27 مئی 2018
تازہ ترین
کھیل
 پاکستانی نژاد برطانوی باکسر عامر خان ایک مرتبہ پھر جنسی سکینڈل کی زد میں آگئے اور اس بار صوفیہ ہمانی نامی خاتون نے باکسر سے تعلق کا دعویٰ کیا ہے۔ برطانوی اخبار کی رپورٹ کے مطابق 22 سالہ صوفیہ ہمانی نے دعویٰ کیا کہ باکسر عامر خان کی دوسری بیٹی کی پیدائش کے 17 روز بعد ہماری ملاقات ہوئی اور یہ ملاقات ایک کلب میں ہوئی جس میں عامر خان انہیں ایسٹ لندن کے ایک ہوٹل میں لے گئے تھے۔ عامر خان سے ملاقات کے وقت علم نہیں تھا کہ ان کی شادی برقرار ہے اور وہ دوسری بچی کے باپ بنے ہیں۔ ہوٹل سے گھر واپسی کے لیے باکسر نے انہیں 20 پائونڈز دیئے جب کہ کرایہ 50 پائونڈ بننا تھا اور اگلے روز عامر خان نے فون کرکے پوچھا کہ میں خیریت سے گھر پہنچ گئی تھی۔ صوفیہ نے کہا کہ میں نے باکسر کو بتایا کہ مجھے ان کی بیوی کا علم ہوگیا ہے جس پر عامر نے کہا کہ موبائل پر پیغامات نہ بھیجو۔ صوفیہ ہمانی کے مطابق میری بعد میں باکسر عامر خان کی اہلیہ فریال مخدوم سے بہنوں جیسی بات چیت ہوئی، مجھے لگتا ہے کہ فریال اپنے شوہر پر بالکل اعتماد نہیں کرسکتی، انہیں چاہیے کہ ایسے شخص کو چھوڑ دیں۔ 

کرکٹ کے میدان میں تہلکہ مچانے والی عرب ٹی وی کی وکٹ فکسنگ سے متعلق رپورٹ میں پاکستانی کرکٹر حسن رضا کا نام بھی سامنے آگیا۔ عرب ٹی وی الجزیرہ کے رپورٹر نے سپاٹ فکسنگ سے متعلق سٹنگ آپریشن کیا جس میں بھارت سے تعلق رکھنے والے مبینہ فکسر، رپورٹر اور پاکستانی ٹیسٹ کرکٹر حسن رضا کو دیکھا جاسکتا ہے۔ حسن رضا کو مبینہ فکسر سابق بھارتی فرسٹ کلاس کرکٹر رابن مورس کے ساتھ فلمبند کیا گیا ، تاہم پاکستانی ٹیسٹ کرکٹر اس گفتگو میں براہ راست شریک نہیں رہے البتہ فکسرز نے مجوزہ پلان کے دوران مثال کے طور حسن کا نام لیا۔  مبینہ فکسر رابن مورس نے سٹنگ آپریشن کرنے والے رپورٹر کو میچ فکسنگ کی یقین دہانی بھی کرائی۔ اس حوالے سے جاری ہونے والی ویڈیو سے متعلق باضابطہ رابطے پر حسن رضا نے کوئی جواب نہیں دیا۔  دوسری جانب انٹرنیشنل کرکٹ کونسل نے رپورٹ کے مکمل منظر عام پر آنے کے بعد معاملے کی تحقیقات کا اعلان کر رکھا ہے۔  منظر عام پر آنے والی اس ویڈیو میں گرائونڈ سٹاف کو سری لنکا اور انگلینڈ کے درمیان نومبر میں کھیلے جانے والے ٹیسٹ کے لئے وکٹ فکسنگ کی یقین دہانی کراتے دکھایا گیا تھا۔
image

فٹ بال کلب ریال میڈرڈ نے یوئیفا چیمپیئنز لیگ کے فائنل میں لیور پول کو شکست 1-3 سے شکست دے کر مسلسل تیسری بار ٹائٹل اپنے نام کرلیا۔ یوکرین کے شہر کیو کے نیشنل سپورٹس کمپلیکس میں کھیلے گئے چیمپئنز لیگ کے فائنل میں ریال میڈرڈ نے مجموعی طور پر 13ویں مرتبہ ٹائٹل اپنے نام کرنے میں کامیاب رہی ، جبکہ مخالف ٹیم لیور پول نے آخری مرتبہ 2005 میں ٹرافی جیتنے میں کامیاب رہی تھی۔ ریال میڈرڈ کی جانب سے گیراتھ بیل نے 2 گول کئے جبکہ لیور پول کو میچ کے دوران اس وقت دھچکا لگا جب پہلے ہاف میں ہی سٹار فٹبالر محمد صلاح زخمی ہونے کے بعد میدان بدر ہوئے۔ محمد صلاح کے زخمی ہونے پر لیور پول کے حامی تماشائی جذباتی ہوگئے اور کئی آبدیدہ بھی دکھائی دیئے۔ کھیل کے پہلے ہاف میں کوئی ٹیم گول نہ کر سکی لیکن دوسرے ہاف کے 50ویں منٹ میں ریال میڈرڈ کی جانب سے کریم بیننزیمانے نے گول کیا جس کے 4 منٹ بعد ہی لیور پول کے سادیو مانے نے کھیل کے 54ویں منٹ میں گول کر کے مقابلہ ایک ایک سے برابر کیا۔  ریال میڈرڈ کی جانب سے گیراتھ بیل نے کھیل کے 63ویں اور 82ویں منٹ میں یکے بعد یگرے 2 گول کر کے لیول پول کی شکست کو یقینی بنایا۔  مقررہ وقت کے ختم ہونے تک ریال میڈرڈ کی لیور پول پر 1-3 کی برتری برقرار رہی، ریال میڈرڈ کے جیتنے پر ٹیم کے سپورٹرز نے میدان میں ہی جشن منایا اور مخالف ٹیم کے حامی مایوس دکھائی دیئے۔
image

لارڈز ٹیسٹ کے دوسرے دن چائے کے وقفے کے بعد ڈریسنگ روم اینڈ سے گیند کرنے والے بین اسٹوکس کی 85 کلو میڑ فی گھنٹہ کی رفتار سے پھینکی گئی گیند بابر اعظم کی بائیں کلائی پر لگی تو دائیں ہاتھ کے بیٹسمین درد سے کراہنے لگے۔گراؤنڈ میں آنے والے ڈاکڑ نے انھیں طبی امداد کے ساتھ برف لگا کر درد دور کرنے کی کوشش کی تاہم بات نہ بنی اور بابر اعظم کو پویلین لوٹنا پڑا۔اس وقت بابر 120 گیندوں پر 68 رنز بناچکے تھے۔ جب یہ واقع لارڈز کے گراؤنڈ پر ہوا اس وقت چیئرمین پی سی بی نجم سیٹھی پریس بکس میں پاکستانی صحافیوں کے ساتھ بیٹھے تھے۔ٹی وی اسکرین پر یہ سارا منظر دیکھنے والے چیئرمین نے وہاں موجود قومی ٹیم کے منیجر طلعت علی ملک کو کہا کہ فوراً بابر اعظم کو ایکسرے کےلئے ہسپتال بھیجا جائے۔منیجر صاحب نے ساتھ کھڑے اسسٹنٹ منیجراور میڈیا منیجر کی اضافی ذمہ داریاں ادا کرنے والے عون زیدی کو ڈریسنگ روم کی جانب دوڑا دیا جو تھوڑی دیر بعد فزیو کلف ڈکن کا یہ پیغام لے کر آئے کہ بابر اعظم کی انجری سنجیدہ نوعیت کی نہیں اور ابھی ابتدائی طبی امداد کے ساتھ انہیں ایکسرے کےلئے ہسپتال بھجوانے کی کوئی ضرورت نہیں۔چیئرمین پی سی بی نے عون زیدی کا جواب سننے کے بعد منیجر سے کہا کہ آپ خود دیکھیں سارے معاملے کو کم ازکم ایکسرے تو بنتا ہے ٖپھر شام کو پریس کانفرنس میں جب اظہر علی سے بابر اعظم کے متعلق سوال ہوا تو انہوں نے بھی سب ٹھیک ہے کی رپورٹ دیتے ہوئے کہا کہ ضرورت پڑنے پر بابر اعظم بیٹنگ کے لیے دستیاب ہوں گے۔بس پھر کیا تھا ٖ لندن میں موجود صحافیوں نے اخبارات کے لیے اپنی خبریں فائل کر دیں، ٹی وی اسکرین پر بابر اعظم خطرے سے باہر ہیں کی خبریں چل گئیں۔پھر کہانی میں نیا موڑ آیا، دوسرے دن کھیل ختم ہونے کے دو گھنٹے بعد پی سی بی میڈیا منیجر عون زیدی نے واٹس ایپ کے ذریعے ٹیم فزیو کلف ڈکن کا وڈیو پیغام بھیجا کہ بابراعظم بائیں کلائی میں فریکچر کے سبب لارڈز ٹیسٹ اور لیڈز ٹیسٹ سے باہر ہوگئے ہیں۔کہانی حیران کن تھی کیوں کہ ٹیم فزیو جو پہلے بابر اعظم کے ایکسرے کے حق میں نہ تھے کہہ رہے تھے کہ سب ٹھیک ہے اب ایکسرے کے بعد غلط ثابت ہوگئے تھے ٖاس ساری کہانی میں غیرذمہ داری کا عنصر اور غیر پیشہ ورانہ رویہ ہی سامنے آیا ہے کیوں کہ اگر قومی ٹیم کے فزیو بروقت بابر اعظم کا ایکسرے کروا لیتے تو شائد اتنی کہانی ہی نہ بنتی۔  
image

پاکستانی فاسٹ بولر حسن علی کے بائونسر سے انگلش بلے باز ڈیوڈ ملان کا ہیلمٹ ٹوٹ گیا۔کھیل کے تیسرے روز انگلش ٹیم نے کھانے کے وقف کے بعد بیٹنگ شروع کی تو حسن علی نے 22 ویں اوور کی آخری گیند ڈیوڈ ملان کو بائونسر مارا جو سیدھا ان کے ہیلمٹ پر لگا۔حسن علی کے بائونسر سے نا صرف ڈیوڈ ملان ہل کر رہ گئے بلکہ ان کے ہیلمٹ کے پچھلے حصے پر لگی حفاظتی جالی بھی ٹوٹ گئی۔واقعے کے فوری بعد انگلش ٹیم کے فزیو گرائونڈ میں آئے اور ڈیوڈ ملان سے ان کی طبیعت پوچھی، فزیو کی تسلی کے بعد ڈیوڈ ملان نے دوبارہ بیٹنگ شروع کی۔  
image

  لارڈز ٹیسٹ میں انگلش  بلے باز جوس بٹلر اور ڈومینک بیس نے انگلینڈ کو اننگز کی شکست سے بچالیا۔لارڈز ٹیسٹ میں پاکستان کے 179 رنز کی برتری کے جواب میں انگلینڈ کی بیٹنگ دوسری اننگز میں بھی مشکلات کا شکار رہی اور ایک موقع پر ان کے 6 ابتدائی بلے باز 110 رنز پر پویلین لوٹ گئے جس سے بظاہر یہ دکھائی دے رہا تھا کہ پاکستان نہ صرف یہ ٹیسٹ باآسانی جیت جائے گا بلکہ انگلینڈ کو اننگز کی شکست سے دوچار ہونا پڑے گا تاہم انگلش بلے باز جوس بٹلر اور ڈومینک پاکستانی بولرز کے سامنے ڈٹ گئے۔ دونوں بلے بازوں نے ساتویں وکٹ کے لیے 125 رنز کی شراکت قائم کرکے نہ صرف پاکستانی کی برتری ختم کی بلکہ اب انگلینڈ کو قومی ٹیم پر 56 رنز کی برتری حاصل ہوگئی ہے۔ تیسرے دن کے اختتام پر انگلینڈ نے 6 وکٹوں کے نقصان پر 235 رنز بنالیے ہیں۔ بٹلر 66 اور ڈومینک 55  رنز کے ساتھ وکٹ پر موجود ہیں۔ اس سے قبل انگلینڈ نے جب اپنی دوسری اننگز کا آغاز کیا تو پاکستان کو 179 رنز کی برتری حاصل تھی۔  قومی ٹیم کے بولرز نے ایک بار پھر شاندار بولنگ کا مظاہرہ کرتے ہوئے انگلش بلے بازوں کی ایک نہ چلنے دی۔ قومی ٹیم کی جانب سے محمد عباس، محمد عامر اور شاداب خان نے 2،2 وکٹیں حاصل کیں۔انگلینڈ کی پہلی اننگز میں 184 رنز کے جواب میں پاکستان کی ٹیم 363 رنز بنا کر آؤٹ ہوئی تھی۔ قومی ٹیم نے تیسرے دن کا آغاز 350 رنز 8 کھلاڑی آؤٹ سے کیا لیکن آخری دونوں بلے باز 13 رنز ہی کا اضافہ کرنے میں کامیاب ہوسکے اور پویلین لوٹ گئے۔میزبان ٹیم کے 184 رنز کے جواب میں پاکستان کی جانب سے چار بلے بازوں نے نصف سینچریاں اسکور کیں۔ قومی ٹیم کی جانب سے بابر اعظم 68 رنز پر ریٹائرڈ ہرٹ ہوئے جب کہ اسد شفیق 59، شاداب خان 52 اور اظہر علی 50 رنز پر آؤٹ ہوئے۔بابراعظم 68 رنز کے ساتھ سرفہرست رہے لیکن بین اسٹوک کی ایک ڈیلیوری کو روکتے ہوئے گیند ان کے ہاتھ پر جالگی جس کے باعث انہیں ریٹائرڈ ہرٹ ہونا پڑا۔ بعد ازاں ان کی انجری سنگین نوعیت کے ہونے کے باعث وہ انگلیںڈ کے خلاف مکمل سیریز سے باہر ہوگئے ہیں۔
image

انگلینڈ کیخلاف لارڈز ٹیسٹ میں پاکستان ٹیم اپنی پہلی اننگز میں 179 رنز کی سبقت حاصل کرنے کے بعد 363 رنز پر آئوٹ ہوگئی ۔ پاکستان تیسرے دن کا آغاز 350 رنز 8 کھلاڑی آئوٹ سے کیا لیکن آخری دونوں کھلاڑی 13 رنز کا اضافہ کرنے کے بعد آئوٹ ہو گئے۔ انگلینڈ کی پہلی اننگز میں 184 رنز کے جواب میں پاکستان کی پہلی اننگز میں چار کھلاڑیوں نے نصف سنچریاں سکور کیں ۔ گزشتہ روز ان فارم بیٹسمین بابر اعظم کے ریٹائرڈ ہرٹ ہونے کے باوجود شاداب خان اور فہیم اشرف نے ٹیم کو سہارا دیا اور پاکستان کی پوزیشن مستحکم کی۔ پاکستان کی جانب سے اظہر علی 50، اسد شفیق 59 اور شاداب خان 52 رنز بناکر آئوٹ ہوئے جبکہ بابر اعظم 68 رنز پر کھیل رہے تھے، جب گیند ان کے بازو پر لگی اور وہ فریکچر کے باعث نہ صرف میچ سے باہر ہوئے بلکہ سیریز سے بھی باہر ہو گئے ہیں ۔ انگلش ٹیم پہلی اننگز میں اپنے کم ترین سکور 184 رنز پر آئوٹ ہوئی تھی۔
image

فیفا نے آئندہ ماہ روس میں ہونے والے فٹبال ورلڈ کپ 2018 کا آفیشل گانا  لو اٹ اپ جاری کر دیا جسے معروف فنکاروں ول سمتھ ، نکی جیمز اور ایرا استریفی نے گایا ۔ فٹبال کی عالمی گورننگ باڈی فیفا نے عالمی ایونٹ کے آغاز سے 20دن قبل گانا ریلیز کیا جسے اب تک 20لاکھ سے زائد مرتبہ دیکھا اور سنا جا چکا ہے۔ فیفا کی جانب سے گانا گانے والے تینوں فنکاروں کو 15جولائی کو ماسکو میں ہونے والے فائنل میں مدعو کر کے پرفارم کرائے جانے کا قوی امکان ہے۔ نامور ریپ فنکار ول سمتھ نے کہا کہ فیفا ورلڈ کپ میں پرفارم کی دعوت ملنا اعزاز کی بات ہے، یہ عالمی ایونٹ دنیا بھر کے عوام کو ایک جگہ جمع کرتا ہے تاکہ وہ خوش ہوں، جشن منائیں اور کرشماتی لمحات سے لطف اندوز ہوں اور اس گانے کے ذریعے ہم یہ پیغام دینا چاہتے ہیں کہ ہم دنیا کو ناچتے ہوئے دیکھنا چاہتے ہیں۔ ورلڈ کپ کے آفیشل گانے اور میسکوٹ کا سلسلہ 1966 ورلڈ کپ سے جاری ہے اور اس کے بعد سے ہر ورلڈ کپ کےلئے گانے اور میسکوٹ کو خصوصی طور پر جاری کیا جاتا ہے۔ اس گانے کی ریلیز سے قبل ہی شائقین کے درمیان مباحثہ شروع ہو گیا تھا کہ آیا یہ گانا سابقہ ورلڈ کپ کے گانوں کے مقابلوں میں کامیاب ہو سکے گا یا نہیں۔2010 میں ریلیز کیا گیا گانا  واکا واکا  نامور گلوکار شکیرا نے گایا تھا اور یہ گانا آج بھی لوگوں میں یکساں مقبول ہے،  تاہم اس کے مقابلے میں جنیفر لوپیز کی جانب سے گایا گیا 2014 ورلڈ کپ کا گانا وی آر ون زیادہ مقبولیت حاصل کرنے میں ناکام رہا تھا۔
image

برطانوی دارالحکومت لندن میں ترکی کی دو فٹ بال ٹیموں کے درمیان ہونے والے میچ میں کھلاڑیوں نے ریفری کو ہی حریف سمجھ لیا۔ لیگ کے فائنل میچ کے دوران کسی بات پر بگڑے ایک درجن سے زائد کھلاڑی ریفری کے پیچھے دوڑ پڑے اور اسے کافی تشدد کا نشانہ بنایا۔ اسی دوران انتظامیہ نے پولیس کو طلب کیا ، تاہم تمام کھلاڑی اس سے قبل ہی رفو چکر ہوگئے۔
image

پاکستان کرکٹ بورڈ چیئرمین نجم سیٹھی نے انگلینڈ کے خلاف پہلی اننگز میں بائولرز کی شاندار کارکردگی پر خوشی کا اظہار کیا۔ ایک انٹرویو میں انہوںنے کہا کہ کپتان سرفراز احمد اور کوچ مکی آرتھر کی سربراہی میں ٹیم متحد ہے اور ٹیم میں کھلاڑیوں کا کوئی گروپ نہیں ۔ چیئر مین پی سی بی نے سمارٹ گھڑیوں کے سوال کا جواب دیتے ہوئے کہا کہ اس بارے میں انٹرنیشنل کرکٹ کونسل کے اینٹی کرپشن آفیسر کو بھی معلومات نہ تھیں البتہ بعد میں انہوں نے اس بارے میں ہمارے کھلاڑیوں سے کہا کہ اس کو استعمال نہ کیا جائے۔ انہوں  نے کہا کہ لڑکے ذمہ داری کا مظاہرہ کر رہے ہیں اور بطور چیئر مین وہ اس کارکردگی پر بہت خوش ہیں۔ دورہ زمبابوے کے بارے میں انہوں نے کہا کہ سب کچھ شیڈول کے مطابق ہوگا۔ متحدہ عرب امارات میں ٹیم پاکستان کی مصروفیات کے  بارے میں انہوں نے کہا کہ فی الحال فکر کی کوئی بات نہیں ، ہاں ٹی 10لیگ کی تاریخوں پر ضرور معاملات طے ہونا باقی ہیں، وہ جن تاریخوں میں ٹورنامنٹ کرانا چاہتے ہیں ، ممکن ہے ہمارے کنڑیکٹ یافتہ کھلاڑی دورہ جنوبی افریقہ کے سبب وہاں کے لئے دستیاب نہ ہوں ۔
image

 پاکستان بلائنڈ کرکٹ کونسل نے انقلابی فیصلہ کرتے ہوئے خواتین کی بلائنڈ کرکٹ ٹیم بھی لانچ کردی جو نیپال کے خلاف اپنی پہلی سیریز کھیلے گی۔ مقامی ہوٹل میں پاکستان بلائنڈ کرکٹ کونسل کے چیئرمین سید سلطان شان نے بلائنڈ وومن کرکٹ ٹیم بنانے کا اعلان کیا اور ابتدائی طور پر 15 رکنی ٹیم کو پاکستان کے سکواڈ کا درجہ دیا۔ بلائنڈ خواتین ٹیم کی لانچنگ کی تقریب میں پاکستان کی وومنز ٹیم کی کھلاڑیوں نین عابدی، جویریہ ودود، ناہیدا خان نے شرکت کی۔ سید سلطان شاہ نے کہا کہ پاکستان بلائنڈ وومنز ٹیم رواں برس نیپال کے خلاف ہوم سیریز کھیلے گی جبکہ ویسٹ انڈیز نے بھی ٹیم بنائی ہے،  لہٰذا ان کے ساتھ بھی سیریز ہوسکتی ہے۔ انہوں نے کہا کہ لاہور سے 100 سے زائد لڑکیوں نے رجسٹریشن کروائی ، جبکہ ہم ملک بھر سے 40 سے 50 لڑکیوں کو منتخب کرکے ان کا کیمپ لگائیں گے۔
image

سری لنکا میں وکٹ فکسنگ کی سازش پکڑی گئی، دی ٹیلی گراف نے اپنی تحقیقاتی رپورٹ میں انکشاف کیا ہے کہ گال سٹیڈیم کے گرائونڈ سٹاف نے سری لنکا اور انگلینڈ کے درمیان رواں برس 6 نومبر کو ہونے والے میچ کے لیے وکٹ فکسنگ کی یقین دہانی کروائی۔ رپورٹ کے مطابق اس سازش میں سابق بھارتی فرسٹ کلاس کرکٹر رابن مورس اور گال سٹیڈیم کا سسٹنٹ مینیجر تھرانگا اندیکا شامل ہیں۔  اس حوالے سے ایک انڈر کو رپورٹر، بزنس مین کے روپ میں گال سٹیڈیم کے سٹاف سے ملا اور خفیہ طور پر اس بات چیت کی ویڈیو بھی ریکارڈ کرلی۔ مذکورہ رپورٹر نے  پوچھا کہ کیا ٹیسٹ میچ 4 دن میں ختم ہوجائے گا؟ جس پر وکٹ فکسر تھرانگا اندیکا نے رپورٹر کو جواب دیا، چار دن کیا، ڈھائی دن میں ہی ختم کردیں گے۔ مذکورہ وکٹ فکسر نے بھارت اور سری لنکا کے درمیان گال ٹیسٹ کی وکٹ کو بھی فکس کرنےکا اعتراف کیا، اس میچ میں بھارت نے 6 سو سے زائد رنز بنائے تھے۔  دوسری جانب انٹرنیشنل کرکٹ کونسل کا کہنا ہے کہ رپورٹ کے مکمل طور پر منظر عام پر آنے کے بعد معاملے کی تحقیقات کی جائے گی۔
image

شاہد آفریدی کینیڈین ٹی ٹوئنٹی لیگ میں شریک ہوں گے ٖایونٹ کے مقابلے 18 جولائی سے 15 جون تک شیڈول کئے گئے ہیں۔کینیڈین ٹی ٹوئنٹی لیگ لیگ میں اسٹیون سمتھ، کرس گیل، ڈیوڈ ملر،آندرے رسل اور سنیل نارائن سمیت متعدد سٹار کرکٹرز بھی شائقین کی توجہ کا مرکز بنیں گے۔ یاد رہے کہ آفریدی انٹرنیشنل کرکٹ سے ریٹائر ہوچکے ہیں اور اب صرف لیگز میں شرکت کرتے ہیں۔ وہ پی ایس ایل تھری کے دوران گھٹنے کی انجری کا شکار ہوگئے تھے اور فٹنس کی بحالی کیلئے کوشاں ہیں۔  
image

برطانوی وزیراعظم ٹریزا مے نے لارڈز ٹیسٹ میں پاکستانی ٹیم کی کارکردگی کی تعریف کی۔ٹریزا مے اپنے شوہر فلپ جون کے ہمراہ پاکستان اور انگلینڈ کے درمیان پہلا ٹیسٹ میچ دیکھنے آئیں جو لارڈز کے تاریخی میدان پر کھیلا جارہا ہے۔اس موقع پر ان کے ساتھ پاکستان کرکٹ بورڈ پی سی بی چیئرمین نجم سیٹھی، بزنس مین اور سابق رکن صوبائی اسمبلی ڈاکٹر اشرف چوہان بھی موجود تھے۔برطانوی وزیراعظم نے پی سی بی چیئرمین کو کہا کہ پاکستان نے اب تک بہت اچھا کھیل پیش کیا ہے۔انہوں نے کہاکہ لارڈز کے میدان پر ہمیشہ تماشائیوں کی بڑی تعداد میچ دیکھنے آتی ہے اور پاکستان اور انگلینڈ کے درمیان کھیلے جانے والے میچز دلچسپ ہوتے ہیں۔ٹریزا مے نے کہا کہ پاکستانی ٹیم نے کھیل کے پہلے روز بہترین بولنگ کا مظاہرہ کیا۔ پاکستان نے انگلینڈ کو شاندار گیند بازی کی بدولت 184 پر آؤٹ کیا تھا۔اس موقع پر نجم سیٹھی نے کہا کہ پاکستانی ٹیم کی فارم اچھی ہے اور ڈسپلن کے ساتھ اچھی کارکردگی کا مظاہرہ کررہی ہے۔انہوں نے امید کا اظہار کیا کہ پاکستانی ٹیم انگلینڈ کے خلاف سیریز میں بھی کامیاب ہوگی۔برطانوی وزیراعظم تین گھنٹے تک گراؤنڈ میں موجود رہیں اور پاکستانی شائقین کے درمیان گھل مل گئیں۔  
image

لارڈز ٹیسٹ کے دوسرے دن انگلینڈ کے خلاف پاکستان کی بیٹنگ جاری اور پاکستان نے 8 وکٹ کے نقصان پر 350 رنز بنا لیے ہیں۔ انگلینڈ کے خلاف دو ٹیسٹ میچوں کی سیریز کے پہلے میچ کے دوسرے دن پاکستان کی بیٹنگ جاری ہے اور قومی ٹیم نے دوسرے دن کے اختتام پر 350 رنزبنالیے یوں انہیں انگلینڈ پر 166 رنز کی برتری حاصل ہے۔دوسرے دن کے آغاز پر پاکستان کی جانب سے اظہر علی اور حارث سہیل نے 50 رنز ایک کھلاڑی آؤٹ پر نامکمل اننگ دوبارہ شروع کی۔ تاہم 87 کے اسکور پر حارث سہیل اپنی وکٹ گنوا بیٹھے، انہوں نے 39 رنز کی اننگز کھیلی جس کے کچھ دیر بعد ہی اظہر علی بھی 50 رنز کی اننگز کھیل کر پویلین واپس لوٹ گئے۔ بابر اعظم اور اسد شفیق نے 82 رنز کی اہم شراکت قائم کی تاہم اسد شفیق 59 رنز کی اننگز کھیل کر آؤٹ ہوئے، کپتان اسد شفیق خاطر خواہ کارکردگی نہ دکھاسکے وہ صرف 9 رنز کے  مہمان ثابت ہوئے۔ بابر اعظم نے بھی اپنی نصف سنچری کے ساتھ قومی ٹیم کی بیٹنگ میں اہم کردار ادا کیا لیکن بین اسٹوک کی ایک ڈیلیوری کو روکتے ہوئے گیند ان کے ہاتھ پر جالگی جس کے باعث انہیں ریٹائرڈ ہرٹ ہونا پڑا، وہ 68 رنز بناسکے تھے۔ فہیم اشرف اور شاداب خان نے ایک بار پھر عمدہ بلے بازی کا مظاہرہ کرتے ہوئے 72 رنز کی شراکت قائم کی، فہیم اشرف 37 اور شاداب خان 52 رنز بناکر آؤٹ ہوئے جب کہ محمد عامر 19 رنز کے ساتھ وکٹ پر موجود ہیں۔اس سے قبل پاکستان نے انگلینڈ کی پوری ٹیم کو پہلی اننگز میں 184 رنز پر آؤٹ کرلیا تھا ، قومی ٹیم کی جانب سے محمد عباس اور حسن علی نے 4،4 کھلاڑیوں کو پویلین کی راہ دکھائی جب کہ محمد عامر اور فہیم اشرف کے حصے میں ایک ایک وکٹ آئی
image

انگلش بیٹسمین الیسٹر کک نے مسلسل 153 ٹیسٹ میچز کھیلنے کا آسٹریلوی کرکٹر ایلن بارڈر کا ریکارڈ برابر کر دیا۔ پاکستان کے خلاف لارڈز میں شروع ہونے والا سیریز کا پہلا مقابلہ مجموعی طور پر کک کا 154 واں ٹیسٹ ہے، بھارت کے خلاف ڈیبیو پر سنچری جڑنے کے بعد بیماری کی وجہ سے وہ اگلا ٹیسٹ نہیں کھیل پائے تھے، اس تعطل کے بعد انگلش سلیکٹرز نے انہیں کبھی بھی ڈراپ نہیں کیا اور نہ ہی کسی اور وجہ سے کک کو کسی میچ سے غیر حاضر ہونا پڑا۔ کک اور بارڈر دونوں ہی لیفٹ ہینڈڈ بیٹسمین اور دونوں ہی 11 ہزار سے زائد ٹیسٹ رنز  بنا چکے ہیں۔ دونوں کو ہی اپنی اپنی ٹیموں کی قیادت کا اعزاز حاصل ہوا۔ دلچسپ بات تو یہ ہے کہ دونوں نے ہی ایسیکس کو ایک ایک مرتبہ کائونٹی چیمپئن شپ ٹائٹل جتوا یا ہے مگر ایک معاملے میں کک بورڈر سے آگے ہیں، انہوں نے ان سے  5 برس کم عمر میں یہ مسلسل 153 ٹیسٹ کھیلنے کا اعزاز حاصل کیا۔
image

 کرکٹرز ایسوسی ایشن کے چیف ہیتھ ملز نے کہا ہے کہ سب ہی دورہ پاکستان سے انکاری نہیں، کچھ سیکیورٹی کلیئرنس پر ٹور کیلئے تیار جبکہ بعض دبئی میں ہی کھیلنے کے خواہاں ہیں، حتمی فیصلہ 15 روز کے اندر سیکیورٹی رپورٹ ملنے کے بعد کیا جائے گا۔ نیوزی لینڈ کی ٹیم نے اکتوبر نومبر میں یو اے ای میں پاکستان کے ساتھ تین ٹیسٹ، اتنے ہی ون ڈے اور ٹوینٹی 20 میچز کی سیریز کھیلنی ہے، پی سی بی کی جانب سے کیوی ٹیم کو دو ٹوینٹی 20 میچز پاکستان میں کھیلنے کی دعوت دی گئی تھی جس پر نیوزی لینڈ کرکٹ نہ صرف غور کر رہا ہے بلکہ اس نے سیکیورٹی صورتحال کے جائزے کیلئے ریگ ڈکسن کی خدمات حاصل کرلی ہیں۔ اب معلوم ہوا ہے کہ کیوی پلیئرز نے اس ٹور کے حوالے سے خدشات کا اظہار کر دیا ۔ جس سے نیوزی لینڈ ٹیم کے 15 برس بعد پاکستان کے ٹور کے امکانات کم پڑنے کا خدشہ پیدا ہوگیا ۔ فی الحال نیوزی لینڈ کرکٹ کو سیکیورٹی رپورٹ کا انتظار ہے، 15 دن میں اس بارے میں حتمی فیصلے کا امکان ہے۔ چیف ایگزیکٹیو ڈیوڈ وائٹ اور کرکٹ پلیئرز ایسوسی ایشن باس ہیتھ ملز دونوں نے ہی اس بات کی تصدیق کی ہے کہ پلیئرز کی جانب سے اس ٹور پر خدشات کا اظہار کیا گیا ، تاہم بورڈ نے واضح کیا ہے کہ اس بارے میں کوئی بھی فیصلہ کرنے کیلئے وہ کھلے ذہن سے چیزوں کا جائزہ لے رہے ہیں۔ ملزنے کہا ہے کہ پاکستان کے دورے کے حوالے سے کھلاڑیوں کی آرا منقسم ہے، سب ہی اس ٹور کیخلاف نہیں ہیں، کچھ کھلاڑیوں نے کہا ہے کہ   اگر سیکیورٹی کلیئرنس ملتی ہے تو ان کو کوئی اعتراض نہیں جبکہ دوسروں کا کہنا ہے کہ کیا ہم دبئی میں ہی نہیں رک سکتے۔ ذرائع نے واضح کیا ہے کہ اگر آدھے پلیئرز پاکستان کے ٹور سے انکار کرتے ہیں تو پھر نیوزی لینڈ اپنی کمزور ٹیم نہیں بھیجے گا۔ بیٹنگ کوچ کریگ میک ملن کا ٹور پر جانے کا امکان نہ ہونے کے برابر ہے کیونکہ وہ 2002 کی اس ٹیم میں شامل تھے، جس کے کراچی میں ہوٹل کے سامنے بم بلاسٹ ہوا تھا۔
image

قومی کرکٹ ٹیم آج لارڈز ٹیسٹ کے دوسرے روز 50 رنز ایک کھلاڑی آئوٹ سے اننگز آگے بڑھائے گی۔ لارڈز ٹیسٹ کے پہلے روز قومی ٹیم کے بائولرز چھائے رہے اور میزبان ٹیم کا کوئی بلے باز بڑی اننگز نہ کھیل سکا، لارڈز کرکٹ گرائونڈ میں پاکستان کے خلاف انگلش ٹیم اپنے کم ترین سکور 184 رنز پر ڈھیر ہوئی۔ پاکستان کی جانب سے آج حارث سہیل اور اظہر علی دوسرے روز کے کھیل کا آغاز کریں گے جو بالترتیب21 اور 18 رنز کے ساتھ کریز پر موجود ہیں۔ پاکستان کو میزبان ٹیم کی سبقت ختم کرنے کے لئے مزید 134 رنز درکار ہیں، گزشتہ روز اوپننگ بلے باز امام الحق 12 کے مجموعی سکور پر 4 رنز بنانے کے بعد آئوٹ ہوگئے تھے۔ یاد رہے کہ انگلش کپتان جوئے روٹ نے ٹاس جیت کر پہلے بیٹنگ کا فیصلہ کیا جو بظاہر درست ثابت نہ ہوا اور پوری ٹیم 184 رنز بنا کر پویلین لوٹ گئی۔ میزبان ٹیم کی جانب سے السٹرل کک 70 رنز کے ساتھ نمایاں رہے، جبکہ جونی بیرسٹو، بین سٹوک اور جوس بٹلر بالترتیب 27، 38 اور 14 رنز بنا کر آئوٹ ہوئے اور 6 بلے باز ڈبل فیگر میں بھی شامل نہ ہوسکے۔  پاکستان کی جانب سے محمد عباس اور حسن علی نے شاندار بولنگ کا مظاہرہ کرتے ہوئے 4،4 جبکہ محمد عامر اور فہیم اشرف نے ایک ایک بلے باز کو پویلین کی راہ دکھائی۔
image

آئی سی سی اینٹی کرپشن یونٹ نے پاکستانی کرکٹرز اسد شفیق اور بابر اعظم کو اسمارٹ واچز (گھڑیاں) پہننے سے روک دیا۔یہ واقعہ لارڈز ٹیسٹ کے پہلے دن پیش آیا جس میں پاکستانی کرکٹرز اسد شفیق اور بابر اعظم سے اسمارٹ واچز اتروالیں گئیں۔آئی سی سی اینٹی کرپشن یونٹ آفیسر کے مطابق دونوں کھلاڑیوں کی گھڑیاں موبائل فون سے کنکٹ ہوسکتی ہیں آئی سی سی قوانین کے تحت انہیں پہننے کی اجازت نہیں۔ ٹیم کے میڈیا منیجر عون زیدی نے واقعے کی تصدیق کرتے ہوئے بتایا کہ  اینٹی کرپشن یونٹ آفیشل نے پوری ٹیم کو آگاہ کردیا ہے کہ مخصوص گھڑیاں میچ کے دوران پہننے کی اجازت نہیں اس کے علاوہ اور کوئی بات نہیں ہوئی۔دریں اثنا پریس کانفرنس میں حسن علی نے نام لیے بغیر کہا کہ اینٹی کرپشن آفیسر نے ہماری ٹیم کو بتایا کہ مخصوص گھڑیاں میچ کے دوران پہننے کی اجازت نہیں دی اس لیے انہیں اتار دیا گیا
image

لارڈز میں کھیلے جارہے ٹیسٹ میچ میں پاکستان نے انگلینڈ کی پوری ٹیم کو 184 رنز پر پویلین بھیج دیا جس کے جواب میں قومی ٹیم نے پہلے دن کے اختتام تک ایک وکٹ کے نقصان پر 50 رنز بنالیے ہیں۔ لندن کے تاریخی میدان لارڈز میں کھیلے جارہے ٹیسٹ میں انگلینڈ کی پوری ٹیم پہلی اننگز میں 184 رنز پر آؤٹ ہوگئی جس کے جواب میں قومی ٹیم کی بیٹنگ جاری ہے۔ پاکستان کی جانب سے اظہر علی اور امام الحق نے اننگز کا آغاز کیا تاہم آئرلینڈ کے خلاف اچھی کارکردگی دکھانے والے امام الحق صرف 4 رنز بناکر آؤٹ ہوئے۔ دن کے اختتام تک اظہر علی 18 اور حارث سہیل 21 رنز کے ساتھ وکٹ پر موجود ہیں۔ اس سے قبل پاکستان کے خلاف انگلینڈ نے ٹاس جیت کر پہلے بیٹنگ کا فیصلہ کیا لیکن قومی ٹیم کے بولرز نے ابتدا سے ہی انگلش بلے بازوں پر دباؤ برقرار رکھا جس کی وجہ سے ان کی وکٹیں وقفے وقفے سے گرتی رہیں۔ انگلینڈ کی جانب سے ایلسٹر کک اور مارک اسٹون مین نے اننگ کا آغاز کیا، محمد عباس نے 12 کے مجموعی اسکور پر اسٹون مین کو ٹھکانے لگادیا۔ 33 کے اسکور پر جوئے روٹ کو حسن علی نے آؤٹ کیا۔ 43 کے مجموعی اسکور پر حسن علی نے ڈیوڈ ملان کو بھی پویلین کی راہ دکھادی۔ابتدائی تین بلے بازوں کے جلد پویلین لوٹ جانے کے بعد تجربہ کار بیٹسمین الیسٹر کک اور جوناتھن بیراسٹو نے 57 رنز کی قیمتی شراکت قائم کی لیکن بیراسٹو کو 27 رنز پر فہیم اشرف نے بولڈ کردیا جس کے بعد کک کی ہمت بھی 70 رنز پر جواب دے گئی انہیں محمد عامر نے پویلین بھیجا۔ انگلینڈ کے دیگر بلے باز خاطر خواہ کارکردگی نہ دکھاسکے صرف بین اسٹوکس 38 رنز بنا کر نمایاں رہے جب کہ جوز بٹلر بھی 14 رنز کے مہمان ثابت ہوئے، اسٹوٹ بورڈ کو کھاتہ کھولے بغیر ہی پویلین واپس لوٹنا پڑا۔ پاکستان کی جانب سے محمد عباس اور حسن علی نے 4،4 کھلاڑیوں کو پویلین کی راہ دکھائی جب کہ محمد عامر اور فہیم اشرف کے حصے میں ایک ایک وکٹ آئی
image

 بھارتی کرکٹ ٹیم کے کپتان ویرات کوہلی کو پرستاروں کی جانب سے انوشکا کو طلاق دینے کی تجاویز موصول ہونے لگیں۔ اس کی ایک وجہ بھارتی کرکٹ ٹیم اور رائل چیلنجر بنگلور کی جانب سے انڈین پریمیئر لیگ میں ان کی خراب پرفارمنس ہے۔  پرستاروں نے کہا کہ کہ جب سے کوہلی نے انوشکا سے شادی کی ہے ان کی پرفارمنس میں مسلسل زوال آ رہا ہے اور وہ ماضی کی طرح کھل کر پرفارم نہیں کر پا رہے۔ گزشتہ روز بھی کولکتہ نائٹ رائڈز کیخلاف میچ میں ان کی پرفارمنس ایسی تھی کہ جس کی شائقین امید نہیں کر رہے تھے۔ سماجی رابطوں کی ویب سائیٹ پر مداحوں کی جانب سے ایک پیغام وائرل ہوا جس میں لکھا تھا کہ کسی میچ کیلئے آرام بھی کر لیا کرو انوشکا شرما۔ اسی پیغام میں انوشکا کی ایک بڑھاپے والی تصویر شامل کی گئی تھی اور اس میں لکھا تھا کہ انوشکا تمہیں آئندہ سیزن کا انتظار کرنا ہوگا۔ 
image

چین کے دارلحکومت بیجنگ میں دو روزہ سپارٹن ریس کا انعقاد کیا گیا ، جس میں دس ہزار سے زائد مردوں، خواتین اور نوجوانوں نے ٹیموں کی شکل میں حصہ لیا اور شدید مشکل رکاوٹوں سے بھرا11میل کا فاصلہ طے کیا ۔ اس ریس میں حصہ لینے والے شرکاکوجہاں کیچڑ اورتالابوں سے گزرنا تھا وہیں کیچڑسے بھرے گڑھے، برفیلے پا نی سے بھری تاریک سرنگ، برقی اور خار دار تاروں، چکنے راستوں اور4فٹ اونچے آگ کے بھڑکتے شعلوں سمیت کم و بیش20مشکلات عبور کرنا تھیں۔ سب سے پہلے رکاوٹیں عبور کرتے ہوئے مقررہ فاصلہ طے کرنے والی ٹیم کو انعام کا حقدار قرار دیا گیا۔
image

صومالیہ نږاد برطانوی خاتون جواہر روبل فٹ بال میچ میں ریفری کے فرائض انجام دینے والی پہلی مسلم خاتون بن گئیں۔ غیر ملکی میڈیا کے مطابق صومالیہ سے والدین کے ہمراہ ہجرت کر کے برطانیہ میں سکونت حاصل کرنے والی 24 سالہ جواہر روبل نے ایک بڑے فٹ بال میچ میں ریفری کے فرائض انجام دے کر دنیا کی پہلی مسلم خاتون ریفری بننے کا اعزاز حاصل کرلیا۔ وہ برطانیہ کی فٹ بال ایسوسی ایشن کی ایک تربیت یافتہ ریفری ہیں اور پہلی کامیابی کے بعد اب وہ چیمپئنز لیگ کے مقابلوں میں ریفری بننے کے خواب دیکھ رہی ہیں۔ برطانوی اخبار سے بات کرتے ہوئے پہلی مسلم خاتون ریفری نے کہا کہ پہلے پہل کافی مشکلات کا سامنا رہا کیو نکہ سٹیڈیم میں بعض کھلاڑی مذاق بھی اڑاتے تھے اور حوصلہ شکنی کرتے لیکن جب آہستہ آہستہ میں نے اپنی حیثیت اور مقام منوا لیا ۔
image

لارڈز میں کھیلے جارہے ٹیسٹ میچ میں پاکستان کے خلاف میزبان انگلینڈ بیٹنگ کررہا ہے۔ لندن کے تاریخی میدان لارڈز میں کھیلے جارہے ٹیسٹ میں پاکستان کے خلاف انگلینڈ ٹاس جیت کر بیٹنگ کررہا ہے۔ انگلینڈ کی جانب سے ایلسٹر کک اور مارک اسٹون مین نے اننگ کا آغاز کیا، محمد عباس نے 12 کے مجموعی اسکور پر اسٹون مین کو ٹھکانے لگادیا۔ 33 کے اسکور پر جوئے روٹ کو حسن علی نے آؤٹ کیا۔ 43 کے مجموعی اسکور پر حسن علی نے ڈیوڈ ملان کو بھی پویلین کی راہ دکھادی۔پاکستان کی پلیئنگ الیون میں اظہر علی، امام الحق، حارث سہیل، اسد شفیق ، بابر اعظم، سرفراز احمد (کپتان)، شاداب خان، فہیم اشرف، محمد عامر، حسن علی اور محمد عباس شامل ہیں۔ فخر زمان، سمیع اسلم، عثمان صلاح الدین، سعد علی اور راحت علی ایمرجنسی فیلڈرز ہوں گے۔انگلینڈ ٹیم کی قیادت جوئے روٹ کررہے ہیں، دیگر پلیئرز میں الیسٹر کک، مارک اسٹون مین، ڈیوڈ میلان، جوناتھن بیئراسٹو، بین اسٹوکس، جوس بٹلر، ڈومنیک بیس، اسٹوارٹ براڈ، مارک ووڈ اور جیمز اینڈرسن شامل ہیں۔ متبادل فیلڈرز میں کرس ووکس، برینڈن ایلن، ایلیٹ کیلس، بین کیورن، فن ہڈسن پرنٹائس اور ساف امتیاز شامل ہیں۔ 
image

سابق پاکستانی فاسٹ بائولر وسیم اکرم کی زیادہ ٹیسٹ وکٹوں کا ریکارڈ انگلش فاسٹ بائولر سٹورٹ براڈ کے نشانے پر  آگیا اس بات کے قوی امکانات ہیں کہ براڈ پاکستان کے خلاف شیڈول دو ٹیسٹ میچوں کی سیریز میں اکرم کی زیادہ وکٹوں کا ریکارڈ توڑ دیں گے، انہیں اکرم کا ریکارڈ توڑنے کیلئے 5 وکٹوں کی ضرورت ہے، وسیم اکرم نے 414 اور براڈ نے 410 وکٹیں لے رکھی ہیں، انگلینڈ اور پاکستان کے درمیان دو ٹیسٹ میچوں پر مشتمل سیریز کا پہلا ٹیسٹ جمعرات سے لارڈرز میں شروع ہو گا۔۔
image

عوامی سروے

سوال: کیا نواز شریف کے ممبئی حملوں سے متعلق بیان کے بعد ان کے خلاف سخت کارروائی ہونی چاہئے؟