عالمی خبریں
مقبوضہ کشمیر میں بھارتی جارحیت کا سلسلہ رکنے کا نام نہیں لے رہا، بھارتی فوج نے کپواڑہ میں ٹیکسی ڈرائیور کو شہید کر دیا، بھارتی جارحیت کے خلاف ہزاروں افراد سڑکوں پر نکل آئے۔ میڈیا رپورٹس  کے مطابق قابض بھارتی فوج نے کشمیری ڈرائیور آصف اقبال کو کپواڑہ کے علاقے ٹھنڈی پورہ میں فائرنگ کرکے شہید کر دیا، تدفین میں ہزاروں افراد نے شرکت کی اور احتجاج شروع کر دیا ، شرکا نے بھارت کے خلاف اور آزادی کے حق میں نعرے لگائے۔ بھارتی فوج نے جنازے کے شرکا پر آنسو گیس کی شیلنگ کی، واقعے کے خلاف ضلع کپواڑہ میں مکمل ہڑتال  اور ٹرانسپورٹ بند رہی۔ حریت رہنمائوں سید علی گیلانی، میر واعظ عمر فاروق و دیگر نے کہا ہے کہ ظالم بھارتی فوج سوچے سمجھے منصوبے کے تحت معصوم کشمیریوں کا قتل عام کر رہی ہے۔

افغانستان کے دارالحکومت میں افغان خفیہ ایجنسی این ڈی ایس کی عمارت پر مسلح افراد نے دھاوا بول دیا، جس کے بعد حملہ آوروں اور سکیورٹی فورسز کے درمیان کئی گھنٹے تک فائرنگ کا تبادلہ جاری رہا ، تاہم تاحال کسی شخص کے ہلاک یا زخمی ہونے کی اطلاع نہیں ملی۔ غیر ملکی میڈیا کے مطابق افغان سکیورٹی فورسز کی بھاری نفری نے جائے وقوعہ پر پہنچ کر عمارت کو گھیرے میں لے کر آپریشن شروع کر دیا۔ افغان وزارت داخلہ کے ترجمان نجیب دانش نے ملٹری سنٹر پر حملے کی تصدیق کرتے ہوئے کہا ہے کہ دہشت گردوں کی جانب سے حملے کا ہدف اور تصادم میں ہونے والی ممکنہ ہلاکتوں کے بارے میں کچھ بھی کہنا قبل از وقت ہے، جبکہ حملے کی ذمہ داری بھی ابھی تک کسی تنظیم نے قبول نہیں کی ہے۔ 
image

 ایران کے وزیر خارجہ محمد جواد ظریف نے کہا ہے کہ اقوام متحدہ میں امریکی مندوب نکی ہیلی نے ایران کی جانب سے یمن کی عوامی تحریک انصار اللہ کو ہتھیار فراہم کرنے کے دعووں پر اقوام متحدہ سے رجوع کرنے کا فیصلہ کیا ہے ۔ محمد جواد ظریف نے روسی خبر رساں ایجنسی سپوتنک کو ایک ای میل بھیجا ہے جس میں کہا گیا ہے کہ ایران امریکی دعووں پر اقوام متحدہ میں شکایت کرے گا۔  یاد رہے خاتون امریکی مندوب نکی ہیلی نے گزشتہ دنوں سعودی عرب پر یمن سے داغے گئے  میزائل کے ٹکڑے دکھائے اور اس کے ساتھ ہی یمن میں ہتھیاروں کی فراہمی کے حوالے سے ایران پر الزامات بھی لگائے.تاہم اقوام متحدہ کے ترجمان فرحان حق نے نے نکی ہیلی کے دعووں کو مسترد کر دیا ہے۔  
image

امریکا، برطانیہ اور دیگر یورپی ممالک میں برفباری کا سلسلہ جاری ہے، برطانیہ میں برف پگھلنے سے سیلاب کی پیش گوئی کر دی گئی ۔ غیر ملکی میڈیا کے مطابق امریکی شہر نیویارک میں برفباری نے موسم خوشگوار بنا دیا، برطانیہ میں بھی سرد موسم کا راج ہے۔ ماہرین کے مطابق برطانیہ میں برفباری کے دوسرے مرحلے کا آغاز ہوچکا ہے، برفباری کے سبب الرٹ بھی جاری کر دیا گیا ہے۔ گزشتہ ہفتے ہونے والی شدید برف باری سے نظام زندگی مفلوج ہوگیا تھا۔ حکام نے برف پگھلنے سے کئی مقامات پر سیلاب کی وارننگ جاری کرتے ہوئے رہائشیوں کو محتاط رہنے کی ہدایت کی ہے۔
image

امریکی اخبار نے دعویٰ کیا ہے کہ سعودی عرب کے ولی عہد شہزادہ محمد بن سلمان فرانس میں 30 کروڑ ڈالر مالیت کے محل کے اصل خریدار ہیں۔ امریکی اخبار کے مطابق پیرس کے مغرب میں واقع محل دنیا کا مہنگا ترین گھر ہے اور سعودی عرب میں بدعنوانی کے خلاف مہم چلانے والے طاقتور ولی عہد کی غیر معمولی قیمتی خریداریوں کی ایک کڑی ہے، اخبار کے مطابق نئے تعمیر ہونے والے محل کو 2015 میں ایک نامعلوم گاہک نے خریدا تھا اور اس کے مالک کی شناخت کو شیل کمپنیوں کے ذریعے خفیہ رکھا گیا تھا تاہم شاہی خاندان کے مشیروں نے تصدیق کی ہے کہ محل کے خریدار محمد بن سلمان ہیں، سعودی عرب کے حکام نے جولائی میں سامنے آنے والی ایک رپورٹ پر ردعمل دینے سے انکار کیا تھا جس میں فرانس کی تحقیقاتی صحافت کی ویب سائٹ میں نشاندہی کی گئی تھی کہ شہزادہ محمد بن سلمان محل کے اصل خریدار ہیں۔ ایک اور امریکی میگزین نے 2015 میں اس محل کی فروخت کے وقت بتایا تھا کہ محل کے فواروں کو آئی فون کے ذریعے کنٹرول کیا جا سکتا ہے اور اپنے طرز تعمیر کے لحاظ سے یہ 17ویں صدی کی عمارت دکھائی دیتی ہے۔اس وقت محل کی خریداری کو دنیا کا سب سے مہنگا گھر قرار دیا گیا تھا۔اصل میں عمارت کو 19 ویں صدی میں تعمیر کیا گیا تھا تاہم سعودی عرب کی ایک کمپنی نے اسے خرید کر منہدم کر دیا تھا اور اس کی جگہ نئی عمارت کھڑی کی تھی۔ محل کو ایٹ انویسٹمنٹ کمپنی کے ذریعے خریدا کیا گیا تھا اور اسی کمپنی کے ذریعے 2015 میں 50 کروڑ ڈالر کی ایک لگږری کشتی خریدی گئی تھی۔
image

 افغانستان کے صوبے ہلمند میں  سیکیورٹی  چیک پوسٹ  پر طالبان کے حملے میں 11 پولیس اہلکار ہلاک ہوگئے۔ مقامی انتظامیہ نے غیرملکی خبر رساں ادارے کو بتایا کہ طالبان نے ہلمند صوبے کے جنوبی علاقے میں قائم سیکیورٹی چیک پوسٹ پر بھاری ہتھیاروں سے حملہ کیا جس کے نتیجے میں چیک پوسٹ پر تعینات 11 پولیس اہلکار ہلاک ہوگئے۔ گورنر ہلمند کے ترجمان نے حملے کی تصدیق کرتے ہوئے بتایا کہ  سیکیورٹی فورسز نے اچانک ہونے والے حملے کا بھرپور جواب دیا جس میں متعدد حملہ آور بھی مارے گئے۔ واضح رہے کہ افغانستان کے صوبے ہلمند کا بڑا حصہ طالبان کے زیر کنٹرول ہے۔
image

افغان حکام نے ڈرون حملے اور آپریشن کے دوران 16 داعشی جنگجو ہلاک کرنے کا دعویٰ کیا ہے ، افغان فورسز کا شدت پسندوں کے خلاف ننگرہار میں زمینی اور فضائی آپریشن بھی جاری ہے، غیرملکی خبر رساں ادارے کے مطابق افغان وزارت دفاع کی جانب سے  جاری کیے گئے ایک بیان میں کہا گیا کہ صوبے ننگرہار میں امریکی ڈرون حملے میں داعش کے4 جنگجو ہلاک ہوئے، انسداد دہشتگردی آپریشن میں داعش کے دیگر7 جنگجو بھی مارے گئے۔  ڈرون حملہ ضلع حسکہ مینا میں کیا گیا، حملے میں ہلاک ہونے والے داعش جنگجو تاجک شہری تھے۔  افغان فورسز کا شدت پسندوں کے خلاف ننگرہار میں زمینی اور فضائی آپریشن بھی جاری ہے۔  گزشتہ24 گھنٹوں میں زمینی اور فضائی آپریشن کے دوران5 داعش جنگجو مارے گئے جبکہ 4 زخمی ہوئے۔
image

فلپائن کے مشرقی ساحلی علاقوں میں آنے والے سمندری طوفان سے سات افراد ہلاک اور70 ہزار سے زائد افراد بے گھر ہوگئے۔ غیرملکی خبر رساں ادارے کے مطابق سمندری طوفان 110 کلومیٹر فی گھنٹہ تیز رفتار ہوائوں کے ساتھ فلپائن کے جزیروں سے ٹکرایا، جس کے بعد طوفانی بارشوں کے باعث رہائشی علاقے زیر آب آگئے۔ طوفان کے ساتھ آنے والی ہوائوں کی شدت اتنی زیادہ تھی کہ سائن بورڈز گر گئے ، درخت جڑوں سے اکھڑ گئے، بجلی اور مواصلات کا نظام درہم برہم ہو گیا۔ طوفان کے باعث فلپائن کے کچھ علاقوں میں لینڈ سلائیڈنگ بھی ہوئی تاہم طوفان کے باعث ہزاروں لوگ محفوظ مقامات پر منتقل ہوگئے ہیں۔
image

امریکی ریاست کیلیفورنیا کے جنوبی حصے کے جنگلات میں لگنے والی آگ پر قابو نہیں پایا جا سکا۔ عالمی ذرائع ابلاغ کے مطابق کیلیفورنیا کے جنگلات میں لگنے والی آگ کی لپیٹ میں آ کر اب تک ایک ہزار سے زائد عمارتیں تباہ ہو چکی ہیں، جن میں جلنے والے 750 مکانات بھی شامل ہیں۔ چار دسمبر سے لگی آگ اس وقت ڈھائی لاکھ سے زائد ایکڑ رقبے میں پھیل چکی ہے۔ اندازوں کے مطابق اب تک اس آگ کی وجہ سے تقریباً ستانوے ملین ڈالر کا نقصان ہو چکا ہے۔ فائربریگیڈز کے ہزاروں کارکن آگ بجھانے میں مصروف ہیں۔ اس آگ کو علاقے میں تھامس فائر کے نام سے پکارا جاتا ہے۔  
image

فلسطین کے صدر محمود عباس نے  بیت المقدس بارے فیصلے کے بعد امریکی نائب صدر مائیک پینس کے روا ں  ہفتے پہلے دورے کے موقع پر الفتح کی جانب سے احتجاج کا اعلان کر دیا ۔ فلسطینی تنظیم الفتح کی جانب سے جاری بیان میں کہا گیا ہے کہ یروشلم اور اولڈ سٹی کے علاقے میں امریکی نائب صدر کے دورے اور ٹرمپ کے فیصلے کے خلاف ایک روزہ احتجاج کیا جائے گا ۔ الفتح کی جانب سے اعلان غزہ کی پٹی اور ویسٹ بینک میں احتجاج کے دوران اسرائیلی فوج سے جھڑپوں کے دوران جاں بحق ہونے والے افراد کی نماز جنازہ کے بعد کیا گیا۔ مظاہرین نے ٹرمپ مخالف نعرے لگائے اور غزہ سمیت پورے فلسطین میں اس فیصلے پر شدید احتجاج ریکارڈ کرایا  ۔ 
image

اقوام متحدہ کی سلامتی کونسل کے رکن ممالک کو ایک مجوزہ قرارداد کا مسودہ تقسیم کیا جا رہا ہے ، جس میں  کہا گیا ہے کہ یروشلم کی حیثیت پر یکطرفہ فیصلے کی کوئی قانونی اہمیت نہیں ۔ برطانوی خبر رساں ادارے کے مطابق مصر نے ایک صفحے پر مشتمل قرارداد میں ان اقدامات کو تجویز کیا ہے اور اس پر سلامتی کونسل  میں روا ں  ہفتے ووٹنگ کر سکتی ہے۔ سلامتی کونسل میں قرارداد کی منظوری کے لئے کم از کم 9 رکن ممالک اور پانچ مستقل ممالک کی حمایت درکار ہوتی ہے جبکہ مستقل ممالک امریکہ، چین، فرانس، برطانیہ اور روس میں سے کوئی بھی اسے ویٹو کر کے مسترد کر سکتا ہے۔ اس مجوزہ قرارداد کے مسودے میں تمام ریاستوں سے کہا جائے گا کہ وہ یروشلم میں اپنے سفارت خانے منتقل کرنے سے گریز کریں ۔ سفارت کاروں کا کہنا ہے کہ قرارداد کو سلامتی کونسل کے زیادہ تر رکن ممالک کی حمایت حاصل ہے لیکن امکان ہے کہ امریکہ قرارداد کو ویٹو کر دے گا۔ 
image

  فرانس کی جنوبی ریاست مارسیلیا میں حکام نے ایک مسجد کو انتہا پسندی اور نفرت کو ہوا دینے کے الزام میں بند کر دیا ۔ خبر رساں اداروں کے مطابق مارسیلیا کی ایک انتظامی عدالت نے مسجد کے امام و خطیب پر نمازیوں کو انتہا پسندی کی تعلیم دینے کے الزام میں امامت اور خطابت سے روک دیا  ، جامع مسجد السنہ کو گورنر پییر دارٹوت کی درخواست پر چھ ماہ کے لئے بند کیا گیا ہے ۔ مسجد کے امام  پر الزام ہے کہ اس نے اپنی تقاریر میں انتہا پسندانہ، امتیاز پر مبنی اور تشدد کی تبلیغ شروع کر رکھی تھی۔ فرانسیسی ذرائع ابلاغ کے مطابق مسجد کی نگران تنظیم کے وکیل فیلپ پیرولیر کا کہنا ہے کہ جن تقاریر کی بنا  پر مسجد کو بند کیا گیا ہے وہ نئی نہیں بلکہ  2013  کی ہیں، وہ عدالت کے فیصلے پر حیران ہیں کہ ایک پرانے واقعے پر مسجد کو سیل کیا گیا  ۔
image

امریکی صدر ٹرمپ کے فیصلے کے خلاف الجزائر جبکہ جرمنی کے شہر فرینکفرٹ میں ہزاروں افراد نے مظاہرہ کیا۔ میڈیا رپورٹس کے مطابق جرمنی کے شہر فرینکفرٹ میں ہزاروں افراد نے امریکی فیصلے کے خلاف پرامن مارچ کیا اور ٹرمپ کے خلاف نعرے لگائے۔ اس سے قبل برلن میں بھی مقبوضہ بیت المقدس کی حیثیت تبدیل کرنے کے خلاف ہزاروں افراد نے مظاہرہ کیا گیا۔ مزید برآں الجزائر میں بھی ہزاروں افراد نے امریکا کی جانب سے بیت المقدس و اسرائیلی دارالحکومت تسلیم کیے جانے کے فیصلے کے خلاف احتجاج کیا۔ احتجاج میں شریک افراد نے فلسطینی پرچم اٹھا رکھے تھے ۔
image

سعودی وزیر خارجہ عادل الجبیر نے کہا ہے کہ سعودی عرب نے اسرائیل کے ساتھ تعلقات استوار نہیں کیے ۔ فرانسیسی ٹی وی کو دیئے گئے ایک انٹرویو میں عادل الجبیر کا کہنا تھا کہ سعودی عرب القدس پر امریکی صدر کے فیصلے کی مذمت کر چکا ہے۔ اقوام متحدہ کی قراردادوں اور عرب امن فارمولے کے تحت2 ریاستی حل ضروری ہے جبکہ مشرقی القدس فلسطینی ریاست کا دارالحکومت ہوگا اور اس سے مختلف کوئی بھی بات معنی نہیں رکھتی۔
image

سعودی خواتین کو ڈرائیونگ کے بعد اب موٹرسائیکل اور ٹرک چلانے کی بھی اجازت مل گئی ہے۔ سعودی محکمہ ٹریفک پولیس کی جانب سے جاری کردہ بیان کے مطابق خواتین ٹریفک کے مطلوبہ قواعد و ضوابط کو پورا کرکے گاڑی کے ساتھ ساتھ موٹر سائیکل اور ٹرک بھی چلا سکیں گی۔ سعودی حکومت نے رواں سال ستمبر میں خواتین کو ڈرائیونگ کی اجازت دی ہے جس کے بعد اب نئے فرمان کے تحت جون 2018 سے خواتین لائسنس حاصل کرکے موٹرسائیکل اور ٹرک بھی چلا سکتی ہیں۔ حکم نامے میں کہا گیا ہے کہ پولیس سعودی مرد و خواتین کے لیے ڈرائیونگ کے یکساں ضابطے کو حتمی تشکیل دے رہی ہے جب کہ مرد وزن کی گاڑیوں پر مختلف نمبر پلیٹس نہیں ہوں گی بلکہ ایک جیسی نمبر پلیٹ کا اجرائ کیا جائے گا۔ واضح رہے کہ سعودی شاہ سلمان نے ستمبر2017میں انقلابی قدم اٹھاتے ہوئے خواتین کو گاڑی چلانے کی اجازت دینے کا فرمان جاری کیا تھا جو کہ جون 2018 سے نافذ العمل ہوگا۔ اس فرمان کے بعد خواتین ڈرائیونگ کی باقاعدہ تربیت حاصل کر رہی ہیں۔
image

امریکا کے صدر ڈونلڈز ٹرمپ نے کہا ہے کہ روس شمالی کوریا پر اپنا دبائو نہیں بڑھا رہا۔ عالمی برادری کو شمالی کوریا کے جوہری ہتھیار سازی کے سلسلے کو روکنے کے لیے روسی مدد کی اشد ضرورت ہے۔ غیرملکی خبر رساں ادارے کے مطابق وائٹ ہائوس میں رپورٹرز سے گفتگو کرتے ہوئے ٹرمپ نے واضح کیا کہ شمالی کوریا کے مسئلے کے حل کے سلسلے میں چین کی مدد جاری ہے لیکن روس تعاون سے گریز کر رہا ہے۔ انہوں نے کہا کہ عالمی برادری کو شمالی کوریا کے جوہری ہتھیار سازی کے سلسلے کو روکنے کے لیے روسی مدد کی اشد ضرورت ہے۔ امریکی صدر نے یہ بھی بتایا کہ شمالی کوریا کے موضوع پر انہوں نے اپنے روسی ہم منصب ولادیمیر پوٹن کے ساتھ جمعرات کو ٹیلی فون پر گفتگو بھی کی ہے۔
image

امریکی وزیر دفاع  جم میٹس نے میانمار میں روہنگیا مسلمانوں  کے ساتھ ہونے والے  ظلم  کیلئے خوفناک  کی اصطلاح استعمال کرتے ہوئے   علاقے میں پیش آنے والے المیہ کو نسل کشی سے تعبیر کرنے سے گریز کیا ہے۔غیر ملکی میڈیا کے مطابق امریکی  وزارت دفاع میں  اخباری نمائندوں کو بریفنگ دیتے ہوئے ماتھیس  نے روس  اور شمالی کوریا   کے ساتھ در پیش  تنا اور میانمارو شام کی صورتحال کے حوالے سے  صحافیوں کے سوالات کا جواب  دیا۔میانمار میں رائٹرز کے  ایک نمائندے  کی گرفتاری کے  حوالے سے ایک سوال کا جواب دیتے ہوئے   ماتھیس نے بتایا کہ میانمار فوج کا  انسانی حقوق   کا احترام نہ کرنا باعث تشویش ہے۔ان کا کہنا  تھا کہ  افواج میں انسانی حقوق کا معاملہ ایک ثقافتی  پہلو کی حیثیت رکھتا ہے، جس پر ہمیں کاربند ہونا چاہیے۔ماتھیس نے میانمار  کے واقعات کو  نسل کشی کے طور پر پیش کئے   جانے یا نہ کئے  جانے پر ایک سوال کے جواب میں کہا کہ  میں اس حوالے سے وزیر خارجہ ریکس ٹیلرسن کے  جائزوں   سے  اتفاق کرتا ہوں۔
image

جنوبی فرانس میں سکول بس اور ٹرین کے درمیان تصادم کے باعث5 بچے ہلاک اور 15 زخمی ہو گئے۔حادثہ پیرس سے 500 کلومیٹر دور پیرائے کے پہاڑی سلسلہ میں اس وقت پیش آیا جب سکول بس ٹرین سے ٹکرا گئی۔ زخمی ہونے والے طالب علموں کو قریبی ہسپتال منتقل کر دیا گیا ہے جہاں 7 کی حالت تشویشناک بتائی جاتی ہے۔ سکول بس میں20 طالب علم سوار تھے جو گھر جا رہے تھے۔ ریسکیو کارروائی جاری ہے۔
image

شمالی کوریا کے سرکاری ٹیلی ویږن نے سابق رہنما کم جونگ ال کی ایک تصویر نشر کی، جس میں وہ مبینہ طور پر ملک کے پہلے ایٹم بم کا معائنہ کرتے نظر آئے۔11 دسمبر کو اسلحہ سے متعلق ایک کانفرنس کے دوران شمالی کوریا کے سرکاری ٹی وی پر نشر کی گئی 30 منٹ کی ویڈیو میں دیوار پر لگی ایک تصویر میں سابق رہنما کم جونگ ال کو ایک ڈیوائس کا معائنہ کرتے دیکھا گیا۔ اس کانفرنس میں شمالی کوریا کے رہنما کم جونگ ان نے بھی شرکت کی۔برطانوی نشریاتی ادارے کی رپورٹ کے مطابق یہ تصویر اس سے قبل نہیں دیکھی گئی اور اگر یہ اصل ہے تو یہ ممکن ہے کہ یہ تصویر 2006 سے 2009 کے دوران لی گئی ہوگی جب شمالی کوریا نے متعدد جوہری تجربات کیے تھے۔ویڈیو میں اس تصویر کے ساتھ دیوار پر چند مزید تصاویر بھی دکھائی دیں جن کا مقصد شمالی کوریا کے اسلحہ پروگرام کی کامیابی کو نمایاں کرنا تھا۔
image

 برطانیہ کی وزیراعظم تھریسامے نے اپنے ملک کے یورپی یونین کے ساتھ بریگزٹ مذاکرات کی تکمیل کے بعد یونین کو چھوڑنے کی تاریخ کا اعلان کر دیا ہے۔برطانوی کے مطابق   29 مارچ 2019   کو برطانیہ پوری طرح یورپی یونین کو خیرباد کہہ دے گا۔ اپنے بیان میں تھریسامے کا یہ بھی کہنا تھا کہ انخلا کے بعد یورپی یونین اور برطانیہ کے ممکنہ تعلقات پر جلد بات چیت شروع کی جائے گی۔ اْن کے مطابق ابھی بہت سارے معاملات حل طلب ہیں اور وہ نہیں چاہتیں کہ لوگوں کے کاروبار اور زندگیوں کو مذاکراتی عمل سے متاثر کیا جائے۔
image

  صیہونی فورسز کی فائرنگ سے4 فلسطینی شہید جبکہ 160 افراد زخمی ہو گئے۔ اسماعیل ہانیہ نے بیت المقدس کی جانب مارچ کرنے کا اعلان کر دیا۔اسرائیلی فوجیوں کی غزہ کی پٹی اور مغربی کنارے پر فلسطینیوں پر فائرنگ اور امریکی صدر ڈونلڈ ٹرمپ کے مقبوضہ بیت المقدس کو اسرائیل کا دارالحکومت تسلیم کرنے کے فیصلے کے خلاف دنیا کے مختلف ملکوں میں احتجاج کیا گیا۔ترکی کے مختلف شہروں میں احتجاجی ریلیاں نکالی گئیں، جن میں اسرائیل اور امریکا مخالف نعرے لگائے گئے، اناطولیہ کے شہر کونیا میں ریلی کے شرکا سے صدر طیب اردوان نے ٹیلی کانفرنس کے ذریعے خطاب کیا۔ انہوں نے کہا ترکی اقوام متحدہ میں اسرائیل اور امریکا گٹھ جوڑ کے خلاف قرارداد پیش کرےگا۔جرمنی کے دارالحکومت برلن میں شہری بڑی تعدادمیں سڑکوں پر آ گئے۔ انہوں نے امریکا اور اسرائیل کےخلاف شدید احتجاج کیا۔ ادھر برازیل کے شہر ساؤ پاؤلو میں بھی فلسطینیوں کی حمایت میں مارچ کیا گیا۔ مظاہرین فلسطینی پرچم تھامے اسرائیل اور امریکا کے خلاف نعرے لگاتے رہے۔
image

امریکا نے ایک بار پھر ایران پر الزام عائد کرتے ہوئے کہا ہے کہ سعودی عرب کے شہروں پر جن میزائلوں سے حملہ کیا گیا وہ ایران نے فراہم کیے تھے۔  واشنگٹن میں ایک پریس کانفرنس کے دوران اقوام متحدہ میں امریکا کی مستقل نمائندہ نکی ہیلی کا کہنا تھا کہ گزشتہ ماہ یمن سے حوثی باغیوں نے سعودی عرب کے شہروں کو جن میزائلوں سے نشانا بنایا وہ ایران نے فراہم کیے تھے، نکی ہیلی نے واشنگٹن کے فوجی اڈے پر صحافیوں کو میزائل کی باقیات دکھاتے ہوئے کہا کہ ایران ہتھیاروں کے پھیلا سے متعلق اقوام متحدہ کی قرار دادوں پر عمل نہ کرکے خلاف ورزی کا مرتکب ہورہا ہے۔ اس سے قبل اقوام متحدہ کے اہلکاروں نے سعودی عرب کا دورہ کیا جہاں انہوں نے میزائل کے ٹکڑوں کا جائزہ لیا اور تحقیقاتی رپورٹ میں کہا کہ حوثی باغیوں کی جانب سے سعودی عرب پر حملے کے لیے داغے گئے میزائلوں کی ساخت یکساں ہیں۔ ان کے ٹکروں پر ایرانی کمپنی شاہد بغیری انڈسٹریل گروپ کے لوگو سے ملتا جلتا نشان تھا جسے اقوام متحدہ بلیک لسٹ کر چکی ہے۔
image

عراقی حکومت نے داعش سے تعلق رکھنے والے 38 جنگجوؤں کو پھانسی دے دی غیر ملکی خبر رساں ایجنسی رائٹر کے مطابق عراقی وزارت انصاف نے اپنے بیان میں کہا کہ ان تمام دہشت گردوں کو ناصر یہ شہر کی جیل میں پھانسی دی گئی، ان قیدیوں پر عدالت کی جانب سے دہشت گردی کے الزامات ثابت ہوچکے تھے اور بعد ازاں قانونی کارروائی کے بعد انہیں سزائے موت کا حکم سنایا گیا۔ وزارت انصاف نے مزید کہا کہ پھانسی پانے والے تمام مجرموں کا تعلق داعش سے تھا، مجرموں کی جانب سے سزا کے خلاف دائر کی گئیں تمام اپیلیں مسترد کردی گئی تھیں۔ خیال رہے کہ 24 ستمبر کو بھی عراقی حکومت نے 42 ملزمان کو دہشت گردی اور دیگر سنگین جرائم پر پھانسی پر لٹکا دیا تھا ان میں سیکیورٹی اہلکاروں پر حملے کرنے والے مجرمان بھی شامل تھے جب کہ چند روز قبل عراق کے وزیر اعظم حیدر العبادی نے پریس بریفنگ کے دوران اعلان کیا تھا کہ ہم نے ان تمام علاقوں کا کنٹرول واپس حاصل کرلیا ہے جن پر داعش نے قبضہ جما لیا تھا، شام کی سرحد سے متصل پورے علاقے پر ہماری افواج کا کنٹرول ہے اس لیے اب وہ گزشتہ 3 برس سے جاری اس جنگ کے خاتمے کا اعلان کرتے ہیں۔  
image

مقبوضہ کشمیر میں ایک اور حاضر سروس بھارتی فوجی نے خود کو گولی مار کر خود کشی کرلی۔ بھارتی میڈیا کے مطابق ضلع جموں میں پورا بارڈر میں تعینات لانس نائیک پرویش کمار مشرا نے  سرکاری رائفل سے خود کو گولی مار خود کشی کرلی۔34سالہ کمار کا تعلق 118میڈیم ریجمنٹ سے تھا اور پورا تھانے کی حدود میں واقع چھالا گائوں میں ڈیوٹی انجام دے رہا تھا۔ پولیس کا کہنا ہے کہ کمار نے اپنے سر میں دو گولیاں  مار کر زندگی کا خاتمہ کیا اور اس کی لاش ضابطے کی کارروائی کے بعد اہل خانہ کے حوالے کی جائے گی۔ واضح رہے کہ بھارتی فوج میں اہلکاروں کے خودکشی کرنے کا رجحان بڑھتا جارہا ہے اور وزارت دفاع کی ایک رپورٹ کے مطابق ہر 3دن میں ایک اہلکار خودکشی کرتا ہے۔رپورٹ میں بتایا گیا ہے کہ یکم جنوری 2014 سے 31 مارچ 2017 کے دوران تینوں مسلح افواج میں ہر 3 دن میں ایک فوجی نے خودکشی کی جب کہ خودکشی کرنے والے 80 فیصد اہلکاروں کا تعلق زمینی فوج سے ہے جن کی کل تعداد 276 بنتی ہے جب کہ اسی دوارنیے میں بحری فوج میں شامل 12 اہلکاروں نے خود اپنی جان لے لی۔
image

اسرائیلی وزیر برائے انٹیلی جنس اسرائیل کاٹز نے اس خواہش کا اظہار کیا ہے کہ اسرائیل اور فلسطین کے درمیان امن عمل میں سعودی عرب کو اپنا کردار ادا کرنا چاہئے۔ اسرائیلی وزیر برائے ٹرانسپورٹیشن اور انٹیلی جنس اسرائیل کاٹز نے عرب نیوز ویب سائٹ کو دیے گئے انٹرویو میں کہا ہے کہ وہ علاقائی امن چاہتے ہیں، اسرائیل فلسطین امن عمل کو آگے بڑھانے میں سعودی عرب کا کردار کلیدی ہوسکتا ہے اور یہ امن عمل میں اپنا کردار ادا کرنے کا بہترین موقع بھی ہے۔ اسرائیل کاٹز نے کہا کہ فلسطینی بہت کمزور ہیں اور انھیں سہارے کی ضرورت ہے، سعودی عرب، عرب دنیا کا سربراہ ہونے کی حیثیت سے اسرائیل اور فلسطین کے تنازع میں قائدانہ کردار ادا کر سکتا ہے، وہ تنازعات کے حل کے لئے سعودی ولی عہد شہزادہ محمد بن سلمان کو اسرائیل کے دورے کی دعوت دیتے ہیں جواب میں سعودی شاہ سلمان اسرائیلی وزیراعظم نیتن یاہو کو سرکاری طور پر ریاض آنے بھی دعوت دیں۔ واضح رہے کہ اسرائیل اور سعودی عرب کے درمیان سفارتی تعلقات نہیں ہیں اور سعودی حکومت اصولی طور پر فلسطین کے موقف کی تائید کرتا ہے۔
image

عوامی سروے

سوال: فاٹا اصلاحات بل حکومت کو منظورکرلینا چاہیئے؟