Jehan Pakistan

عالمی خبریں

امریکہ اور فرانس کا ایران سے نیا جوہری معاہدہ کرنے کی تجویز پر اتفاق

امریکی صدر ڈونلڈ ٹرمپ اور فرانسیسی ہم منصب ایمانیول میکرون نے مضبوط خطوط پر ایران سے نیا جوہری معاہدہ کرنے کی تجویز پر اتفاق کیا ہے۔ بین الاقوامی خبر رساں ایجنسی کے مطابق امریکا کے سرکاری دورے پر آئے فرانسیسی صدر ایمانیول میکرون نے امریکی صدر ڈونلڈ ٹرمپ سے واشنگٹن میں ملاقات کی، جس کے دوران باہمی دلچسپی کے امور پر تبادلہ خیال کیا گیا اور خطے میں تبدیل ہوتی صورت حال پر گفت و شنید کی گئی۔ دونوں رہنماؤں نے 2015 میں ہونے والے ایران سے جوہری معاہدے کے خاتمے اور نئے معاہدے کی تجویز پر اتفاق کیا ہے۔ ملاقات کے بعد مشترکہ پریس کانفرنس کے دوران ڈونلڈ ٹرمپ نے اعلان کیا کہ ہم کچھ بڑا اور غیر معمولی کرنے جارہے ہیں جو ایران سے نیا جوہری معاہدہ بھی ہوسکتا ہے لیکن 2015 کی نسبت نیا معاہدہ مضبوط اور کڑی شرطوں کی بنیاد پر ہوگا کیوں کہ 2015 کا معاہدہ پاگل پن اور غیر حقیقی نکات پر مشتمل ہے جسے اب تبدیل کرنے کی ضرورت ہے۔ اس موقع پر فرانسیسی صدر نے کہا کہ نئے جوہری معاہدے میں ایران کے بیلسٹک میزائل پروگرام کو محدود کرنے سے متعلق بحث کی جانی چاہیے، جب کے مشرق وسطیٰ میں بڑھتے ہوئے ایرانی کردار کو بھی زیر غور لایا جانا چاہیے۔ نئے معاہدے میں ہر اُس نکتے پر بھی گفتگو ہونا چاہیے جس کے ذریعے خطے میں امن کی بنیاد پڑ سکے۔

بھارتی عدالت کی مذہبی پیشوا آسارام کو زیادتی کے جرم میں تاحیات قید کی سزا

بھارتی عدالت نے معروف سادھو اور مذہبی پیشوا آسارام کو 16 سالہ لڑکی کے ساتھ زیادتی کے مقدمے میں مجرم قرار دیتے ہوئے تاحیات قید کی سزا سنا دی ہے۔ بین الاقوامی خبر رساں کے مطابق بھارتی ریاست راجستھان کے شہر جودھ پور کی جیل میں اسپیشل ٹرائل کورٹ نے معروف ہندو سادھو آسارام کو جنسی زیادتی کے مقدمے میں عمر قید اور دیگر دو ملزمان شلپی اور شردچندر کو معاونت کے جرم میں 20، 20 سال قید کی سزا سنا دی جب کے مقدمے میں دو ملزمان کو عدم ثبوت کی بنائ پر بری کر دیا گیا۔ سادھو آسارام باپو کے چیلوں کی جانب سے امن عامہ کو نقصان پہنچانے کے خدشے کے سبب مقدمے کا فیصلہ جودھ پور کی جیل میں سنایا گیا جہاں آسارام اپنے دیگر چار ساتھیوں کے ہمراہ پانچ سال سے قید تھے۔ اس سے قبل گزشتہ برس اگست میں ایک اور مذہبی پیشوا گرمیت رام رحیم کے خلاف فیصلہ آنے پر ہنگامے پھوٹ پڑے تھے۔ ہندوؤں کے مذہبی پیشوا پر اپنی 16 سالہ شاگرد کو زیادتی کا نشانہ بنانے کا الزام تھا۔ زیادتی کا نشانہ بننے والی لڑکی نے عدالت میں بیان دیا تھا کہ آسارام نے 15 اگست 2013 کو جودھ پور کے آشرام میں زیادتی کی تھی جہاں وہ تعلیم کے غرض سے مقیم تھی۔ زیادتی کے بعد لڑکی کے والد نے عدالت سے رجوع کیا جس کے بعد جودھ پور پولیس نے آسارام کو ساتھیوں سمیت 31 اگست 2013 کو گرفتار کرلیا تھا۔ آسارام باپو کی گرفتاری کے بعد جودھ پور میں ہنگامے پھوٹ پڑے تھے جب کے زیادتی کا نشانہ بننے والی لڑکی کے خاندان کو بھی دھمکیاں دی گئی تھیں۔ اس مقدمے کے دو گواہوں کو قتل کر دیا گیا تھا۔ لڑکی کے والد نے کہا کہ ہمیں انصاف ملنے پر خوشی ہے اور امید کرتے ہیں کہ جن گواہوں کو قتل کیا گیا تھا انہیں بھی انصاف ملے گا۔ ہندوؤں کے 77 سالہ مذہبی پیشوا آسارام باپو کے دنیا بھر میں 400 سے زائد آشرام ہیں اور دنیا بھر میں ان کے پیروکاروں کی تعداد کروڑوں میں ہے۔ ان پر کم سن بچوں اور لڑکیوں کے ساتھ زیادتی کے کئی مقدمات بھی درج ہیں لیکن صرف ایک مقدمے میں انہیں مجرم قرار دیا گیا ہے جس پر آسارام کے وکلائ نے عدالتی فیصلے کے خلاف عدالتِ عالیہ میں اپیل دائر کرنے کا فیصلہ کیا ہے۔ آسارام تقسیم ہند سے قبل سندھ میں پیدا ہوئے تھے اور قیام پاکستان کے بعد اہل خانہ سمیت بھارتی ریاست گجرات ہجرت کر گئے تھے۔

اسپین،اپنی چوری کی ویڈیوسامنے آنے پر حکمران جماعت کی رہنما مستعفی

ہسپانوی سیاست دان اور میڈرڈ کمیونیٹی کی صدر کرسٹینا سیفیونٹس نے شاپنگ مال میں چوری کی اپنی ویڈیو منظر عام پر آنے کے بعد عہدے سے استعفیٰ دے دیا ہے۔ برطانوی نشریاتی ادارے کے مطابق اسپین کی میڈرڈ کمیونیٹی کی 53 سالہ صدر کرسٹینا نے 2011 کی ایک ویڈیو لیک ہونے پر عوامی دباؤ کے پیش نظر اپنے عہدے سے استعفیٰ دے دیا ہے۔ ویڈیو میں کرسٹینا کو شاپنگ مال سے چرائے گئے سامان کو سیکیورٹی گارڈ کو واپس کرتے ہوئے دیکھا جا سکتا ہے۔ انہوں نے شاپنگ مال سے بڑھتی عمر کے اثرات کو کم کرنے والی دو کاسمیٹک کریم چرائی تھیں۔ کرسٹینا اسپین کی حکمراں جماعت پارٹیڈو پاپولر کی اہم رہنما ہیں جو گزشتہ ہفتے اپنی جعلی ڈگری کے خبروں کی وجہ سے مشکلات کا شکار رہی تھیں جس کے باعث انہیں اپنی جماعت اور عوام کی جانب سے مستعفی ہونے کے لیے شدید دباؤ کا سامنا تھا تاہم شاپنگ مال میں چوری کی ویڈیو منظر عام پر آنے کے بعد کرسٹینا نے اپنا استعفیٰ وزیراعظم ماریانو راجوئے کو پیش کر دیا ہے۔

"اسامہ بن لادن کے محافظ کو جرمنی حکومت ماہانہ وظیفہ دیتی ہے"

القاعدہ کے سابق سربراہ اسامہ بن لادن کا محافظ جرمنی میں مقیم ہے جہاں اسے حکومت کی جانب سے ماہانہ 1168 یورو وظیفہ بھی دیا جاتا ہے۔ بین الاقوامی خبر رساں ایجنسی کے مطابق تیونس سے تعلق رکھنے والا شخص سمیع اے 1997سے اپنی جرمن اہلیہ اور چار بچوں کے ہمراہ جرمنی کے شہر بوچم میں رہائش پذیر ہے جہاں حکومت کی جانب سے اسے 1168 یورو وظیفہ بھی دیا جاتا ہے۔ جرمن میڈیا کے مطابق یہ اطلاع مقامی حکومت نے دائیں بازو کی جماعت کی جانب سے ایک شہری سمیع اے کے بارے میں پوچھی گئی معلومات کے جواب میں دی۔ تاہم علاقائی حکومت نے مذکورہ شخص کی مکمل شناخت ظاہر نہیں کی ہے۔ مذکورہ شخص نے جہادیوں سے تعلق کی تردید کرتے ہوئے اپنے آبائی ملک جانے سے انکار کر دیا ہے کیوں کہ اسے تیونس میں تشدد کا نشانہ بنایا جانے کا خدشہ ہے حتیٰ کہ وہاں اسے جان کا خطرہ بھی لاحق ہو سکتا ہے۔ حکومتی ریکارڈ کے مطابق مذکورہ شخص نے 1999 میں جرمنی کی رہائش کا عبوری اجازت نامہ حاصل کیا تھا جس کے بعد ٹیکنالوجی کے حوالے سے متعدد کورسز بھی کیے اور 2005 میں جرمنی کے شہر بوچم منتقل ہوا۔ 2007 میں پناہ کی درخواست مسترد کر دی گئی کیونکہ حکام نے انھیں سیکیورٹی کے حوالے سے خطرہ قرار دیا تھا۔ جس کے بعد سے مذکورہ شخص کو ہر روز مقامی تھانے میں حاضری لگانی پڑتی ہے۔ انسداد دہشت گردی عدالت میں 2005 میں ایک مقدمے میں مذکورہ شخص کو اسامہ بن لادن کے محافظ کے طور پر ایک مقامی شخص نے شناخت کیا تھا جس کے بعد سمیع اے کے القاعدہ کے ساتھ روابط کی تفتیش کی گئی تاہم ان پر تاحال کوئی فردِ جرم عائد نہیں کی گئی ہے۔

بھارت کا کشمیر میں فوج کی 80اضافی کمپنیاں تعینات کرنے کا فیصلہ

مقبوضہ کشمیر میں جموں ریجن کے علاقے کٹھوعہ میں آٹھ سالہ ننھی آصفہ کی بے حرمتی اور قتل کے خلاف پورے مقبوضہ علاقے میں جاری بڑے پیمانے پر احتجاجی مظاہروں کے پیش نظر بھارت نے 28جون سے شروع ہونیوالی سالانہ امر ناتھ یاترا کیلئے بھارتی فوج کی اضافی کمپنیاں تعینات کرنے کا فیصلہ کیا ہے۔ بھارتی حکومت کے ایک عہدیدار نے نئی دہلی میں میڈیا کو بتایا ہے کہ مقبوضہ کشمیر کے کٹھ پتلی محکمہ داخلہ نے امرناتھ یاتراکے پر امن اور محفوظ انعقاد کیلئے نئی دلی سے اضافی فورسز کی تعیناتی کی درخواست کی تھی ۔ بھارتی حکومت نے کٹھ پتلی انتظامیہ کی درخواست منظور کرتے ہوئے فوج کی اضافی 80کمپنیاں جموں و کشمیر میں تعینات کرنے کا فیصلہ کیا ہے ۔ ان میں سے 35کمپنیاں جموں جبکہ 45وادی کشمیر میں تعینات کی جائیںگی۔

انڈونیشیا، تیل کے کنوئیں میں آگ لگنے سے10 افراد ہلاک، درجنوں زخمی

انڈونیشیا کے صوبہ آچے میں تیل کے کنوئیں میں آگ لگنے سے کم از کم 10 افراد ہلاک اور درجنوں زخمی ہو گئے۔ فرانسیسی خبر رساں ادارے کی رپورٹ کے مطابق تیل کا یہ غیر قانونی کنواں ایک رہائشی علاقے میں واقع تھا جس میں رات ڈیڑھ بجے آگ بھڑک اٹھی اور اس نے تین قریبی گھروں کو اپنی لپیٹ میں لے لیا۔ پولیس کے مطابق متاثرہ مکانات سے 10 لاشیں نکالی جا چکی ہیں اور اموات میں اضافے کا خدشہ ظاہر کیا جا رہا ہے۔ زخمی افراد کو مختلف ہسپتالوں میں منتقل کر دیا گیا ہے۔ کنوئیں میں لگی آگ بجھانے کی کوششیں جاری ہیں۔

ایران کی علاقائی سکیورٹی پر خلیجی ممالک کو مذاکرات کی دعوت

ایران نے خلیجی ممالک کو خطے کی سکیورٹی پر بات چیت کی دعوت دیتے ہوئے کہا ہے کہ وقت آ گیا ہے کہ بالادستی کے فریب سے نکلیں جس کے باعث تباہ کن جنگیں ہو چکی ہیں۔ ایران کے وزیر خارجہ جواد ظریف نے اقوام متحدہ کے اجلاس میں بات کرتے ہوئے خطے میں مذاکرات کے فورم کے قیام کی تجویز دی۔ ہم ہمسایہ ممالک کو دعوت دیتے ہیں کہ اس کوشش میں ہمارا ساتھ دیں۔ بالادستی کے فریب میں رہنا یا دوسروں کو نقصان پہنچا کر اپنی سکیورٹی حاصل کرنے کی کوشش سے تصادم ہوتا ہے۔ یہ بہت اہم ہے کہ اب اپنی قوت یکجا کرنے کی نئی پالیسی اپنائی جائے اور خطے میں سب سے طاقتور ہونے کی کوشش کو ترک کیا جائے۔ سکیورٹی بلاکس کی جگہ ایک نئے سکیورٹی نیٹ ورک قائم کیا جائے۔ یہ میزائل حملے سعودی جارحانہ کارروائیوں میں انفرادی اقدامات ہیں۔

جرمنی کا جدید ہتھیار خریدنے کا فیصلہ

جرمن فوج کی عسکری صلاحیت کے ناکافی ہونے کی رپورٹیں سامنے آنے کے بعد حکومت نے فوج کے لیے مزید ہتھیار خریدنے کا فیصلہ کیا ہے۔جرمن میڈیا کے مطابق وفاقی جرمن وزارت دفاع نے 18جدید ہتھیاروں کی فہرست تیار کی ہے جن کی مجموعی مالیت 25 ملین ڈالر بنتی ہے۔ جرمن حکومت نے گزشتہ برس2021تک ملکی دفاعی بجٹ 37 ارب یورو سے بڑھا کر 42.2 ارب یورو کرنے کا فیصلہ کیا تھا۔ جرمن وزارت خزانہ رواں ماہ آئندہ برس کے لیے بجٹ کا مسودہ تیار کرے گی، جسے وفاقی پارلیمان جولائی میں منظور کرے گی۔

بھارت میں انتہا پسندوں کے دوران نماز ہندوانہ نعرے

بھارتی حکومت کی مسلمان دشمنی نے ایک نئی کروٹ لے لی،نماز کے دوران ہندوانہ نعرہ لگائے اور گھروں میں نماز اداکرنے کی تنبیہہ کی، نمازیوں نے کوئی احتجاج نہیں کیا،صبر اور خاموشی اختیار کر کے حالات بگڑنے سے بچالئے،سلام مسلم بھائیوں کو جو چندسماج دشمن اور شرپسند عناصر کے اکسانے پر بھی مشتعل نہیں ہوئے اور صبر و تحمل کا مظاہرہ کیا ۔ بھارتی میڈیا کے مطابق نئی دہلی سے ملحق گڑگائوں کے نیگڑھ گائوں میں ہندوؤں نے نمازکیلئے موجود مسلمانوں کے سامنے کھڑے ہوکرہندوانہ نعرہ لگائے اور گھروں میں جاکر نماز پڑھنے کی بات کہی۔ اس واقعہ کی وڈیو سوشل میڈیا پر وائرل ہوگئی۔اس میں صاف نظر آرہا ہے کہ 8،10شرپسند سیکڑوں نمازیوں کے سامنے شرانگیز نعرے لگارہے ہیں تاہم نمازیوں نے اس کے خلاف کوئی احتجاج نہیں کیا اور ان کی باتوں اور نعروں کاکوئی جواب نہ دیتے ہوئے صبر اور خاموشی اختیار کی اور حالات بگڑنے سے بچالئے۔عام آدمی پارٹی کی خاتون رہنما الکا لامبا نے اس وڈیو کو شیئر کرتے ہوئے ٹویٹر کے اکائونٹ پر تحریر کیا کہ میں سلام کرتی ہوں اپنے سبھی مسلم بھائیوں کو جو چندسماج دشمن اور شرپسند عناصر کے اکسانے پر بھی مشتعل نہیں ہوئے۔ اپنے صبر و استقامت سے شرپسندوں کے عزائم ناکام بنادیئے۔

بھارت، سیکیورٹی فورسز کی علیحدگی پسندوں کے خلا ف کارروائی،32 ہلاک

بھارت کی ریاست مہاراشٹر میں 2روز میں سیکیورٹی فورسز نے علیحدگی پسندوں کے خلاف کارروائیوں کرکے مبینہ مقابلوں میں 32 افراد کو ہلاک کردیا ۔ بھارتی نشریاتی ادارے کے مطابق مہاراشٹر کے علاقے جملگٹا میں بھارتی فورسز نے مبینہ مقابلے میں 6 علیحدگی پسندوں کو ہلاک کیا،2روز قبل کیے گئے بھارتی پولیس کے مبینہ انکائونٹر کے مقام سے علیحدگی پسندوں کی مزید 10لاشیں برآمد کی گئی ہیں۔

افغانستان ، سیکیورٹی چیک پوسٹ پر حملہ ،5اہلکار ہلاک

افغانستان میں دہشتگردوں کے حملے میں پانچ سیکیورٹی اہلکار ہلاک ہوگئے ۔ غیر ملکی خبر رساں ادارے کے مطابق صوبہ فراہ میں شدت پسندوں نے ایک حفاظتی چوکی کو نشانہ بنایا، جس کے نتیجے میں5فوجی اہلکار ہلاک اور 3زخمی ہوگئے۔ انہوں نے کہا کہ 3گھنٹے تک جاری رہنے والے فائرنگ میں 6طالبان عسکریت پسند بھی مارے گئے ، طالبان نے ابھی تک اس حملے کی ذمہ داری قبول نہیں کی۔

خطے سے داعش کے خاتمے کیلئے پر عزم ہیں ، امریکہ کا اعلان

امریکی حکومت نے اعلان کیا ہے کہ وہ افغانستان کے دارالحکومت کابل میں گزشتہ روز ہونے والے ووٹر رجسٹریشن سنٹر پر دھماکے کے ردعمل اور ملوث ارکان کیخلاف کارروائی کرنے اور داعش کے خاتمے کیلئے پر عزم ہے۔ افغانستان میں تعینات امریکی قائم مقام سیکرٹری آف سٹیٹدنے کہا کہ ہم دہشت گردوں کے خلاف جنگ میں افغان حکومت اور وہاں کی عوام کے ساتھ کھڑے ہیں، ہم افغانستان اور عالمی شراکت داروں کے ساتھ کابل میں داعش کے خاتمے کیلئے پر عزم ہیں ، جس نے خوفناک حملے کی ذمہ داری قبول کی تھی ۔

آرمینیا کے وزیر اعظم مستعفی،دوہفتوں سے جاری احتجاج ختم

آرمینیا کے وزیر اعظم سیرگ سارک زائن اپنے عہدے سے مستعفی ہو گئے جس کے بعد ملک بھر میں گزشتہ دو ہفتوں سے جاری احتجاج ختم ہو گیا ۔ سرکاری ٹیلی ویږن کے مطابق سارک زائن کے خلاف دوہفتوں سے زائد کے عرصے سے مظاہرے جاری تھے، جس وجہ سے وہ عہدہ چھوڑنے پر مجبور ہوئے۔ مظاہرین کا الزام تھا کہ دس سالہ وزارت عظمٰی کے بعد بھی سارک زائن اقتدار کسی دوسرے کے حوالے کرنے پر تیار نہیں تھے۔

مقبوضہ کشمیر، پلوامہ میں بھارتی فوجیوں کے ہاتھوں مزید 4نوجوان شہید

مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع پلوامہ میں 4 کشمیری نوجوانوں کو شہید کر دیا ۔ کشمیر میڈیا سروس کے مطابق فوجیوں نے نوجوانوں کو ضلع میں ترال کے علاقے گوئی ٹینگو لام میں تلاشی اور محاصر ے کی کارروائی کے دوران شہید کیا۔ اس سے قبل ایک حملے میں اجے کمار نامی ایک بھارتی فوجی اور سپیشل پولیس آفیسر لطیف گوجری ہلاک ہوگیا ۔ ادھر مقبوضہ کشمیر میں کشیدگی میں اضافہ ہو گیا، بھارت کی جانب مظاہرین کو روکنے کے لئے سخت سیکورٹی انتظامات کر لئے گئے،طلبا احتجاج کو منتشر کرنے کے لئے آنسو گیس اور پیلٹ گن کا آزادانہ استعمال کیا گیا، متعدد طلبائ و طالبات زخمی ہوئے اور 150سے زائد طلبا کو گرفتار کر لیا گیا۔ بھارتی میڈیا کے مطابق مقبوضہ کشمیر کے کئی علاقوں میں حالات کشیدہ ہیں اور احتجاجی مظاہروں کو روکنے کے لئے سکیورٹی کے سخت انتظامات کئے گئے۔ مقبوضہ کشمیر کے علاقوں شوپیان، اننت ناگ، بانڈی پورہ، سوپور، کھنہ بل اور دوسرے علاقوں میں طلبا نے احتجاج کیا فورسز نے مظاہرین کو منتشر کرنے کے لئے ٹیر گیس اور پیلٹ کا استعمال کیا جس کے دوران3 اہلکاروں اور نصف درجن طلبا و طالبات سمیت30افراد زخمی ہوئے،جن میں کئی طلبا پیلٹ کا نشانہ بھی بن گئے۔اس دوران بارہمولہ اور گاندربل میں 150کے قریب طلبا کو حراست میں لیا گیا۔واضح رہے کہ کھٹوعہ کی کمسن بچی کی آبرو ریزی اور قتل کے خلاف گزشتہ2ہفتوں سے احتجاجی مظاہروں کا سلسلہ جاری ہے۔ انتظامیہ کی طرف سے سرینگراور دیگر حساس علاقوں میں کالجوں اور ہائر سکینڈری اسکولوں کو بند رکھنے کے باوجود احتجاجی مظاہروں کا سلسلہ جاری رہا۔احتجاجی مظاہرین نے اپنے ہاتھوں میں بینرز اور پلے کارڈ اٹھا رکھے تھے جن پر کمسن بچی کے حق میں مختلف نعرے درج تھے۔

امریکا اور اتحادی دہشتگردوں کے حمایتی ، بشار الاسد

شام کے صدر بشار الاسد نے کہا ہے کہ ملک سے دہشت گردی کا مکمل خاتمہ ہونے تک جنگ جاری رہے گی۔ دمشق میں ایران کے نائب وزیر خارجہ حسین جابری انصاری سے ملاقات میں انہوں نے کہا کہ شام پر ان ملکوں کے براہ راست حملے بھی دہشت گردی کے خلاف جنگ کو نہیں روک سکتے ، امریکا اور اس کے مغربی اتحادیوں نے شام کے بحران کے ابتدائی ایام سے ہی دہشت گردوں کی حمایت کی ۔ ایرانی نائب وزیر خارجہ نے کہا کہ شام پر امریکا فرانس اور برطانیہ کے حملے کی اصل وجہ شامی فوج کی کامیابی تھی، جارح طاقتوں کو خوف ہے کہ شامی فوج کی کامیابی کا سلسلہ اسی طرح شام کے دیگر علاقوں میں بھی تیز رفتاری کے ساتھ جاری رہے گا۔

انڈونیشیا ، کرپشن پر سابق سپیکر کو15 سال قید و جرمانہ

انڈونیشیا کے سابق سپیکر ستیا نوانتو کو کرپشن الزام میں 15 سال قید اور 36 ہزار ڈالر کے جرمانے کے ساتھ 5 سال کے لئے کسی بھی عوامی عہدے کے لیے نااہل کرنے کی سزا سنا دی گئی۔ جکارتہ میں جسٹس یانتو کی سربراہی میں پانچ رکنی بینچ نے سابق سپیکر ستیا یوانتو کے خلاف مقدمے کی سماعت کی۔ ان پر قومی برقیاتی کارڈ سکیم میں غبن کر کے ملکی خزانے کو 170 ملین ڈالر کا نقصان پہنچانے کا الزام تھا۔ عدالتی بینچ نے شواہد اور فریقین کے دلائل سننے کے بعد سابق سپیکر کو قصور وار قرار دیا ۔ علاوہ ازیں عدالت نے سابق سپیکر کو علیحدہ سے 7.6 ملین ڈالر کی رقم سرکاری خزانے میں جمع کرانے کی بھی ہدایت کی۔ ستیا نوانتو نے سزا کے خلاف اپیل کرنے کے لئے عدالت سے کچھ وقت مانگا جس پر عدالت نے انہیں اپنے وکلا سے مزید مشاورت کے لئے دو دن کا وقت دے دیا۔

روسی وزیر خارجہ سے شی پنگ کی ملاقات ، پیوٹن کو دورہ کی دعوت

چین کے صدر شی جن پنگ نے بیجنگ کے عظیم عوامی ہال میں روس کے وزیر خارجہ سرگئی لاروف سے ملاقات کی ۔ چینی نشریاتی ادارے کے مطابق ملاقات کے دوران چینی صدر شی جن پنگ نے کہا کہ وہ رواں سال جون میں منعقد ہونے والی شنگھائی تعاون تنظیم کی سربراہی کانفرنس میں روسی صدر ولادی میر پیو ٹن کی شرکت کی امید رکھتے ہیں، امید ہے کہ ان کے ساتھ نئے عہد میں چین اور روس کے تعلقات کی ترقی اور شنگھائی تعاون تنظیم کے دوسرے رکن ممالک کے ساتھ تنظیم کی ترقی کیلئے منصوبہ بندی کی جائےگی۔

امریکا کا اپنے عملے کو نکارا گوا چھوڑنے کا حکم

امریکی وزارت خارجہ نے اپنے سفارتی عملے کو اہلخانہ سمیت بدامنی کے شکار ملک نکارا گوا سے نکل جانے کے احکامات جاری کر دیئے ۔ جرمن نشریاتی ادارے کے مطابق نکارا گوا میں حکومت مخالف احتجاجی مظاہرے شدت اختیار کرتے جا رہے ہیں جبکہ اب تک ایسے مظاہروں کی وجہ سے متعدد افراد ہلاک بھی ہو چکے ہیں۔ حکومت فلاح و بہبود کے موجودہ نظام کو ختم کرنا چاہتی ہے، لیکن بڑے پیمانے پر ہونے والے مظاہروں کی وجہ سے یہ منصوبہ فی الحال منسوخ کر دیا گیا ۔

چین؛میوزک سنٹر میں آتشزدگی، 18افراد ہلاک،5 زخمی

چین کے میوزک سنٹر میں آتشزدگی سے 18 افراد ہلاک اور پانچ زخمی ہوگئے۔ بین الاقوامی خبر رساں ایجنسی کے مطابق شمالی چین کے جنوب مشرقی شہر کنگیان میں واقع ایک میوزک سنٹر میں اچانک آگ بھڑک اٹھی جس نے دیکھتے ہی دیکھتے پورے سٹور کو اپنی لپیٹ میں لے لیا ، اطلاع ملتے ہی ریسکیو اہلکار موقع پر پہنچ گئے اور امدادی کارروائیاں شروع کر دیں ، انہوں نے ہلاک و زخمی افراد کو باہر نکال کر ہسپتال منتقل کر دیا ۔ آگ لگنے کی وجوہات کا پتا چلانے کیلئے تحقیقات جاری ہیں ۔

جنوبی اور شمالی کوریا کے درمیان مذاکرات کا تیسرا دور شروع

جنوبی کوریا اور شمالی کوریا کے اعلیٰ حکام کے درمیان مذاکرات کا تیسرا دور شروع ہوگیا ، جسے دونوں ملکوں کے مستقبل کے تعلقات کے حوالے سے انتہائی اہم قرار دیا جارہا ہے۔ غیر ملکی میڈیا رپورٹس کے مطابق سرحدی علاقے پانمن جوم میں ہونےوالے اس اعلیٰ سطح کے اجلاس میں دونوں ملکوں کے سربراہی اجلاس کا ایجنڈا تیار کیا جارہا ہے جو آئندہ اجلاس میں متوقع ہے۔ سیئول اور پیانگ یانگ کے درمیان ہونے والے اتفاق رائے کے مطابق جنوبی کوریا کے صدر مون جائے ان اور شمالی کوریا کے رہنما کم جونگ ان 27 اپریل کو سرحدی شہر پانمن جوم میں ایک دوسرے سے ملاقات اور دونوں کوریاؤں کے درمیان اتحاد کے بارے میں تبادلہ خیال کریں گے۔ دونوں کوریاؤں کے درمیان تعلقات کی بہتری، سرحدوں پر امن و امان کا قیام اور جزیرہ نمائے کوریا کے بحران کا پائیدار حل، مون جائے ان اور کم جونگ ان کے درمیان ملاقات کا بنیادی ایجنڈا ہوگا۔ دوسری جانب جاپان اور کینیڈانے شمالی کوریا کے خلاف اقوام متحدہ کی عائد کردہ پابندیاں جاری رکھنے کی ضرورت پر زور دیا ۔

سعودی عرب، یمنی حوثیوں کے داغے گئے دو اور بیلسٹک میزائل تباہ

سعودی عرب کی فضائی دفاعی فورسز نے یمن سے حوثی شیعہ باغیوں کے سرحدی شہر جازان کی جانب داغے گئے دو اور بیلسٹک میزائلوں کو فضا ہی میں ناکارہ بنا دیا ۔ عرب ٹی وی کے مطابق حوثی شیعہ باغیوں کا دو روز میں سعودی عرب کی جانب یہ دوسرا میزائل حملہ ہے۔یادرہے سعودی فورسز نے گذشتہ روز سرحدی شہر نجران کی جانب داغے گئے ایک میزائل کو فضا ہی میں تباہ کردیا تھا اور ایک اور میزائل اس سرحدی شہر کے نزدیک واقع صحرا ئی علاقے میں گرا تھا۔

سلامتی کونسل اجلاس،شامی بحران کے حل کےلئے کوششیں بڑھانے پر اتفاق

اقوا م متحدہ کی سلامتی کونسل کے رکن ممالک نے شامی بحران کے حل کے واسطے کوششوں کو بڑھانے اور اختلافات ختم کرنے پر اتفاق کیاہے ۔ غیرملکی میڈیا کے مطابق ایک سفارت کار نے بتایا کہ شام کے بحران کے حوالے سے اقوام متحدہ کی سلامتی کونسل کے رکن ممالک کے سفیروں کا اجلاس سویڈن میں اختتام پذیر ہو گیا ہے ۔ اجلاس کے شرکا نے بحران کے حل کے واسطے کوششوں کو بڑھانے اور اختلافات ختم کرنے پر اتفاق کیا ہے ۔ ادھر روسی وزیر خارجہ سیرگئی لاوروف نے کہا ہے کہ شام کو ایس 300 طرز کے جدید میزائل فراہم کرنے کا فیصلہ فی الحال نہیں کیا گیا۔ اس حوالے سے کسی بھی معاہدے کو خفیہ نہیں رکھا جائے گا۔ ایک روسی سفارت کار کے مطابق اسرائیل نے روس سے اپیل کی ہے کہ وہ شام کو جدید میزائل فراہم نہ کرے۔

یمن، صالح الصماد حملے میں ہلاک ،مہدی المشاط نیاحوثی سربراہ مقرر

یمن میں حوثی باغیوں کی سپریم سیاسی کونسل کا سربراہ صالح الصماد عرب اتحادی افواج کے فضائی حملے میں ہلاک ہوگیا ۔ حوثی ملیشیا نے ایک بیان میں اپنے لیڈر کی ہلاکت کی تصدیق کردی ہے، صالح الصماد کا نام عرب اتحاد کو مطلوب یمنی حوثیوں میں دوسرے نمبر پر تھا۔ غیر ملکی میڈیا رپورٹس کے مطابق صالح الصماد صوبے الحدیدہ کے جنوب میں واقع علاقے البریہی میں عرب اتحاد کی جانب سے ایک مکان پر کیے جانے والے فضائی حملے میں مارا گیا۔ مقتول کو حوثی تحریک کے سربراہ عبدالملک الحوثی کے بعد باغیوں کا دوسرا بڑا لیڈر شمار کیا جاتا تھا۔ جبکہ حوثی ملیشیا نے انقلابی کونسل کے سربراہ اور تنظیم کے دوسرے اہم ترین لیڈر صالح الصماد کی عرب اتحادی فوج کے حملے میں ہلاکت کے بعد مہدی المشاط کو تنظیم کا نیا سربراہ مقرر کر دیا ۔ عرب ٹی وی کے مطابق مہدی المشاط رشتے میں حوثی گروپ کے سربراہ عبدالملک الحوثی کا داماد ہے۔

ٹورنٹو، ڈرائیور نے وین راہگیروں پر چڑھا دی، 10افراد ہلاک اور 15 زخمی

کینیڈا کے شہر ٹورونٹو میں پولیس حکام نے کہا ہے کہ ایک ڈرائیور نے اپنی وین فٹ پاتھ پر چڑھا کر راہگیروں کو روند ڈالا جس سے 10افراد ہلاک اور 15 زخمی ہوئے ہیں۔ پولیس نے کہا کہ جس جگہ یہ واقعہ پیش آیا ہے وہ کافی مصروف علاقہ ہے۔ پولیس حکام نے وین ڈرائیور کو حراست میں لیا ہے، حراست میں لیا گیا ڈرائیور 25 سالہ ایلک مینا سیان ہے۔ پولیس کے مطابق ایلک کی جانب سے یہ اقدام بظاہر جان بوجھ کر کیا گیا ہے۔

شمالی کوریا ، بس کو حادثہ ، 36افراد ہلاک

شمالی کوریا میں بس حادثے میں 32 چینی سیاحوں سمیت 36 افراد ہلاک ہو گئے۔ جرمن نشریاتی ادارے کے مطابق چینی وزارت خارجہ کے ترجمان لو کانگ نے ہلاکتوں کی تصدیق کرتے ہوئے بتایا کہ یہ حادثہ رات گئے شمالی کوریا کے جنوبی صوبے میں پیش آیا، جس میں 32 چینی سیاح اور 4 شمالی کوریائی باشندے ہلاک ہو گئے اور دو چینی سیاح شدید زخمی ہیں ، تاحال حادثے کی وجوہات بیان نہیں کی گئیں۔ واضح رہے کہ ہر سال چینی شہری ہی سب سے بڑی تعداد میں سیاحت کی غرض سے شمالی کوریا کا سفر کرتے ہیں۔