 پاکستان پیپلز پارٹی کے چیئرمین بلاول بھٹو زرداری نے کہا ہے کہ وہ ملک کی تمام قوتوں کو یہ پیغام دیتے ہیں کہ قومی دھارے میں لانا ہے تو دہشت گردی کے متاثرین کو لائیں کالعدم تنظیموں کو نہیں۔ پیپلز پارٹی کے چیئرمین بلاول بھٹو زرداری ہزار گنجی خودکش حملے میں جاں بحق ہزارہ برداری کے لواحقین سے اظہار افسوس کیلئے کوئٹہ پہنچے جہاں انہوں نے ہزارہ برادری سے اظہار افسوس کیا۔ اس موقع پر میڈیا سے گفتگو کرتے ہوئے بلاول بھٹو زرداری نے کہا کہ افسوس ہے کہ اتنا خون بہہ جانے کے باوجود ریاست فیصلہ نہیں کرسکی کہ وہ دہشتگردوں کے ساتھ ہے یا شہدا کےساتھ، حکومت کو فیصلہ کرنا ہوگا، کب تک دوغلی پالیسی جاری رہےگی۔ انہوں نے کہا کہ کوئی انتہاپسندی کےخلاف اکیلا نہیں لڑسکتا مگر ہمیں اپنے مستقبل کے لئے فیصلہ کرنا پڑے گا،  ہمیں اس انتہا پسند ذہنیت کےخلاف لڑنا ہے، ہم جب انصاف مانگتے ہیں تو ملک دشمن قرار دیا جاتا ہے، کالعدم تنظیموں کے خلاف بات کرتا ہوں تو ملک دشمن کہا جاتا ہے، ہم ملک دشمن ہیں یا وہ کالعدم تنظیمیں جو ہمارے بچوں کو قتل کر رہی ہیں؟ انہوں نے کہا کہ ملک کی تمام قوتوں کو پیغام دیتا ہوں کہ قومی دھارے میں لانا ہے تو دہشت گردی کے متاثرین کو لائیں کالعدم تنظیموں کو نہیں۔ انہوں نے مزید کہا کہ میں بھی شہید کا بیٹا ہوں ملک کو انتہاپسندوں سے پاک کرنے تک چین سے نہیں بیٹھوں گا،  پوری سیاسی زندگی اس کام کے لئے ہوگی کہ اپنے ملک کو انتہا پسندوں سے پاک کروں تاکہ ہم امن کے ساتھ اس ملک میں زندگی گزار سکیں۔ انہوں نے کہا کہ ہمیں مل کر دہشتگردوں کا مقابلہ کرنا ہوگا اور مظلوم عوام کو تحفظ دینا پڑے گا۔


مزید خبریں

عوامی سروے

سوال: کیا پی ٹی آئی انتخابات سے قبل کیے گئے وعدے پورے کر پائے گی؟