25 اپریل 2018
تازہ ترین
فن وفنکار
 پشتو زبان کی مشہور گلوکارہ نازیہ اقبال کی 2 بیٹیوں سے مبینہ زیادتی کے مقدمے میں گلوکارہ کے بھائی کو گرفتار کرلیا گیا۔ پولیس کے مطابق گلوکارہ نازیہ اقبال نے اپنے 19 سالہ بھائی افتخار کے خلاف تھانہ روات میں درخواست دی تھی۔ اپنی درخواست میں گلوکارہ نے الزام عائد کیا کہ ان کے بھائی نے متعدد مرتبہ ان کی 8 اور 12 سالہ بیٹیوں سے اُس وقت مبینہ طور پر زیادتی کی، جب وہ اور ان کے شوہر کنسرٹس کے سلسلے میں گھر سے باہر ہوتے تھے۔ بحریہ ٹائون کی رہائشی نازیہ اقبال نے بتایا کہ جب وہ گھر سے باہر جاتی تھیں تو اپنی بیٹیوں کی دیکھ بھال کے لیے اپنے بھائی کو گھر پر چھوڑ کر جاتی تھیں۔ خاتون نے دعویٰ کیا کہ ان کے بھائی نے ان کی بیٹیوں کی دیکھ بھال کے بجائے ان کا ریپ کیا اور انہیں خاموش رہنے کے لیے ڈرایا دھمکایا ۔  انہوں نے منگل کو اپنے بھائی کو اپنی بیٹی کے ساتھ زیادتی کرتے ہوئے پکڑا اور اس کے بعد مقدمہ درج کروایا۔ ایس ایچ او روات پولیس کے مطابق نازیہ اقبال کے بھائی کو گرفتار کرلیا گیا ہے اور مزید تفتیش جاری ہے۔  دونوں متاثرہ بچیوں کا میڈیکل ٹیسٹ کرانے کے بعد نمونے پنجاب فرانزک لیب لاہور بھیج  دیئے گئے ہیں۔  ملزم کا ڈی این اے ٹیسٹ کرانے کا بھی فیصلہ کیا گیا ہے۔

 پاکستان کی معروف اداکارہ ماریہ واسطی نے گلوکار جونی زید کے ساتھ دوستی اور جلد شادی کی افواہوں کو بے بنیاد قرار دیتے ہوئے کہا ہے کہ زید جونی  ان کے بھائی جیسے ہیں ، لوگ ایسی باتیں سوچے سمجھے بغیر پھیلا دیتے ہیں ۔ نجی ٹی وی کے مطابق اداکارہ ماریہ واسطی نے کہا کہ میں ذاتی زندگی کے فیصلوں میں آزاد ہوں اور کسی کو وضاحت دینے کی پابند بھی نہیں ہوں لیکن یہ نہایت افسوس کی بات ہے کہ لوگ جھوٹی اور بے بنیاد خبریں پھیلا رہے ہیں ۔ دوسری طرف معلوم ہوا ہے کہ ماریہ واسطی ان دنوں اپنی والدہ کے ہمراہ اٹلی کے دورے پر ہیں انکے ہمراہ گلوکار جونی زید ا وران کی والدہ بھی ہیں، ماریہ واسطی نے جب اس ٹور کی تصاویر سوشل میڈیا پر شیئر کیں تو مختلف افراد کی طرف سے افواہیں شروع ہو گئیں کہ ماریہ واسطی اور جونی زید کے درمیان گہری دوستی ہے اور وہ جلد ہی شادی کرنے کا ارادہ رکھتے ہیں ۔
image

ٹی وی اور سٹیج کی معروف اداکارہ مدیحہ گوہر کینسر کے باعث انتقال کر گئیں ۔ مرحومہ کی نماز جنازہ کل لاہور میں ادا کی جائے گی۔ پاکستان ٹی وی اور سٹیج کی معروف اداکارہ مدیحہ گوہر لاہور میں 62 برس کی عمر میں انتقال کرگئیں، مدیحہ کینسر جیسے موذی مرض میں مبتلا تھیں۔ مدیحہ گوہر 1956 میں کراچی میں پیدا ہوئیں انہوں نے 1983 میں خواتین کے حقوق کیلئے اجو کا تنظیم بنائی جو ایشیا اور یورپ میں خاصی فعال ہے۔ مدیحہ گوہر معروف ڈرامہ نویس، ڈائریکٹر اور رائٹر شاہد محمود ندیم کی اہلیہ تھیں۔ وہ گزشتہ تین سال سے کینسر جیسے موذی مرض سے جنگ لڑ رہی تھیں۔
image

بالی وڈا داکار سوشانت سنگھ راجپوت اور سارہ علی خان فلم  کیدار ناتھ کے اگلے شیڈول کی عکسبندی پانی کے اند کریں گے۔ بھارتی ذرائع کے مطابق فلم  کیدار ناتھ کی عکسبندی چند وجوہات کے باعث ملتوی کر دی گئی تھی، لیکن اب ان مسائل کو حل کر دیا گیا  اور اداکار سوشانت سنگھ راجپوت اور سارہ علی خان فلم کی عکسبندی28 اپریل کو دوبارہ سے شروع کریں گے۔ فلم کے نئے شیڈول کی عکسبندی پانی کے اندر کی جائے گی۔ فلم کے ہدایتکار ابھیشیک کپور اور فلم ساز رونی ہیں۔ فلم رواں سال 21دسمبر کو نمائش کے لئے پیش کی جائے گی۔
image

بالی وڈ اداکارہ مادھوری ڈکشٹ نے کہا ہے کہ فلم ٹوٹل دھمال کے گانے  پیسہ یہ پیسہ میں خود کو بہترین ڈانسر تصور نہیں کر سکتی۔ بھارتی ذرائع کے مطابق مادھوری ڈکشٹ نے فلم ٹوٹل دھمال میں 80کی دہائی میں بننے والی فلم قرض کے گانے پیسہ یہ پیسہ کو دوبارہ تخلیق کرنے پر خوشی کا اظہار کرتے ہوئے کہا کہ میں بہت خوش ہوں کہ فلم میں اس کلاسک نمبر کو شامل کیا گیا ، انہوں نے کہا کہ گانے میں میں خود کو بہترین ڈانسر نہیں کہہ سکتی کیونکہ جاوید جعفری اور ارشد وارثی ایک پیشہ ور ڈانسر ہیں، ہاں یہ ضرور کہا جا سکتا ہے کہ میں فلم میں بطور فی میل بہترین ڈانسر ہوں۔ گانا جاوید جعفری، ارشد وارثی، رتیش دیش مکھ، اجے دیوگن، اندرا کمار ، مادھوری ڈکشٹ، انیل کپور، سنجے مشرا اور پیتوباش پر فلمایا گیا۔ فلم کے ہدایتکار اندرا کمار ہیں۔ فلم 7دسمبر کو نمائش کے لئے پیش کی جائے گی۔
image

پاکستانی فلموں کے بعد بالی وڈ میں بھی اپنی اداکاری کے جوہر دکھانے والی اداکارہ صبا قمر کی بالی وڈ ڈیبیو فلم ہندی میڈیم  نے بھارت اور پاکستان کے بعد چین میں بھی تہلکہ مچاتے ہوئے سلمان خان کی  بجرنگی بھائی جان اور عامر خان کی فلم  دنگل کو پیچھے چھوڑ دیا ۔ فلم چینی باکس آفس پر 205.21 کروڑ کا بزنس کر کے دو سو کروڑ کلب میں شامل ہو گئی ۔ واضح رہے کہ ہندی میڈیم میں بہترین اداکاری کرنے پر صبا قمر کو فلم فیئر ایوارڈ میں بیسٹ ایکٹریس کیلئے نامزد کیا گیا تھا۔
image

مراکش سے تعلق رکھنے والی معروف اداکارہ، ماڈل و گلوکارہ وائم عمار دھامنی دبئی میں دل کا دورہ پڑنے سے وفات پا گئیں۔ ان کی عمر صرف 34 برس تھی۔ وائم عمار دھامنی رباط میں پیدا ہوئیں، انہوں نے بالی وڈ کی فلموں کے علاوہ بھارتی چینلز کے خصوصی پروگرام بطور میزبان انجام دیئے۔ علاوہ ازیں وائم کو پاکستانی ڈائریکٹر شہزاد رفیق نے اپنی فلم عشق خد میں کاسٹ کیا، جس کے بعد انہوں نے ایک فلم ہوٹل میں بھی کام کیا تھا۔
image

شاہ رخ خان ایک بہترین باپ ثابت ہوئے ہیں جو اپنی بیٹی کی خوب پروا کرتے ہیں۔ شاہ رخ خان ہمیشہ اپنے بچوں کے ساتھ دوستوں کی طرح پیش آئے، لیکن جب سے سہانا خان نے نوجوانی کی دہلیز پر قدم رکھا ہے تو شاہ رخ خان کے اندر بھی ایک روائتی  باپ جاگ اٹھا، انہوں نے کہا ہے کہ اگر کسی لڑکے نے سہانا کا بوسہ لینے کی کوشش کی تو وہ اس کے ہونٹ کاٹ دیں گے۔ اب یہ انکشاف بھی سامنے آیا ہے کہ انہوں نے اپنی بیٹی کے ساتھ  دوستی کرنے کے خواہشمند لڑکوں کیلئے 7 اصول بھی وضع کر یئے ہیں ۔ ایک انٹرویو میں گفتگو کرتے ہوئے شاہ رخ خان کا کہنا تھا جو بھی لڑکا سہانا خان کے ساتھ معاشقہ لڑانے کا خواہشمند ہے تو اسے ذیل میں دیئے گئے ان سات اصولوں کو یاد رکھنا ہو گا۔1۔ نوکری حاصل کرو۔2۔ اس بات کو سمجھو کہ میں تمہیں پسند نہیں کرتا۔3۔ میں ہر جگہ پر ہوں۔4۔ ایک وکیل بھی ڈھونڈ لو۔5۔ سہانا میری شہزادی ہے ، تمہاری فتح نہیں۔6۔ میں واپس جیل جانے پر برا نہیں منائوں گا۔7۔ تم جو بھی سہانا کے ساتھ کرو گے، میں تمہارے ساتھ وہی کروں گا۔ اب جو بھی لڑکا سہانا خان کے ساتھ معاشقہ لڑانے کی خواہش رکھتا ہے تو اسے اور کچھ نہیں تو کم از کم ان سات اصولوں پر پورا اترنا ہو گا کیونکہ شاہ رخ خان بھی ایک ایسے ہی باپ ہیں جو ہر حال میں اپنی بیٹی کو محفوظ رکھنا چاہتے ہیں۔
image

معروف فنکار انور مقصود نے ایک سندھی کے حوالے سے متنازع مزاحیہ ویڈیو بنانے پر معافی مانگ لی۔ انور مقصور سوشل میڈیا پر انوار نامہ کے نام سے سیریز پروگرام کرتے ہیں۔ معروف فن کار نے سیریز میں ایک سندھی کے انٹرویو کے نام سے مزاحیہ پروگرام کیا۔ اس پروگرام پر سوشل میڈیا پر طوفان برپا ہوگیا اور سندھی زبان بولنے والے افراد نے انور مقصود کی سخت مذمت کی۔ انور مقصود نے اس پروگرام پر معافی مانگتے ہوئے اپنے سوشل میڈیا اکائونٹ سے بھی اس ویڈیو کو ڈیلیٹ کردیا ، تاہم مذکورہ ویڈیو دیگر سوشل میڈیا صارفین کے اکائونٹس پر موجود ہے۔ انور مقصود نے وضاحتی بیان پر مبنی نئی ویڈیو جاری کی ، جس میں وہ کافی مضطرب اور پریشان نظر آئے۔ انور مقصود نے کہا کہ وہ خود کو سندھی سمجھتے ہیں اور ان کا ایم کیو ایم سمیت کسی سیاسی جماعت سے کوئی تعلق نہیں۔ انور مقصود نے کہا کہ بے نظیر بھٹو اور آصف زرداری سے بھی ان کی اچھی شناسائی رہی ہے، سندھی انٹرویو محض مذاق اور مزاح پر مبنی پروگرام تھا، تاہم اگر ان کے مذاق سے کسی کی دل آزاری ہوئی تو وہ معافی مانگتے ہیں۔
image

معروف اداکارہ ریما نے سرجری کے بعد شوبز میں کام کا آغاز کر دیا، ایک طرف ٹی وی کمرشلز جاری ہیں تو دوسری جانب سلور سکرین پر بھی جلد اداکاری کے جوہر دکھائیں گی۔ میڈیا رپورٹس کے مطابق ریما نے شوبز میں واپسی کے لئے امریکا میں چہرے ، ناک اور ہونٹوں کی سرجری کرائی ہے ، جس کی وجہ سے اکثر لوگوں کو انہیں پہچاننے میں دقت کا سامنا ہے، جبکہ ریما تقریبات میں شرکت کے دوران اپنی تصاویر بنانے والے فوٹو گرافرز کو دور سے تصویر بنانے کی ہدایت کرتی دکھائی دیتی ہیں۔ اس حوالے سے شوبز کے سنجیدہ حلقوں  نے کہا ہے کہ ریما نے بڑی طویل اور کامیاب اننگزکھیلنے کے بعد شوبز کو خیرباد کہا تھا۔ ان کی پرکشش شخصیت کے چاہنے والوں کی بڑی تعداد موجود تھی لیکن گزشتہ دنوں ایک مشروب کے کمرشل میں ان کو دیکھ کر لوگوں نے خاصی تنقید کی۔ اس لئے ہم سمجھتے ہیں کہ ریما کو سرجری کروا کر اپنی بڑھتی عم رکو ضرور چھپانا چاہئے تھا،  لیکن ضرورت سے زیادہ سرجری نے ریما کے پرستاروں کو خاصا مایوس کیا ، جس کے بارے میں انہیں ضرور سوچنا چاہئے۔
image

بالی وڈ کی خوبرو اداکارہ اور بھارتی کرکٹ سٹار ویرات کوہلی کی اہلیہ انوشکا شرما کے بڑھاپے والے روپ کی تصویر سوشل میڈیا پر وائرل ہوتے ہی چہ مگوئیاں شروع ہوگئیں۔ انوشکا شرما نے اس وقت دو فلمیں سائن کی ہوئی ہیں جن میں ایک  سوئی دھاگا اور دوسری زیرو ہے ۔ وائرل ہوئی تصویر میں دیکھا جا سکتا ہے کہ انوشکا ایک نئے روپ میں جلد جلوہ گر ہونے والی ہیں جس میں وہ ایک معمر خاتون دکھائی دیں گی جس کے لیے ان کا میک اپ آرٹسٹ میک اپ بھی کر رہی ہیں۔ تصویر کے وائرل ہوتے ہی مداحوں کی جانب سے قیاس آرائیاں کی جارہی ہیں کہ آیا یہ ان کی تصویر فلم  زیرو کی جھلک ہے یا فلم  سوئی دھاگا کی اور بعض افراد نے خیال ظاہر کیا کہ شاید کسی اشتہار کے لئے انوشکا شرما بڑھاپے کا روپ دھار رہی ہیں۔
image

سیشن عدالت نے ہٹ اینڈ رن کیس میں بھارتی اداکار سلمان خان کے قابل ضمانت وارنٹ گرفتاری منسوخ کر دیئے۔ ممبئی کی سیشن عدالت نے بالی وڈ سٹار سلمان خان کے 2002 میں ہٹ اینڈ رن کیس میں قابل ضمانت وارنٹ گرفتاری منسوخ کر دیئے۔ میڈیا رپورٹس کے مطابق ممبئی کی سیشن عدالت نے رواں ماہ ہٹ اینڈ رن کیس میں عدالت کو ملزم کی جانب سے گارنٹی جمع نہ کرنے پر اداکار سلمان خان کے قابل ضمانت وارنٹ گرفتاری جاری کئے تھے، تاہم  سلمان خان نے ایڈیشنل اینڈ سیشن جج  ایم جی دیش پانڈے کے قانونی کارروائی مکمل کرنے سے قبل عدالت میں پیش ہوکر قانونی ضابطے مکمل کرتے ہوئے گارنٹی جمع کرا دی جس کے بعد ان کے وارنٹ گرفتاری منسوخ کر دیئے گئے۔  2002میں سلمان خان نے ممبئی کی ایک سڑک پر شراب کے نشے میں فٹ پاتھ پر سوئے ہوئے لوگوں کو اپنی گاڑی سے کچل دیاتھا، جس کے نتیجے میں ایک شخص ہلاک ہوگیا تھا۔ تاہم ممبئی ہائیکورٹ  نے 2015 میں  ناکافی ثبوت کی بنا پر سلمان خان پر سے تمام چارجز ختم کرتے ہوئے انہیں بری کر دیا تھا لیکن مہاراشٹرا حکومت نے سلمان خان کی رہائی کے خلاف ایک بار پھر عدالت میں درخواست دائر کی تھی۔ سیشن کورٹ نے سلمان خان کو رواں سال اسی کیس میں دو نوٹسز جاری کئے تھے ، تاہم سلمان خان کی جانب سے دونوں نوٹسز کے جواب  جمع نہ کرانے پر عدالت کی جانب سے ان کے قابل ضمانت وارنٹ گرفتاری جاری کئے گئے تھے۔
image

اداکارہ و ماڈل کبریٰ خان نے کہا ہے کہ شوبز کی انڈسٹری بہت چھوٹی ہے، جبکہ اس میں کام کرنے والے سب بہت سپیشل ہیں۔ ایک انٹرویو میں کبریٰ خان نے کہا کہ میں نے جب شوبزکی دنیا میں قدم رکھا تو شروعات ماڈلنگ سے  کی، لیکن پھر مختلف گلوکاروں کے گیتوں میں ماڈلنگ کرتے ہوئے ایکٹنگ کا موقع ملا۔ پاکستان میں ٹی وی ڈراموں اور فلم میں کام کیا اور اب یہ سلسلہ کامیابی سے جاری ہے۔ میں نے اپنی زندگی میں ایک ہی چیز سیکھی ہے کہ ہمیں ہرروز کچھ نہ کچھ نیا سیکھنا چاہئے۔ انہوں نے کہا کہ میرا یہ ماننا ہے کہ پیسے لگا کر کبھی بھی کامیابی حاصل نہیں کی جاسکتی۔ ہر کوئی چاہتا ہے کہ وہ راتوں رات شہرت کی بلندیوں تک پہنچ جائے لیکن اس کے لئے محنت ضروری ہے۔ اسی عزم کے ساتھ شوبز انڈسٹری میں کام کر رہی ہوں اور یہ اللہ پاک کا خاص کرم ہے کہ مجھے بہت جلد وہ مقام مل گیا ، جس کے لئے لوگ برسوں محنت کرتے ہیں۔ انہوں نے کہا کہ شوبز کے مختلف شعبوں میں کام کرنے کے بارے میں فی الحال تو کچھ نہیں سوچا، لیکن مستقبل میں ایسا ہو بھی سکتا ہے۔ کیونکہ اب تو آل رائونڈ پرفارمنس بے حد ضروری ہے۔
image

ہالی وڈ اداکارہ نٹالی پورٹمین نے کہا ہے کہ انہوں نے اسرائیلی وزیراعظم کی پالیسیوں کی مخالفت کرنے کے لئے یروشلم میں ایک تقریب میں جانے سے انکار کردیا ، جہاں انہیں 20 لاکھ ڈالر کی انعامی رقم دی جانی تھی۔ پورٹمین نے انسٹاگرام اکائونٹ پر بیان جاری کیا، جس میں انہوں نے کہا کہ میں نے اس تقریب میں جہاں بنیامن نیتن یاہو نے خطاب بھی کرنا تھا نہ جانے کا فیصلہ اس لئے کیا کیونکہ میں بنیامن نیتن یاہو کی حمایت نہیں کرنا چاہتی۔ خیال رہے کہ جینیسز پرائز فائونڈیشن کی ویب سائٹ کے مطابق ایوارڈ دینے کا یہ سلسلہ 2013 میں شروع ہوا تھا اور یہ ان غیر معمولی افراد کو دیا جاتا ہے، جو یہودیوں کی آئندہ نسل کے لئے انسپریشن ہوں۔
image

نامور پاکستانی گلوکار علی ظفر پر جنسی ہراسانی کا الزام لگانے والی میشا شفیع نے اب تک خاموش رہنے کی وجہ بتادی۔دوروز قبل گلوکارہ میشا شفیع نے علی ظفر پر سنگین الزامات لگاتے ہوئے کہا تھا کہ علی نے انہیں ایک بار نہیں بلکہ کئی بار جنسی ہراسانی کا نشانہ بنایا تاہم وہ خاموش رہیں اور اپنے دفاع میں کچھ بھی کہنے کی ہمت نہ کرسکیں لیکن اب انہوں نے مزید خاموش رہنے کا فیصلہ ترک کرتے ہوئے اپنے ساتھ ہونے والی زیادتی پر آواز اٹھائی ہے۔ اس حوالے سے ایک اخبارکوانٹرویو دیتے ہوئے انہوں نے کہا جب پہلی بار میرے ساتھ یہ واقعہ ہوا میں نے کوئی ردعمل ظاہر نہیں کیا بس وہاں سے چلی گئی اور میں نے اس بارے میں اپنے شوہر کو بتایا اور ان سے بھی چپ رہنے کیلئے کہا کیونکہ ہم دونوں(میں اور علی ظفر)مشہور شخصیت ہیں  میری سوچ اس وقت یہ تھی کہ میں کون ہوں اور وہ(علی ظفر)کون ہے اور اگر یہ واقعہ سامنے آگیا تو کیا ہوگا۔دوسری مرتبہ علی ظفر نے مجھے اس وقت ہراساں کیا جب ہم لاہور میں کنسرٹ کیلئے ایک ساتھ تھے۔ میشا سے سوال پوچھا گیا کہ آپ نے ان کے ساتھ کنسرٹ کیلئے ہاں کیوں کہا جب وہ آپ کے ساتھ اس سے قبل نازیبا حرکت کرچکے تھے  جس پر میشا نے کہا میں کام نہیں چھوڑ سکتی کیونکہ اس سے میرا گزارا ہوتا ہے۔ میں اپنے بینڈ کے ساتھ پرفارمنس کی تیاری کررہی تھی جب انہوں نے مجھ سے بات کرنے کی کوشش کی اس وقت میں نے بہت مشکل محسوس کی اور انہیں نظر انداز کیا۔میشا سے پوچھا گیا کہ تو پھر ایسا کیا ہوا کہ آپ نے اب آواز اٹھانے کا فیصلہ کیا، اس سوال پر میشا نے کہا اب میں اس واقعے پر بات کرنے کیلئے بالکل تیار ہوں، میں نے اس حوالے سے لوگوں سے بات کی اور محسوس کیا کہ اب اس پر مزید خاموش رہنا بہت مشکل ہےکیونکہ میں اپنےآس پاس ایسی بہادر خواتین کو دیکھ رہی ہوں جو جنسی ہراسانی کے خلاف آواز اٹھارہی ہیں،انہوں نے کہا انہوں نے اپنے بچوں سے کہا ہے کہ اس طرح کے معاملات پر آواز اٹھانااور بات کرنا کتنا اہم ہے، جنسی ہراسانی کےبارے میں بات کرنا خواتین کا حق ہے اور اس بات کو جانے نہیں دینا چاہیئےاس کے علاوہ یہ ضروری ہے کہ لوگ اس بارے میں جانیں۔ انہوں نے کہا میں اس بارے میں بات کرنے میں ہچکچارہی تھی یہی وجہ تھی کہ اب تک خاموش تھی، میں جتنے لوگوں کو اس واقعے کے بارے میں بتاتی ہوں اتنی زیادہ ہمت محسوس کرتی ہوں۔  
image

میشا شفیع کے بعد پاکستان کی معروف گلوکارہ مومنہ مستحسن نے بھی انکشاف کرتے ہوئے کہا ہے کہ وہ بھی جنسی ہراسانی کا شکار ہوئی ہیں۔پاکستان کی خوبرو اور نامور گلوکارہ مومنہ مستحسن نے بھی اپنے ساتھ پیش آنے والے ہراسانی کے واقعے پر آواز اٹھانے کا فیصلہ کیا ہے۔مومنہ نے انسٹاگرام پر اپنے اوپر بیتی جانے والی کہانی بیان کرتے ہوئے کہا ہے کہ مجھے بھی جنسی طور پر ہراساں کیا جا چکا ہے، اور جنسی ہراساں ہونے کا یہ معاملہ صرف علی ظفر تک محدود نہیں، یہ معاملہ مجموعی طور پر مردوں سے منسلک ہے جو عورتوں کے ساتھ تعلق میں اعتماد کو اہمیت نہیں دیتے۔انہوں نے کہا اکثر اوقات خواتین کی عزت کے ساتھ وہ ہی لوگ کھیلتے ہیں جو ان کو کسی نہ کسی طور پر جانتے ہیں، اس معاملے میں ملوث ہر اس مرد کو کھلم کھلا معافی مانگنی چاہیے۔مومنہ نے کہا میں  نے علی ظفر اور میشا شفیع کے معاملے  نے یہ سوال بہت سنا کہ میشا نے یہ سب کہنے میں اتنا وقت کیوں لگایا جس کا جواب یہ ہے کہ متاثرہ شخص کوہی معاشرے میں شرمندگی کا سامنا کرنا پڑتا ہے، جب کہ اس پر معاشرے کی جانب سے چپ  رہنے کا دبا بھی ہوتا ہے اوراسے اس معاملےکا کسی کے سامنے ذکر نہ کرنے کیلئے کہا جاتا ہے کیونکہ کچھ لوگ اپنے دفاع میں فورا ہی لڑکی کے کردار پر سوال اٹھادیتے ہیں اور انہیں عدالت میں لے جاکر ذلیل کرتے ہیں۔ اور یہ بات سب جانتے ہیں کہ عدالت میں جنسی ہراسگی کو ثابت کرنا ناممکن ہے لہذا کچھ خواتین کے پاس اس کے علاوہ اور کوئی آپشن نہیں ہوتا کہ کیس سے پیچھے ہٹ جائیں کیونکہ اس کا اثر ان کے گھروالوں اور آنےوالی زندگی پر پڑتا ہے۔
image

بالی وڈ ہدایت کار کرن جوہر کا مومی مجسمہ مادام تسائو میوزیم کی زینت بنے گا۔ بھارتی فلم نگری سے تعلق رکھنے والے کئی اداکاروں کے مومی مجسمے مادام تسائو میں رکھے ہوئے ہیں، جس میں شاہ رخ خان، امیتابھ بچن، سلمان خان سمیت کئی شامل ہیں۔ نوجوان اداکاروں میں ورون دھون واحد اداکار ہیں، جن کا مجسمہ حال ہی میں مادام تسائو کی زینت بنا ہے ، تاہم اب کرن جوہر بھی یہ اعزاز حاصل کرنے والے پہلے ہدایت کار بن چکے ہیں۔ بھارتی میڈیا کے مطابق معروف ہدایت کار کرن جوہر کا مومی مجسمہ بھی مادام تسائو میوزیم میں رکھا جائے گا جس کے بعد مادام تسائو کی زینت بننے والے پہلے بھارتی ہدایت کار بن گئے ہیں۔ ہدایت کار کا مجسمہ لندن کے مادام تسائو میوزیم میں رکھا جائے گا، جس کی تیاریاں شروع کردی گئی ہیں۔ دوسری جانب کرن جوہر بھی مادام تسائو کی زینت بننے پر خوشی سے سرشار ہیں اور اسے اپنے لئے اعزاز قرار دیا ۔
image

ہالی وڈ اداکارہ انجلینا جولی اداکار ی کے ساتھ ایڈونچر کی بھی شوقین نکلیں، جن کی جہاز اڑانے کی ویڈیو سوشل میڈیا پر وائرل ہوگئی ۔42 سالہ اداکارہ انجلینا جولی نے اپنی نئی آنیوالی ڈاکیومینٹری کی ریکارڈنگ کے دوران چھوٹا مسافرطیارہ اڑایا اور نہایت پر اعتمادی سے زمین سے کئی فٹ بلندی پر فضائوں میں اڑان بھرتی دکھائی دیں۔ ویڈیو نے انجلینا کے مداحوں کو بے حد متاثر کیا اور انجلینا ٹویٹر پر ٹرینڈ بنی رہیں۔
image

فلم سٹار میرا نے فلم انڈسٹری میں لڑکیوں کے ساتھ ہونے والے جنسی استحصال بارے کتاب لکھنے کا فیصلہ کیا ۔ اداکارہ میرا نے  نجی ٹی وی سے بات کرتے ہوئے کہا کہ فلم انڈسٹری میں ہر لڑکی کو بلیک میل کر کے زیادتی کا نشانہ بنایا جاتا ہے اور یہاں خواتین کے ساتھ وہ کچھ ہوتا ہے جو ناقابل بیان ہے۔ یہی وجہ ہے کہ بازار حسن کے علاوہ اچھی فیملی سے تعلق رکھنے والی لڑکیاں یہاں آنا پسند نہیں کرتیں ۔ میرا کا کہنا تھا کہ میں اس بارے میں بہت جلد کتاب لکھوں گی جس میں وہ تمام راز افشا کروں گی ، جو آج تک میرے سینے میں دفن ہیں، میری کتاب میں بہت سے ایسے لوگوں کے چہرے سامنے آئیں گے، جو بظاہر بہت شریف ہیں۔ اور جب میرا منہ کھلے گا پھر سب کے منہ بند ہوجائیں گے اور لوگوں کے سامنے تمام حقائق آئیں گے۔ اداکارہ نے مزید کہا کہ شوبز کی لڑکیوں کو جنسی طور پر نہ صرف پاکستان بلکہ انڈیا میں بھی ہراساں کیا جاتا ہے، لیکن پہلے لڑکیاں خاموش رہتی تھیں اور اب وہ بولنا شروع ہوگئی ہیں اور میرے خیال میں یہ بالکل درست ہے، جو لوگ شوبز کی لڑکیوں کے ساتھ ایسا کرتے ہیں ان کے بارے میں سب کو پتہ چلنا چاہئے، تاکہ دوبارہ کسی کو ایسا کرنے کی ہمت نہ ہو۔ میرا نے کہا کہ شوبز کے علاوہ زندگی کے مختلف شعبوں میں بھی یہ سلسلہ بہت پرانا ہے۔ مگر اب سوشل میڈیا کی بدولت خواتین کو آواز بلند کرنے کا ایک بہترین سہارا میسر آچکا ہے اور اب اس سے خواتین کو بہت فائدہ پہنچے گا۔
image

نامورپاکستانی اداکارہ ماہرہ خان نے میشا شفیع کی جانب سے علی ظفر پر جنسی ہراسانی کے الزام پر کہا ہے کہ اس مسئلے پر سنجیدگی سے بات کرنے کی ضرورت ہے۔پاکستان شوبز انڈسٹری کی نامور گلوکارہ و اداکارہ میشا شفیع نے گزشتہ روز ایک ٹویٹ میں علی ظفر پر جنسی ہراسانی کا سنگین الزام لگایا تھا۔ میشا شفیع کے الزامات کے بعد سوشل میڈیا پر دیگر فنکاروں کی جانب سے ملے جلے ردعمل کا اظہار کیا جارہا ہے۔اداکارہ ماہرہ خان نے بھی اس معاملے پر اپنی رائے کا اظہار کیا ہے۔ تاہم انہوں نے میشا شفیع یا علی ظفر کا نام لیے بغیر سوشل میڈیا پر جنسی ہراسانی جیسے سنجیدہ معاملے پر تبصرے کرنے والے لوگوں کو آڑے ہاتھوں لیتے ہوئے کہا ہے کہ بیمار ذہنیت والے اس معاملے پر تبصرہ کررہے ہیں جس سے ظاہر ہے کہ مسئلہ دراصل ان کے دماغوں میں ہے۔ اگر ہم اس معاملے کو تبصرے کرکے کمزور کرتے رہیں گے تو یہ سلسلہ اسی طرح جاری رہے گا۔واضح رہے کہ گزشتہ روز میشا شفیع نے علی ظفر پر انہیں ایک سے زائد بار جنسی طور پر ہراساں کرنے کا الزام لگایا تھا۔ میشا شفیع کے الزامات پر سوشل میڈیا صارفین کے ساتھ شوبز سے تعلق رکھنے والے فنکاروں نے بھی اپنے ردعمل کا اظہار کیا۔۔
image

بولی وڈ اداکارہ دپیکا پڈوکون ویسے ہی ایک کے بعد ایک کامیاب قدم اٹھانے کے ساتھ  آگے بڑھتی جارہی ہیں اور اب اداکارہ کا نام دنیا کی 100 بااثر افراد کی فہرست کا بھی حصہ بن چکا ہے۔ رواں سال کی دنیا کے 100 بااثر افراد کی فہرست جاری کی گئی ہے جس میں دپیکا پڈوکون کا نام بھی شامل ہے۔دلچسپ بات یہ ہے کہ دپیکا پڈوکون وہ واحد بولی وڈ اداکارہ ہیں جن کا نام اس سال کی فہرست کا حصہ بنا۔دپیکا کے علاوہ اس فہرست میں بھارتی کرکٹر ویرات کوہلی کا نام بھی شامل کیا گیا۔دپیکا کی قریبی دوست اور بولی وڈ اداکارہ پریانکا چوپڑا نے بھی انہیں اور ویرات کوہلی کو اس اعزاز کی مبارکباد دی۔جبکہ دپیکا کے قریبی دوست رنویر سنگھ نے اداکارہ کی انسٹاگرام پوسٹ پر انہیں رانی کہہ کر مخاطب کیا۔خیال رہے کہ رواں سال ریلیز ہونے والی فلم ٴپدماوتٴ میں دپیکا پڈوکون کو ان کی شاندار اداکاری کے باعث خوب پذیرائی ملی۔فلم ٴپدماوتٴ میں انہوں نے رانی پدماوتی کا کردار ادا کیا، جبکہ انہیں اس فلم کی ریلیز کے موقع پر کئی مشکلات کا سامنا بھی رہا۔دپیکا پڈوکون نے فلحال اپنی کسی نئی فلم کا اعلان نہیں کیا، البتہ امید ظاہر کی جارہی ہے کہ وہ بہت جلد اپنی اگلی فلم کا اعلان کریں گی۔۔
image

گلوکارہ و اداکارہ میشا شفیع کے بعد صحافت کے شعبے سے تعلق رکھنے والی خاتون ماہم جاوید نے بھی علی ظفر پر جنسی ہراساں کرنے  کا الزام لگا دیا۔ تفصیلات کے مطابق میشا شفیع کے بعد صحافت کے شعبے سے تعلق رکھنے والی ایک اور خاتون ماہم جاوید نے بھی علی ظفر پر جنسی ہراسانی کا الزام لگاتے ہوئے میشا شفیع کی بہادری اور جرات کی تعریف کی اور کہا میشا کی جانب سے کئے گئے ٹویٹ نے انہیں بھی ایک واقعے کی یاد دلادی، جو کافی سال پہلے پیش آیا تھا اور علی ظفر کے حوالے سے ہی تھا۔ ماہم جاوید نے ٹویٹ کیاکہ علی ظفر نے ان کی کزن کا بوسہ لینے کی کوشش کی اور اسے ریسٹ روم میں دھکا دیا ، لیکن خوش قسمتی سے میری کزن کی دوست وہاں آگئی اور اس نے علی ظفر کو وہاں سے دھکا دے کر ہٹایا۔ ماہم نے ایک اور ٹویٹ میں کہا کہ یہ واقعہ 2004 اور 2005 کے درمیان کا ہے ،جب وہ لوگ ایک کشتی میں پارٹی کر رہے تھے ۔ واضح رہے کہ گزشتہ روز علی ظفر نے میشا شفیع کی جانب سے خود پر لگائے جانے والے الزامات کی سختی سے تردید کرتے ہوئے تھا کہ وہ یہ معاملہ عدالت لے کر جائیں گے اور پیشہ ورانہ طریقے سے ان الزامات کا سامنا کرتے ہوئے جواب دیں گے۔
image

بالی وڈ اداکار رنبیر کپور اور اداکارہ دپیکا پڈوکون نے اختلافات بھلا کر ممبئی میں منعقدہ مجوان فیشن شو میں انٹری دی اور ریمپ پر ایک ساتھ کیٹ واک کرکے مداحوں کو حیران کر دیا۔ رنبیر اور دپیکا نے بھارتی ڈیزائنر منیش ملہوترا کے ملبوسات کی نمائش کی۔ واضح رہے کہ کچھ عرصہ قبل رنبیر اور دپیکا کے تعلق کی خبریں گرم تھیں اور دونوں کا نام ایک دوسرے کے ساتھ جوڑا جاتا رہا، تاہم بعد میں دونوں کا بریک اپ ہوگیا تھا۔
image

بالی وڈ کے ایکشن ہیرو اکشے کمار نے زخمی حالت میں بھی مسلسل کام کرکے مثال قائم کردی۔ اکشے کمار ان دنوں فلم کیسری کی شوٹنگ میں مصروف ہیں، دوران شوٹنگ ایکشن سین کے دوران اچانک اکشے کمار زخمی ہوگئے۔ میڈیا رپورٹس کے مطابق اکشے کی پسلیوں پر چوٹ آئی،  ڈاکٹرز نے انہیں شوٹنگ ختم کرکے آرام کرنے اور ممبئی واپس جانے کا مشورہ دیا ،  لیکن زخمی ہونے کے باوجود اکشے کمار نے شوٹنگ منسوخ کرنے سے منع کر دیا اور مسلسل کام کرکے مثال قائم کردی۔ واضح رہے کہ 1897 میں سرگڑھی جنگ کے پس منظر میں بنائی گئی فلم کیسری کی کہانی برطانوی انڈین آرمی، 21 سکھوں اور افغان اورکزئی قبائلیوں کے درمیان شمال مغربی صوبے کیلئے کی جانے والی لڑائی کے گرد گھومتی ہے۔ فلم میں اکشے کمار حوالدار ایشور سنگھ کا کردار نبھا رہے ہیں جب کہ ان کے مقابل اداکارہ پرینیتی چوپڑا نظر آئیں گی۔
image

اداکار اور گلوگار علی ظفر پر گلوکارہ میشا شفیع کی جانب سے جنسی ہراساں کئے جانے کے الزام کے بعد شوبز ستاروں کی جانب سے مختلف ردعمل سامنے آرہے ہیں۔ کسی نے خاموشی اختیار کی کسی نے تنقید کی تو کسی نے کھل کر میشا کے اقدام کو سراہا۔  سوشل میڈیا ویب سائٹ ٹویٹر پر اداکارہ عروا حسین نے مور پاور ٹو یو کہہ کر میشا کی حوصلہ افزائی کی۔ سماجی کارکن اور صحافت کے پیشے سے منسلک رہنے والی ریحام خان نے کہا کہ میشا میری طرح راک سٹار ہے جو شکاریوں کے خلاف کھڑی ہوتی ہے۔ اداکار عثمان خالد بٹ نے کہا کہ میشا نے یہ سب سستی شہرت حاصل کرنے کے لیے کیا ۔ دوسری جانب اداکارہ مایا علی نے انسٹاگرام پر اپنے پیغام میں کہا کہ فی الوقت ہمیں کسی کے کردار کے بارے میں بات نہیں کرنی چاہئے۔ مایا کے مطابق میں نے ہمیشہ علی ظفر کو فیس ٹائم پر اپنی اہلیہ اور بچوں سے بات کرتے ہوئے دیکھا کیونکہ وہ اپنے تمام اچھے اور برے لمحات اپنی فیملی کے ساتھ شیئر کرتے ہیں۔ گزشتہ روز میشا شفیع نے سماجی رابطے کی ویب سائٹ ٹویٹر پر اپنے بیان میں ساتھی گلوکار علی ظفر پر ایک سے زائد مرتبہ جنسی ہراساں کئے جانے کا الزام عائد کرتے کہا تھا کہ اس قسم کے واقعات اس وقت پیش نہیں آئے جب وہ انٹرٹینمنٹ انڈسٹری میں داخل ہوئی تھیں بلکہ یہ سب اس وقت ہوا جب وہ اپنا نام بنا چکی تھیں۔ میشا شفیع کا مزید کہنا تھا کہ بااختیار اور اپنے خیالات رکھنے کے باوجود ان کے ساتھ اس طرح کا واقعہ پیش آیا، اگر ان کے ساتھ ایسا ہوا ہے تو کسی کے ساتھ بھی ہوسکتا ہے۔کوئی خاتون جنسی ہراساں کئے جانے سے محفوظ نہیں ہے، ہم اپنے معاشرے میں اس پر بات کرنے سے ہچکچاتے ہیں اور خاموشی کی راہ اختیار لیتے ہیں، ہمیں اجتماعی طور پر اپنی آواز بلند کرنی چاہئے تاکہ خاموشی کے کلچر کو توڑا جاسکے۔ دوسری جانب علی ظفر نے میشا شفیع کی جانب سے عائد کیے گئے جنسی ہراساں کئے جانے کے الزامات مسترد کرتے ہوئے کہا کہ وہ الزام کا جواب الزام سے نہیں دیں گے بلکہ میشا شفیع کے خلاف عدالت جائیں گے۔ ان کا کہنا تھا کہ مجھے پورا یقین ہے کہ سچ ہمیشہ غالب ہوتا ہے۔
image

عوامی سروے

سوال: آپ کے خیال میں پاکستان کا اگلا وزیراعظم کون ہونا چاہیے؟