عالمی خبریں
افغانستان کے دارالحکومت میں2مختلف مساجد میں دھماکوں کے نتیجے میں 40 افراد جاں بحق جب کہ درجنوں زخمی ہوگئے ہیں۔ غیر ملکی خبر رساں ادارے کے مطابق افغانستان کے دارالحکومت کابل میں امام زمان مسجد میں خود کش بمبار گھس آیا جس نے نمازیوں پر کچھ دیر فائرنگ کی اور پھر خود کو دھماکے سے اڑا دیا جس کے نتیجے میں 30 افراد جاں بحق اور متعدد زخمی ہوگئے جنہیں فوری طور پر اسپتال منتقل کر دیا گیا۔ کابل دھماکے کے کچھ ہی دیر بعد افغانستان کے صوبے غور کی مسجد میں بھی خود کش دھماکے کے نتیجے میں 10 افراد جاں بحق اور متعدد زخمی ہوگئے ہیں۔ ترجمان افغان وزارت داخلہ کے مطابق سیکیورٹی فورسز جائے وقوعہ پر موجود ہیں جو دھماکے کی تحقیقات کر رہی ہیں۔ دوسری جانب شدت پسند تنظیم داعش نے دھماکے کی ذمہ داری قبول کرلی ہے۔ افغان صدر اشرف غنی نے واقعے کی مذمت کرتے ہوئے افسوس کا اظہار کیا ہے۔علاوہ ازیں پاک افغان سرحد کے قریب افغان علاقے خوش کرم میں امریکی ڈرون حملے کے نتیجے میں 12 افراد مارے گئے ہیں۔ نجی ٹی وی  نے ذرائع کے حوالے سے دعویٰ کیا ہے کہ خوش کرم میں امریکی ڈرون طیاروں نے شدت پسندوں کے ٹھکانوں کو نشانہ بنایا اور 6 میزائل داغے جن میں 12 افراد مارے گئے جبکہ شدت پسندوں کے 6 ٹھکانے بھی تباہ ہوئے ہیں۔ علاقے میں حملے کے بعد بھی تین ڈرون طیاروں کی پروازیں جاری ہیں جس کے باعث مقامی آبادی خوف میں مبتلا ہے۔  ذرائع نے مزید بتایا کہ پاک افغان سرحدی علاقوں میں گزشتہ 5 دنوں میں امریکہ کی جانب سے5 ڈرون حملے کیے جا چکے ہیں جن میں 47 افراد جان کی بازی ہار چکے ہیں۔  

مقبوضہ کشمیرمیں خواتین سمیت لوگوںنے پور ے مقبوضہ علاقے میں چٹیاکاٹنے کے بڑھتے ہوئے واقعات کے خلاف احتجاجی مظاہرے کئے۔ بھارتی فوجیوں اور پولیس اہلکاروںکی طرف سے مظاہرین پرطاقت کے وحشیانہ استعمال کی وجہ سے متعدد افراد زخمی ہوگئے۔کشمیرمیڈیاسروس کے مطابق احتجاجی مظاہروں کی کال سیدعلی گیلانی ، میر واعظ عمر فاروق اور محمد یاسین ملک پر مشتمل مشترکہ حریت قیادت نے دی تھی۔ کٹھ پتلی انتظامیہ نے سرینگر میں پابندیاں عائد کر کے جامع مسجد سیل کردی اور لوگوں کومسلسل چوتھے ہفتے بھی تاریخی مسجد میںنماز جمعہ اداکرنے کی اجازت نہیں دی ۔خواتین اور بچوں سمیت لوگ سرینگر،بڈگام ، گاندربل ،بانڈی پورہ ، حاجن ، اسلام آباد ، سوپور ،شوپیاں، کولگام،ترال ، پامپور اور دیگر علاقوں میں سڑکوں پر نکل آئے ۔ مظاہروں کی قیادت حریت رہنمائوں محمد یوسف نقاش ، حکیم عبدالرشید، مشتاق احمد صوفی اورشیخ عبدالرشید نے کی ۔ مظاہرین نے آزادی کے حق میں اور بھارت کے خلاف نعرے بلند کرتے ہوئے کٹھ پتلی انتظامیہ سے خواتین پر حملوں میں ملوث مجرموں کو بے نقاب کرنے کا مطالبہ کیا۔ مظاہرین نے چٹیا کاٹنے کے واقعات کو بھارتی خفیہ ایجنسیوں کی سرپرستی میں جاری ایک ساز ش قراردیا جس کا مقصد عوام خاص طورپر خواتین میں عدم تحفظ اور خوف کا احساس پید ا کرنا ہے ۔ بھارتی فوجیوں اور پولیس اہلکاروںنے سرینگر ، حاجن اور دیگر علاقوں میں مظاہرین کو منتشر کرنے کیلئے پیلٹ گن اور آنسو گیس کا بے دریغ استعمال کیا جس سے متعدد افراد زخمی ہو گئے۔کٹھ پتلی انتظامیہ نے میر واعظ عمر فاروق کو گھرمیں نظر بند کر دیا، جبکہ قاضی یاسر کو گرفتار کرلیا۔ سید علی گیلانی کو بھی بدستور گھر میں نظر بند رکھا گیا ہے۔ حریت رہنمائوںکی نظر بندی اور گرفتاری کا مقصد انہیں احتجاجی مظاہروںکی قیادت سے روکنا تھا۔ میر واعظ عمر فاروق کا ایک عوامی اجتماع سے خطاب کیلئے ضلع بڈگام کے علاقے چرار شریف جانے کا بھی پروگرام تھا۔ سیدعلی گیلانی ، میر واعظ عمر فاروق اور محمد یاسین ملک پر مشتمل مشترکہ مزاحمتی قیادت نے گزشتہ شام ایک اجلاس کے بعد جاری بیان میں چٹیا کاٹنے کی گھنائونی کارروائیوں کے خلاف کل مکمل ہڑتال کی کال دیتے ہوئے لوگوںسے اپیل کی ہے کہ وہ سول کرفیو نافذ کریں۔دریںاثنا چٹیا کاٹنے کے واقعات اور شہریوں پر قابض فوجیوں کے مظالم کے خلاف حضرت بل اور حاجن کے علاقوں میں ہڑتال کی گئی۔ سرینگر میں بھارتی پولیس کی طرف سے چلائے جانے پیلٹ لگنے کے باعث گیارھویں جماعت کے ایک طالب علم واحد منظور کی دائیں آنکھ ضائع  ہو گئی۔ یہ واقعہ اس وقت پیش آیا جب نوجوانوں کا ایک گروپ ڈل جھیل کے قریب چٹیا کاٹنے والے دو مجرموں کا تعاقب کر رہے تھے اور اس دوران پولیس نے ان پر پیلٹ برسائے۔  
image

  بھارت نے انڈرورلڈ ڈان دائود ابراہیم  کی بھارت میں موجود جائیداد کی دوبارہ نیلامی کا اعلان کرتے  ہوئے  اشتہار شائع کردیا ۔ تفصیلات کے مطابق مودی حکومت مسلسل دائود ابراہیم کا پیچھا کررہی ہے۔  اس  نے برطانیہ سے بھی اس پر معاشی پابندیوں کا مطالبہ کیا تھا، جس کے بعد  گزشتہ ماہ برطانوی حکومت نے انڈرورلڈ ڈان کے 40ہزار کروڑ روپے کے اثاثوں کو ضبط کرلیا تھا ، اب بھارتی حکومت کے ہدف پر ملک میں دائود کی ملکیت ہے ۔ بھارتی وزارت خارجہ نے فیصلہ کیا ہے کہ بھارت میں دائودابراہیم کی ملکیت کی نیلامی دوبارہ کی جائے،اس ضمن میں اشتہار شائع کر دیا گیا ہے۔
image

 بھارتی ریاست تامل ناڈو میں سرکاری عمارت منہدم ہونے کے نتیجے میں کم ازکم 8 افراد ہلاک ہو گئے ۔سرکاری  حکام نے ذرائع ابلاغ کو بتایا کہ یہ واقعہ  اس وقت پیش آیا جب عمارت میں متعدد ٹرانسپورٹ ورکرز سو رہے تھے۔ طبی ذرائع کے مطابق ہلاک ہونے والوں میں 7 ڈرائیورز اورایک بس کنڈیکٹر تھا۔ واضح رہے کہ یہ عمارت ٹرانسپورٹ ورکرز کے لئے مختص تھی۔ حکام نے حادثہ کی وجوہات جاننے کی خاطر تفتیشی عمل شروع کر دیا ہے۔  
image

 میانمار میں پولیس کی فائرنگ کے نتیجہ میں5 افراد ہلاک جبکہ 20 زخمی ہو گئے ۔مقامی حکام کے مطابق کچھ مسلح افراد  علاقے میں قیمتی پتھروں کی کان میں زبردستی  داخل ہونا چاہتے تھے جس پر پولیس نے انہیں روکنے کی خاطر ان پر فائرنگ کر دی۔ پولیس کے مطابق ان لٹیروں نے پہلے پولیس پر حملہ کیا جس پر پولیس نے جوابی کارروائی کرتے ہوئے5افراد کو ہلاک کردیا۔  
image

جرمن چانسلر انجیلا مرکل نے ترکی کے لئے یورپی یونین کے فنڈز میں کٹوتی  کا مطالبہ کر دیا ۔ غیر ملکی خبررساں ادارے کے مطابق انقرہ  اور برلن کے درمیان حالیہ تلخی  کے بعد جرمن چانسلر نے صحافیوں کے ساتھ بات چیت کرتے ہوئے کہا کہ یورپی یونین  کا اپنی اقدار کے دفاع کے لئے اتحاد کا مظاہرہ کرنا انتہائی اہم ہے انہوں نے کہا کہ وہ یورپین یونین کو دی جانے والی پری رکنیت فنڈنگ میں کمی کے لئے کام کر رہی ہیں اور یہ ان کا مرکزی مطالبہ ہے جس پر وہ یورپی یونین سے مشترکہ اقدام کا مطالبہ کر رہی ہیں انہوں نے کہا کہ ترکی میں قانون کی حکمرانی ہماری رائے کو غلط سمت لے جا رہا ہے اور اس پر ہمارے کچھ خدشات ہیں کیونکہ بڑی تعدادمیں جرمن شہریوں کو گرفتار کیا جا چکا ہے ۔
image

آئی اے ای اے نے ایران پر ایٹمی ڈیل کی خلاف ورزی کا امریکی دعویٰ مسترد کرتے ہوئے کہا ہے کہ ایران کے رویے میں کوئی تبدیلی نہیں ہوئی ہے۔ سربراہ بین الاقوامی ایٹمی توانائی ایجنسی یوکیاامانو نے بتایا کہ ایرانی محتاط ہیں اور ہم کسی مشکل کے بغیر تصدیق کا عمل جاری رکھے ہوئے ہیں ، ایران مشترکہ جامع پلان آف ایکشن پر اپنے وعدوں پر عمل کر رہا ہے، ایران میں تمام مقامات تک رسائی حاصل ہے، ٹرمپ کی مخالفت کے باوجود آئی اے ای اے اور  فرانس نے نیو کلیئر ڈیل پر ایران کا ساتھ دینے کا اعلان کیا ہے ۔ علاوہ ازیں ایک تقریب میں فرانسیسی وزیر خارجہ نے کہا کہ  آئی اےای اے کے سبب ہم ایران ڈیل بارے فکر مند نہیں ہیں، ایران کے بیلسٹک میزائل پروگرام، شام میں فوجی کارروائی پر تحفظات ہیں مگر یہ ڈیل کا حصہ نہیں۔
image

روسی صدر ولادی میر پیوٹن نے شام کے تمام نمائندہ دھڑوں پر مشتمل کل جماعتی کانفرنس بلانے کی تجویز دے دی۔ ایک بیان میں صدر پیوٹن نے کہا کہ امریکا اور روس شام میں مستحکم انداز میں تعاون جاری رکھے ہوئے ہیں ، شام میں مشکلات کے باوجود امن کی بحالی میں اہم پیش رفت ہو رہی ہے، ہمیں پورا یقین ہے کہ ہم شام میں دہشت گردوں کو جلد شکست فاش سے دوچار کریں گے۔ انہوں نے تسلیم کیا کہ شامی حکومت اور اپوزیشن کے درمیان مذاکرات سست روی کا شکار ہیں۔ ایک سوال کے جواب میں روسی صدر نے امریکا کی جانب سے شمالی کوریا کے جوہری ہتھیاروں کو تباہ کرنے کے لئے ممکنہ دفاعی حملے پر شک کا اظہار کرتے ہوئے کہا کہ اس وقت عالمی منڈی میں تیل کی قیمت 50 ڈالر فی بیرل ہے،  یہ قیمت متوازن اور مناسب ہے۔ علاوہ ازیں جرمن نشریاتی ادارے کے مطابق  روس کے صدر ولادی میر پیوٹن نے کہا کہ روس شمالی کوریائی جوہری تجربات کی مذمت کرتا ہے ، کوریائی جزیرہ نما کو جس بحران کا سامنا ہے، اسے مذاکرات سے حل کرنے کی ضرورت ہے ، شمالی کوریا کو ایک کونے میں لا کھڑا کرنا بھی مسئلے کا حل نہیں اور اسی طرح طاقت کے استعمال سے بھی بہتری ممکن نہیں۔ 
image

ڈونلڈ ٹرمپ نہ صرف غلط سیاسی فیصلوں اور اشتعال انگیز بیانات بلکہ خواتین کے ساتھ اپنائے جانے والے رویے کی وجہ سے بھی خبروں میں رہتے ہیں ، تاہم اب کے بار ان کے خبروں میں زینت بننے کا سبب ان کا کوئی غلط فیصلہ یا اشتعال انگیز بیان نہیں بلکہ ان کی اہلیہ میلانیا ٹرمپ جیسی ایک اور خاتون کا ان کے ساتھ ہونا ہے۔ میڈیا کے کئی لوگ رواں برس فروری سے پریشان تھے کہ ڈونلڈ ٹرمپ اور ان کی اہلیہ میلانیا ٹرمپ کے ساتھ میلانیا ٹرمپ سے مشابہہ تیسری خاتون کون ہیں؟ بعض تصاویر میں میلانیا اور سیکرٹ سروس ایجنٹ میں نمایاں فرق ہے، سیاہ یا بلیو نیوی تھری پیس سوٹ میں ملبوس، ہمیشہ آنکھوں پر سیاہ چشمہ سجا کر ڈونلڈ ٹرمپ اور میلانیا ٹرمپ کے ساتھ چلنے والی اس خاتون کی شکل و صورت دیکھ کر کئی لوگ کئی ماہ تک پریشان رہے۔ پہلے تو لوگوں کا خیال تھا کہ ڈونلڈ ٹرمپ نے کسی حکمت عملی کے تحت میلانیا ٹرمپ جیسی ہی ایک اور خاتون اپنے ساتھ رکھی ہے۔ تاہم بعد میں پتہ چلا کہ میلانیا ٹرمپ کی مشابہہ خاتون دراصل سیکرٹ سروس ایجنٹ ہیں، جو صدر کے سکیورٹی پروٹوکول ٹیم کا حصہ ہیں۔ ڈونلڈ ٹرمپ اس حوالے سے خوش نصیب ہیں کہ انہیں بیک وقت سکیورٹی کے لیے تقریباً ایک جیسی صورت رکھنے والی 2 الگ الگ خواتین کا ساتھ میسر ہوتا ہے۔ ایک طرف خاتون اول میلانیا ٹرمپ جہاں اپنے شوہر کو مختلف غیر ملکی دوروں کے دوران محفل میں لوگوں سے ملنے اور ان سے گفتگو کرنے کے طریقے سکھاتی رہتی ہیں تو وہیں میلانیا جیسی ہی ایک اور خاتون ان کی سکیورٹی کے لیے مصروف عمل رہتی ہیں۔ میلانیا کی ہم شکل سیکرٹ سروس ایجنٹ خاتون کو دیکھ کر پہلے پہل تو امریکی سینیٹرز اور اعلیٰ عہدیدار بھی چکرا گئے تھے، لیکن بعد ازاں سب کو پتہ چل گیا کہ ڈونلڈ ٹرمپ کے ساتھ ان کی اہلیہ کی ہم شکل نظر آنے والی خاتون در اصل ان کی سکیورٹی ٹیم کا حصہ ہیں ، کہا جا رہا ہے کہ میلانیا ٹرمپ کی ہم شکل سیکرٹ سروس ایجنٹ خاتون متعدد بار ڈونلڈ ٹرمپ کے ساتھ خاتون اول کی حیثیت سے بھی تقریبات میں شامل ہوئی۔
image

 بھارتی ریاستوں تلنگانہ اور آندھرا پردیش میں گزشتہ دو ماہ سے بھی کم عرصہ کے دوران 50 طلبہ نے اپنی جانوں کو خود اپنے ہی ہاتھوں سے ختم کر کے موت کو گلے لگا لیا ۔ بھارتی میڈیا رپورٹس کے مطابق  ایسا ہی ایک واقعہ رواں ہفتے پیش آیا ، خود کشی کرنے والی ایک طالبہ سمیوکتا  نے اپنی آخری تحریر میں واضح لکھا تھا کہ وہ پڑھائی کے دبائو کو برداشت نہیں کر پا رہی ہے۔ خود کشی کرنے والی سمیوکتا کے والد پیشہ کے اعتبار سے ڈرائیور ہیں، ان کا خواب تھا کہ ان کی بیٹی ڈاکٹر بنے۔ خودکشی کے واقعات کی جانچ پڑتال کرنے والی تنظیم  چائلڈ رائٹس ایکٹویٹس نے اپنی رپورٹ میں تعلیمی نظام کو ہی مورد الزام قرار دیا ہے۔
image

شمالی کوریا نے آسٹریلیا کو دھمکی آمیز خط لکھا ہے ، جس میں کہا گیا ہے کہ آسٹریلیا یا تو واشنگٹن سے تعلقات منقطع کرے یا سنگین نتائج بھگتنے کے لئے تیار رہے ۔شمالی کوریا کی جانب سے آسٹریلیا کے نام بھجے گئے کھلے خط کے متن کے مطابق امریکی صدر ڈونلڈ ٹرمپ شمالی کوریا کو تباہ کرنے اور کم جونگ ان حکومت کا تختہ الٹنا چاہتے ہیں ، ٹرمپ کی بھول ہے  اگر وہ یہ سمجھتے ہیں کہ شمالی کوریا کوقدموں میں گرا لیں گے، ایٹمی طاقت کے متعلق  ایسا تصور جہالت پر مبنی ہوگا، ٹرمپ کی گیدڑ بھبھکیوں سے خو فزدہ ہو نے والے نہیں، امر یکہ کی کسی بھ اشتعال انگیزی کا منہ تو ڑ جو اب دیا جائے گا  اور اس حوالے سے کسی شک و شبہ  میں نہیں رہنا چا ہئے ۔ دوسری جانب آسٹریلوی وزیر خارجہ جولی بشپ نے بتایا کہ شمالی کوریا کی جانب سے بھیجے جانے والا خط اس بات کا اظہار ہے کہ شمالی کوریا پر پابندیاں کام کر گئی ہیں اور وہ خود کو تنہا محسوس کر رہا ہے اور  خط کا مقصد عالمی برادری کو تقسیم کرنے کی کوشش کرنا ہے۔  
image

یمن میں امریکی ڈورن حملوں میں القاعدہ گروپ کے 5دہشت گرد ہلاک ہوگئے ۔ سکیورٹی حکام کے ایک عہدیدار نے نام نہ ظاہر کرنے کی شرط پر بتایا کہ صوبہ البیدہ کے پہاڑی علاقے ثرقان میں امریکی ڈرون حملوں میں القاعدہ گروپ کی ایک گاڑی کو نشانہ بنایا گیا ، جسکے نتیجے میں القاعدہ کے 5دہشتگرد ہلاک ہوگئے  ، امریکی فضائیہ نے  القاعدہ کے عسکریت پسندوں کو واضح طور پر نشانہ بنایا ہے جو قبائلی خطے میں واقع ان کے خفیہ ٹھکانوں میں منتقل ہوئے تھے  ۔ 
image

 ترکی کے صدر رجب طیب اردوان نے کہا ہے کہ دہشت گرد تنظیموں بوکو حرام، فیتو اور داعش کے درمیان کوئی فرق نہیں۔ نائیجیریا کے صدارتی محل میں صدر محمدو بخاری کے ساتھ ملاقات کے بعد  مشترکہ پریس کانفرنس سے خطاب کرتے ہوئے ترک صدر نے کہا کہ ہم دہشت گرد تنظیم فیتو کے خلاف جدوجہد  میں نائیجیریا سے تعاون کی توقع رکھتے ہیں ،  بوکو حرام، فیتو اور داعش نامی تمام تنظیمیں معصوموں کے خون سے پلنے والے قاتلوں کے گروہ ہیں ، نائیجیریا کی ترقی میں ترک انٹرپرائزز حصہ لینے  کے لئے تیار ہے اور ترکی کی تعاون و ترقیاتی ایجنسی  تیکا نائیجیریا میں دفتر کھولنے کو بھی تیار ہے ، اس موقع پر نائیجیرین ہم منصب نے کہا کہ وہ مہمان صدر کے ساتھ ملاقات میں دفاع اور تعلیم سمیت دیگر متعدد شعبوں میں تعاون کیلئے تیار ہیں۔  
image

مقبوضہ کشمیر میں بھارتی فورسز اور فوجی تنصیبات پر حملوں کے پیش نظر بھارتی فوج اور سنٹرل ریزرو پولیس فورس نے پورے مقبوضہ کشمیر خاص طور پر وادی کشمیر میں فوجی وردیوں کی خریدوفروخت پر پابندی عائد کرنے کا مطالبہ کر دیا ۔ مقبوضہ کشمیر میں تعینات بھارتی فوج اور سی آر پی ایف کی طرف سے وزارت داخلہ اور وزارت دفاع کو تحریری طورپر آگاہ کیا گیا ہے کہ مقبوضہ علاقے میں بھارتی فورسز پر بڑھتے ہوئے حملوں کے پیش نظر مقبوضہ علاقے میں فوجی وردیوں کی خرید و فروخت پر پابندی عائد کی جانی چاہئے ۔ میمورنڈم میں دونوں وزارتوں کی توجہ ان ویڈیو کلپس کی طرف بھی مبذول کرائی گئی ہے جن میں فوجیوں وردیوں میں ملبوس حملہ آوروں نے بھارتی فورسز کو نشانہ بنایا۔ نئی دلی میں ایک اعلیٰ فوجی افسر نے میڈیا کو بتایا ہے کہ ہم نے حال ہی میں ایک ویڈیو دیکھی ہے جس میں حملہ آوروں نے فوجی وردیاں پہن رکھی ہیں۔ یہ امر قابل ذکر ہے کہ بھارتی حکومت کی طرف سے فوجی وردیوں پر پابندی کے باوجود یہ وردیاں بازاروں میں آسانی سے دستیاب ہیں۔ سی آر پی ایف کے ایک افسر نے بتایا کہ فوجی وردیوں کی خرید و فروخت پر عائد پابندی پر عمل درآمد کرانا کٹھ پتلی انتظامیہ کا کام ہے فورسز کا نہیں ۔
image

مقبوضہ کشمیر میں کٹھ پتلی انتظامیہ نے خواتین کی چٹیا کاٹنے کے بڑھتے ہوئے واقعات کے خلاف احتجاجی مظاہرے روکنے کیلئے سرینگر میں پابندیاں نافذ کر دیں۔ میڈیا رپو رٹ  کے مطابق نماز جمعہ کے بعد احتجاجی مظاہروں کی کال سید علی گیلانی ، میر واعظ عمر فاروق اور محمد یاسین ملک پر مشتمل مشترکہ مزاحمتی قیادت نے دے رکھی تھی۔ انتظامیہ نے نوہٹہ، خانیار، رینہ واری، مہاراج گنج، صفاکدل ، کرالہ کھڈ اور مائسمہ تھانوں کی حدود میں آنے والے علاقوں میں پابندیاں لگا دیں۔ پابندیوں کی وجہ سے ان علاقوں میں دکانیں اور دیگر کاروباری مراکز کے علاوہ تعلیمی ادارے بند بھی بند ہیں جبکہ سڑکوں پر ٹریفک معطل ہے۔ دریں اثنا انتظامیہ نے حریت فورم کے چیئرمین میر واعظ فاروق کو چرار شریف جانے سے روکنے کے لیے سرینگر میں گھر میں نظر بند کر دیا۔ 
image

  کنٹرول لائن  کے دونوں جانب موجود سویلین اور فوجی حکام نے غیر معمولی طور پر ہمدردی کا مظاہرہ کرتے ہوئے ایک خاتون کی موت کے 12 گھنٹوں کے اندر اندر ان کی میت آزاد جموں و کشمیر سے ہندوستان کے زیر انتظام کشمیر منتقل کر دی۔ سلیمہ بی بی، اپنے شوہر غلام حسن پنڈٹ کے ہمراہ رواں ماہ 2 اکتوبر کو اپنے بہنوئی خواجہ محمد یوسف زرگر کی وفات پر تعزیت کے لیے چکوٹھی، اڑی سیکٹر کے ذریعے مظفر آباد آئی تھیں۔ مذکورہ جوڑے نے   16 اکتوبر کو سوپور میں واقع اپنے گھر واپسی کا ارادہ کیا، لیکن لائن آف کنٹرول کے اس  پار دیوالی کی چھٹیوں کے باعث تجارتی اور سفری سرگرمیوں کی معطلی کی وجہ سے انہیں انتظار کرنا پڑا۔ 18 اکتوبر کو سلیمہ بیگم کو ہاتھ میں درد اٹھا اور انہیں مظفر آباد کے شیخ خلیفہ بن زید النیہان ہسپتال میں داخل کیا گیا، جہاں دل کے شدید دورے کے باعث وہ  19 اکتوبر کی صبح انتقال کر گئیں۔ اس طرح کے کیسز میں عموماً میت کی دوسری جانب منتقلی میں ضروری کارروائیوں کے باعث 24 سے 48 گھنٹے کا وقت لگتا ہے تاہم مرحومہ کے بھانجے خواجہ عامر زرگر کے بقول سلیمہ بیگم کی میت کی منتقلی ان کے انتقال کے 12 گھنٹوں کے اندر اندر ہوگئی، جس کے لیے دونوں طرف کے حکام سے خصوصی اجازت لی گئی۔ انہوں نے  بتایا ہم نے یہاں حکام سے رابطہ کیا اور ہمارا خیال تھا کہ یہ کام جمعے تک ہوگا، لیکن ان کی ہمدردی اور خصوصی دلچسپی کی وجہ سے ہم جمعرات کو سہ پہر 3 بجے ہی میت کو منتقل کرنے میں کامیاب ہوگئے ۔  
image

امریکی خفیہ ایجنسی سی آئی اے نے انکشاف کیا ہے کہ گذشتہ ہفتے بازیاب کروائے گئے غیر ملکی خاندان کو پانچ سال تک پاکستان میں ہی رکھا گیا تھا۔واشنگٹن میں ایک تھنک ٹینک فائونڈیشن فار ڈیفنس آف ڈیموکریسیز میں خطاب کرتے ہوئے سی آئی اے کے ڈائریکٹر مائک پاؤمپے نے کہا کہ گذشتہ ہفتے ایک انتہائی اچھا نتیجہ نکلا ہے جب ہم چار امریکی شہریوں کو بازیاب کروا سکے ہیں، جنہیں پانچ سال تک پاکستان میں رکھا گیا تھا۔انھوں نے کہا کہ تاریخ ہمیں یہ بتاتی ہے کہ افغانستان میں پاکستان کے حوالے سے ہمیں توقعات کم رکھنی چاہئیں۔ان افراد کو 2012 میں افغانستان میں اغوا کیا گیا تھا۔ اطلاعات کے مطابق ان مغوی افراد کو افغانستان سے پاکستان منتقل کیا جا رہا تھا اور اس دوران امریکی انٹیلیجنس کی مدد سے پاکستانی فوج نے سرحدی علاقے میں کارروائی کر کے انہیں بازیاب کروایا ، اس فیملی کو پانچ سال تک پاکستان میں رکھا گیا تھا ۔ انہوں نے افغانستان کی صورتحال بارے کہا کہ امریکہ وہ تمام کوششیں کر رہا ہے جس سے افغان طالبان مذاکرات کی میز پر آ جائیں اور طالبان کو یقین ہو جائے کہ وہ یہ معاملہ میدانِ جنگ میں فتح سے حل نہیں کر سکتے۔اس کے علاوہ مائک پاؤمپے نے ایران اور القاعدہ کے درمیان تعلقات کے تناظر میں یہ بھی کہا کہ آئندہ چند روز میں امریکی حکومت 2011 میں ایبٹ آباد میں ہونے والی کارروائی بارے دستاویزات بھی جاری کرے گی۔ علاوہ ازیںسی آئی اے کے چیف مائیک بومبیو نے واشنگٹن میں ایک پریس کانفرنس میں الزام عائد کیا کہ ایران القاعدہ جیسی دہشت گرد تنظیموں کے ساتھ مل کر کام کرتا رہا ہے، سی آئی اے عنقریب القاعدہ اور ایران کے باہمی گٹھ جوڑ کا پردہ چاک کرے گی، صدر ڈونلڈ ٹرمپ نے سکیورٹی اداروں کو ایران سے نمٹنے کے لیے وسیع تراقدامات کی اجازت دے رکھی ہے۔ اس موقع پرامریکی قومی سلامتی کے مشیر جنرل میکس ماسٹر نے کہا کہ ایرانی سرگرمیوں سے نمٹنے کے لیے اختیار کردہ حکمت عملی کو تمام ممکنہ اور دستیاب وسائل کے ذریعے مکمل کیا جائے گا ،عراق کو ایک طاقت ور ملک دیکھنا چاہتا ہے، جس پر ایران کا کوئی دبائو اور اثرو رسوخ نہ ہو۔ امریکا ایران کو شام میں بشار الاسد کے زیرانتظام علاقوں میں تعمیر نو سے بھی روکے گا، نیز امریکا ایرانی پاسداران انقلاب کے مالی ذرائع کی روک تھام کے لیے بھی تمام وسائل استعمال کرے گا۔ 
image

 امریکا کی سیکریٹری برائے سلامتی الین ڈیوک کا کہنا ہے کہ داعش اور القاعدہ نائن الیون طرز کے حملوں کی منصوبہ بندی کر رہے ہیں۔ برطانیہ میں اپنی ہم منصب امبرروڈ سے ملاقات کے بعد میڈیا سے گفتگو کرتے ہوئے الین ڈیوک کا کہنا تھا کہ 11ستمبر2001 میں القاعدہ نے مسافر جہاز کو جس طرح دہشت گردی کےلیے استعمال کیا وہ ناقابل فراموش ہے اس حملے میں تقریبا 3 ہزار سے زائد لوگ مارے گئے تھے۔ ان کا کہنا تھا کہ دہشت گرد گروپ اپنی شناخت برقرار رکھنے کےلیے مختلف علاقوں میں چھوٹے چھوٹے حملے کر رہے ہیں  یہ چھوٹے حملے کسی بھی وقت بڑے حملوں میں تبدیل ہوسکتے ہیں۔ امریکی وزیر برائے سلامتی کا کہنا تھا کہ دہشت گرد دنیا میں دہشت کا ماحول قائم رکھنا چاہتےہیں جس کے لیے نائن الیون طرز کے حملے کی منصوبہ بندی کر رہے ہیں۔ انہوں نے کہا کہ  دہشت گردی اور پروپیگنڈا کو روکنے کےلیے انٹرنیٹ کو کنٹرول کرنا بہت ضروری ہے جس کےلیے ضروری اقدامات کئے جارہے ہیں۔ الین ڈیوک نے کہا کہ  اس حوالے سے سوشل میڈیا کی کمپنیوں کے ساتھ جی سیون وزرائے داخلہ کے ساتھ ملاقات نہایت فائدہ مند ثابت ہوئی ہے، انہوں نے دہشت گردی کے خلاف عزم کا اعادہ  کرتے ہوئے کہا کہ دہشت گردی کے خلاف وہ سب کیا جائےگا جس کی ضرورت ہوگی۔
image

پاک افغان سرحدی علاقے میں افغانستان کی حدود میں امریکی ڈرون حملے میں چار افراد ہلاک ہوگئے  ۔  افغان میڈیا  مطابق افغان سرحدی علاقے جاوارے سر میں امریکی ڈرون حملہ کیا گیا ، جس میں شدت پسندوں کے ٹھکانوں کو نشانہ بنایا گیا ہے ، ڈرون طیاروں نے ایک مقام پر دو میزائل فائر کئے جس سے 4 افراد ہلاک ہوئے ۔  
image

 انٹر پارلیمنٹری کانفرنس  میں  کویتی  سپیکر نے اسرائیلی  نمائندے کو خوب جھاڑ پلاتے  ہوئے کہا  کہ  اسرائیل ریاستی دہشتگردی کرنے والا ملک، قابض اور بچوں کا قاتل ہے  ، کمرے سے نکل جائو ۔ کویت کی تقریر کے بعد اسرائیل کے نمائندے کانفرنس سے واک آئوٹ کر گئے، ان کی تقریر کے دوران اسرائیلی نمائندے کی صورت دیکھنے سے تعلق رکھتی تھی۔ سوشل میڈیا پر بھی صارفین نے مرزوق الغانم کی اس تقریر کی خوب پذیرائی کی۔ یاد رہے کہ 2014 کی اسرائیل فلسطین جنگ میں اسرائیل نے غزہ کے 550 سے زائد بے گناہ بچوں کا قتل عام کیا تھا۔    
image

اقوام متحدنے اپنی ایک رپورٹ میں بتایا ہے کہ دنیا بھر میں آنے والی قدرتی آفات سے سالانہ بنیاد پر 14 لاکھ افراد بے گھر ہو جاتےہیں۔  یہ اعداد و شمار قدرتی آفات کے خطرات پر نگاہ رکھنے والے اقوام متحدہ کے ادارے  یو این آئی ایس ڈی  آر  نے مرتب کیے ہیں۔ ادارے کے مطابق ایسی آفات کے زمرے میں  زلزلے ، سمندری طوفان، شدید بارشیں، سیلاب، سونامی وغیرہ شامل ہیں۔ تقریبا 14 ملین متاثرین میں سے 60 فیصد کا تعلق براعظم ایشیا سے ہے۔ اسی طرح قدرتی آفات سے سب سے زیادہ  متاثرہ 10 ممالک میں سے 8 جنوبی اور جنوب مشرقی ایشیا میں ہیں۔ بھارت اور چین کے لاکھوں انسانوں کو ہر سال بارشوں اور سیلابوں سے بے گھری کا سامنا رہتا ہے۔  
image

سعودی عرب میں اقوام متحدہ کے ماتحت ایف اے او کے نمائندے ڈاکٹر ابوبکر عبدالعزیز محمد نے کہا  ہے کہ سعودی عرب پناہ گزینوں کی سب سے زیادہ مدد کرنے  والا ملک  ہے۔ سعودی ذرائع ابلاغ کے مطابق مملکت نے 2014 کے دوران 80 سے زیادہ ممالک کو 54 ارب ریال سے زیادہ کی انسانی اور ترقیاتی مدد فراہم کی۔ یہ سعودی عرب کی مجموعی قومی آمدنی کا 1.9فیصد سے زائد بنتا ہے۔ دنیا کے کسی بھی ملک نے اپنی مجموعی قومی آمدنی کا اتنا بڑا حصہ امداد پر صرف نہیں کیا۔ عالمی تنظیم ایف اے او نے گزشتہ روز الخرج میں 37واں عالمی یوم خوراک منایا۔ ابوبکر نے اس موقع پر اپنے خطاب میں کہا کہ 150ممالک نے عالمی یوم خوراک منایا۔ الفائو کے قیام پر 72برس گزر چکے ہیں۔ انہوں نے توجہ دلائی کہ عالمی اعداد و شمار کے مطابق خانہ جنگیوں ، غربت اور قحط سالی کے باعث نقل مکانی کا رواج بڑھ رہا ہے۔ تقریباً 244 ملین پناہ گزین دنیا بھر میں موجود ہیں جبکہ 763 ملین لوگ اپنے اپنے ملک میں اپنی بستیوں سے نقل مکانی پر مجبور ہوئے ہیں۔ 65 ملین ایسے ہیں جنہیں زبردستی بستیاں چھوڑنے پر مجبور کیا ہے۔ دیہی علاقوں سے نقل مکانی کرنیوالے 75فیصد سے زیادہ ہیں جبکہ32لاکھ سیاسی پناہ گزین ہیں۔  
image

بھارتی ریاست اڑیسہ کے ضلع بیلاسور میں پٹاخے اور آتش بازی کا دوسرا سامان بنانے والے  کارخانہ میں آتشزدگی سے 8 کارکن ہلاک اور متعدد دیگر افراد زخمی ہو گئے  و بھارتی میڈیا کی رپورٹس کے مطابق  ایک گھر میں غیر قانو نی طور پر قائم کارخانہ میں آتش بازی کا سامان تیار کیا جا رہا تھا کہ اسی دوران  زوردار دھماکہ کے بعد آگ لگ گئی جسکی زد میں آکر 8 کارکن ہلاک ہو گئے  جبکہ 20دیگر افراد زخمی ہوئے ۔ مقامی حکام نے بتایا کہ آتش بازی کے اس کارخانے میں دھماکہ اور آتشزدگی کی وجوہات کا تعین کرنے کے لئے تحقیقات جاری ہیں ۔ 
image

امریکی وزیر خارجہ ریکس ٹیلرسن نے کہا ہے کہ کہ نئی جنوبی ایشیائی پالیسی یہ پیغام ہے کہ جتنا عرصہ درکارہو اہم یہاں موجود رہیں گے۔امریکی وزیرخارجہ ریکس ٹیلرسن نے سینٹر فار اسٹریٹجک اینڈ انٹرنیشنل اسٹڈیز میں خطاب کرتے ہوئے کہا کہ  طالبان اور دیگر جان لیں کہ ہم کہیں نہیں جارہے۔ امریکی وزیر خارجہ نے کہا کہ افغانستان کو علاقائی مسئلے کے طور پر دیکھتے ہیں اور چیلنجز کو دور کرکے ان کا حل چاہتے ہیں جب کہ افغانستان کے معاملے میں پاکستان اور بھارت اہم عناصر ہیں، بھارت کا اہم کرداریہ ہے کہ وہ افغانستان میں ترقیاتی امور میں مدد کرے۔ ٹیلرسن کا کہنا تھا کہ جنوبی ایشیا میں استحکام سے متعلق امریکی پالیسی میں بھارت اور پاکستان اہم ہیں، بھارت اور پاکستان سے قریبی تعلق کے ساتھ کام کرنا چاہتے ہیں کیونکہ افغانستان کا مستحکم ہونا پاکستان اور بھارت کے تعلقات بہتر ہونے کی فضا پیدا کرے گا۔ انہوں نے مزید کہا کہ پاکستان کی 2 سرحدوں پر کشیدگی ہے اور دونوں کو کم کرنے میں مدد دینا چاہتے ہیں، امید ہے کہ بھارت اور پاکستان کی سرحدوں پر کشیدگی کم ہوگی۔
image

امریکی شہر بالٹی مور کے بزنس پارک میں فائرنگ سے تین افراد ہلاک اور دو زخمی ہوگئے۔ فائرنگ کا واقعہ بالٹی مور کے شمالی مشرقی علاقے میں پیش آیا، زخمیوں کی حالت تشویشناک ہے۔حملہ آور کی شناخت ریڈی لبیب پرنس کے نام سے ہوئی ہے جو مفرور ہے، فائرنگ کرنے والے اور متاثرین کا تعلق ایک ہی کمپنی سے ہے، فائرنگ کے بعد نزدیکی سکولوں کو بند کردیا گیا ہے۔
image

عوامی سروے

سوال: انتخابی اصلاحات کی منظوری ملک کیلئے فائدہ مند ہو گی یا نقصان دہ؟