27 مئی 2018
تازہ ترین
جہان سپیشل

عدالت عظمیٰ نے دوہری شہریت کی بنیاد پر نااہل ہونے والے اراکین پارلیمان کی نظر ثانی درخواستوں کا تحریری حکم نامہ جاری کردیا۔ جسٹس اعجازالاحسن کے تحریرکردہ13صفحات پر مشتمل فیصلہ میں سابق اراکین سینیٹ، قومی وصوبائی اسمبلی کو ہدایت کی گئی ہے کہ30 روز میں مالی مراعات واپس کرنے کی مد میں فی کس 5لاکھ روپے سیکرٹری سینیٹ، قومی و صوبائی اسمبلی کے پاس جمع کرائیں۔ چیف جسٹس میاں ثاقب نثار کی سربراہی میں 3رکنی بینچ نے مذکورہ کیس 2 مئی کو سن کر مختصر فیصلہ سنایا تھا جس کا تحریری فیصلہ اب جاری کیا گیاہے۔ فیصلہ میں کہا گیاکہ ریکارڈ کا جائزہ لینے سے پتہ چلتا ہے کہ 2008 کے عام انتخابات کے دوران کاغذات نامزدگی میں دوہری شہریت ظاہر کرنے کا کوئی کالم موجود نہیں تھا اور کچھ ارکان پارلیمان بیرون ملک پیدا ہوئے، اس لیے ان کے پاس دوہری شہریت تھی۔ عدالت نے درخواست گزاروں کیخلاف دوہری شہریت کی بنیاد پر درج فوجداری مقدمات ختم کرنے کی ہدایت کرتے ہوئے قرار دیا کہ ججوں کی پنشن کیس کے فیصلے کی تناظر میں دوہری شہریت کی بنیاد پر نااہل ہونے والے اراکین پارلیمنٹ سے مالی مراعات اور اخراجات کی مد میں خرچ ہونے والی رقوم کی واپسی کے معاملے میں عدالتی فیصلے پر نظر ثانی کرتے ہوئے ہردرخواست گزار فی کس پانچ لاکھ روپیہ ایک ماہ میں جمع کرائے۔ عدالت نے 20 ستمبر 2012 کے فیصلہ کو جزوی طور پر تبدیل کیاہے،عدالت نے فیصلہ پر عملدرآمد کی رپورٹ رجسٹرار سپریم کورٹ کے پاس جمع کرانے کی ہدایت بھی کی ہے۔
image

 شہر قائد کے لوگ ایک بار پھر شدید اور جھلسادینے والی گرمی کے لیے تیار رہیں محکمہ موسمیات نے ہیٹ ویوکی نئی وارننگ جاری کرتے ہوئے شہریوں کواگلے تین روز تک محتاط رہنے کی ہدایت کی ہے۔ رمضان المبارک کے  مقدس مہینے کے آغاز کے ساتھ ہی گرمی نے کراچی میں ڈیرے ڈال لیے ہیں گزشتہ ہفتے شدید، دھوپ اور سمندری ہوائوں کی بندش نے شہریوں کا جینا مشکل کردیاتھا تاہم گزشتہ دوروز سے سمندری ہوائیں چلنے کے باعث شہریوں کی جان میں جان آئی تھی کہ محکمہ موسمیات نے ایک بار پھر ہیٹ ویو کی وارننگ جاری کردی ہے۔ محکمہ موسمیات کے مطابق کراچی کا موسم آج بھی گرم اور خشک رہے گا جب کہ آج زیادہ سے زیادہ درجہ حرارت 37 سے 39 ڈگری سینٹی گریڈ تک جاسکتا ہے۔ آج صبح 10 بجے کراچی کا درجہ حرارت 34 ڈگری سینٹی گریڈ ریکارڈ کیاگیا۔ کراچی میں ایک بار پھر ہیٹ ویو کی وارننگ کے پیش نظر شہر میں اگلے تین روز تک درجہ حرارت 42 ڈگری سینٹی گریڈ تک رہے گا۔ لہٰذا شہری صبح 9 بجے سے شام 4 بجے تک غیر ضروری طور پر باہر نہ نکلیں ، ہلکے رنگوں کے ڈھیلے ڈھالے کپڑے پہنیں اور سرپر گیلا کپڑا رکھیں۔ یہ احتیاطی تدابیر اختیار کرنے سے ہیٹ ویو اورگرمی کی شدت سے بچا جاسکتا ہے۔
image

 انسداد دہشت گردی کی خصوصی عدالت نے داعش کے کارکن کو جلسے میں دھماکہ کرنے  کی دھمکی دینے پر ایک سال تک مفت تعلیم دینے کا حکم دیا ہے۔ انسداد دہشت گردی کی خصوصی عدالت کے جج اصغر خان نے چکوال میں کالعدم تنظیم داعش کے کارکن انعام الحق کو مسلم لیگ کے جلسے کو بم سے اڑانے کی تحریری دھمکی دینے کے مقدمے میں جرم ثابت ہونے پر ایک سال تک مقامی ہائی سکول میں مفت تعلیم دینے کا حکم دیا ہے، یہ فیصلہ ملزم کے کم عمر اور اعلیٰ تعلیم یافتہ ہونے پر نرم رویہ اختیار کرتے ہوئے دیا گیا، ایک سال بعد ہیڈ ماسٹر کی طرف سے اچھی چال چلن کے سرٹیفکیٹ پر ملزم کو چھوٹ دے دی جائے گی۔
image

ایم کیو ایم پاکستان پی آئی بی کے سربراہ ڈاکٹر فاروق ستار نے کہا ہے کہ وزیر اعلیٰ نے پاکستان بنانے والوں کے خلاف بات کی ، ہمارے وجود  پر لعنت بھیجی جا رہی ہے کراچی کے شہریوں کو تیسرے درجے کا قرار دے دیا گیا ہے،  اب بات ہماری عزت نفس پر آچکی ہے ، ہم نے پاکستان کے قیام سے اس کی بقا تک کی تحریک چلائی ، وزیر اعلیٰ سندھ نے ہماری قربانیوں کو رد کیا۔ لیاقت آباد میں وزیر اعلیٰ سندھ کے بیان کے خلاف احتجاجی مظاہرے سے خطاب کرتے ہوئے انہوں نے کہا کہ کراچی والے اپنے وجود کی جدو جہد کر رہے ہیں حقوق مانگنے پر حقوق دینا تو دور ہمارے لئے نا زیبا الفاظ بھی استعمال کئے جا رہے ہیں ،   وزیر اعلیٰ سندھ نے جس طرح کے الفاظ استعمال کئے انہیں نہیں کرنا چاہئے تھا۔ انہوں نے کہا کہ متروکہ سندھ پر بس ہمارا ہی حق ہے اب غیر مشروط کردار ادا نہیں کریں گے ، فیصلہ کریں گے۔۔
image

امریکہ کےلئے نامزد پاکستانی سفیرعلی جہانگیر صدیقی واشنگٹن  روانہ ہوگئے ، وہ 28 مئی کو امریکہ میں پاکستان کے نئے سفیر کی حیثیت سے ذمہ داریاں سنبھالیں گے۔میڈیا رپورٹ کے مطابق امریکہ کےلئے نامزد پاکستانی سفیر علی جہانگیر صدیقی28 مئی کو واشنگٹن میں عہدے کا چارج سنبھالیں گے۔ ذرائع کے مطابق علی جہانگیر صدیقی اپنے نئے سفارتی پاسپورٹ پر سفر کریں گے۔ ان کے ذمہ داریاں سنبھالنے کے بعد امریکہ میں پاکستانی سفیر اعزاز چودھری 29 مئی کو وطن واپس پہنچیں گے۔وزیراعظم شاہد خاقان عباسی نے 8 مارچ 2018 کو ان کی نامزدگی کی منظوری دی تھی۔ علی جہانگیر صدیقی وزیراعظم پاکستان کے معاون خصوصی جہانگیر صدیقی کے بیٹے ہیں۔ علی جہانگیر صدیقی نجی ایئرلائن ایئربلیو کے ڈائریکٹر بھی رہے۔  
image

تلہ گنگ روڈ پر موسی خیل کے قریب  خوفناک ٹریفک حادثے میں 7افراد جاں بحق ہوگئے۔ نجی ٹی وی کے مطابق میانوالی میں تلہ گنگ روڈ موسیٰ خیل کے مقام پر کیری ڈبہ اور ٹرک میں خوفناک تصادم ہوا حادثے کے نتیجے میں ایک ہی خاندان کے 7 افراد موقع پر ہی جان بحق ہو گئے ، جاں بحق ہونے والوں میں 4مرد،  2خواتین اور ایک بچہ شامل ہیں،  لاشوں کو ڈسٹرکٹ ہیڈ کوارٹر اسپتال منتقل کیا گیا، جاں بحق افراد کا تعلق کلری سے بتایا جاتا ہے۔
image

عوامی مسلم لیگ کے سربراہ شیخ رشید نے کہا ہے کہ شہباز شریف پر نندی پور پراجیکٹ اور میٹرو بس پراجیکٹ کے کیسز ہیں، یہ جب کھلیں گے تو کرپشن سامنے آجائے گی۔ سیاست میں کوئی چیز حرف آخر نہیں ہوتی۔ لاہور کے نجی ہوٹل میں افطار ڈنر کی تقریب سے خطاب کرتے ہوئے انہوں نے کہا  کہ ملک میں جتنی کرپشن ہے اس پر چار پانچ نیب ہونے چاہئیں۔ سب ایم این اے اور ایم پی اے تو ٹھیکیدار بن چکے ہیں اور پیسے کما رہے ہیں۔ انہوں نے کہا کہ میرا صوبائی سیاست سے کوئی تعلق نہیں، اس ماہ کے آخر تک حلقہ بندیاں بھی ہوجائیں گی۔ اگر زیادہ وقت لگتا ہے تو بھی کوئی مسئلہ نہیں۔ کچھ دنوں کے لیے انتخابات آگے ہونے سے قیامت نہیں آجائے گی۔ انہوں نے مزید کہا کہ شہباز شریف پر بہت سے مقدمات ہیں۔ نندی پور، میٹرو بس پراجیکٹ کیس کھلیں گے تو کرپشن سامنے آجائے گی۔ انہوں نے کہا کہ نوازشریف ملک دشمنی میں ایجنٹ کا کام کر رہے ہیں۔ باپ کہتا ہے کمپنیاں بیٹوں کی ہیں، بیٹی کہتی ہے بھائیوں کی ہیں۔ مریم نواز نے نوازشریف کی قبر کھود دی ہے۔  
image

پاکستان میں شہریوں کے لیے بڑی خوشخبری ہے کہ گاڑیوں کی چوری روکنے کے لیے اسلام آباد میں اسمارٹ نمبر پلیٹ متعارف کرا دی گئی ہے۔ وفاقی دارالحکومت میں گاڑیوں کی چوری کی روک تھام کے لیے بڑے فیصلے کئے گئے ہیں۔ دہشت گردی اور جرائم میں استعمال کی جانے والی گاڑیوں کی شناخت اور گاڑیوں کی چوری روکنے کے لیے اسلام آباد میں ملک کی پہلی سیکیورٹی خصوصیات کی حامل نمبر پلیٹس جاری کرنے کا فیصلہ کیا گیا ہے۔ چیف کمشنر اسلام آباد آفتاب اکبر درانی نے کہا کہ ایک نئی نمبر پلیٹ متعارف کروا رہے ہیں جو سیف سٹی کیمروں سے منسلک ہوں گی۔ انہوں نے کہا کہ گاڑی چوری ہو جائے یا حادثے کی صورت میں گاڑی سیف سٹی کے کیمرے سے فورا پک ہو جائے گی۔ انہوں نے کہا  کہ ہمیں اطلاع ہے کہ اسلام آباد میں نان کسٹم، ٹمپرڈ اور اسمگل شدہ گاڑیاں بھی موجود ہیں لیکن اسمارٹ نمبر پلیٹ سے اس قسم کی گاڑیاں بھی بچ نہیں سکیں گی۔ اسلام آباد کی نئی نمبر پلیٹ ناصرف ریفلیکٹو ہو گی بلکہ مخصوص سیکیورٹی فیچرز کی حامل تو ہو گی ہی تاہم 5 سال کے عرصے میں پلیٹ میں خرابی پیدا ہونے کی صورت میں شہری کو نئی نمبر پلیٹ مفت فراہم کی جائے گی۔ ڈائیریکٹر ایکسائز اسلام آباد محمد بلال اعظم نے کہا کہ آن لائن ٹوکن کا اجرا بھی کرایا گیا ہے، اس کے علاوہ چالان ہونے پر واجب الادا ٹوکن بھی موقع پر ادا کرنا ہو گا، اسی طرح گاڑیوں کی جعلی ٹرانسفر روکنے کا بھی فول پروف انتظام بھی کر لیا گیا ہے۔ انہوں نے بتایا کہ گاڑیوں کے آن لائن ٹوکن کے سلسلے میں نادرا سے معاہد ہو گیا ہے۔ اس کے علاوہ گاڑیوں کی ٹرانسفر کے لیے بائیو میٹرک تصدیق کے سسٹم کا آغاز بھی کر رہے ہیں۔  
image

بلاول بھٹو زرداری نے کہا ہے کہ  پیپلز پارٹی ہمیشہ غریبوں کے حقوق کی بات کرتی ہے، سندھ میں امن و امان کی صورتحال اطمینان بخش، صاف پانی پراجیکٹ پنجاب سے زیادہ بہتر ہے۔  نجی ٹی وی کے مطابق کراچی میں تقریب سے خطاب کرتے ہوئے انہوں نے کہا کہ پورے صوبے میں امن و امان کی صورتحال بہتر ہے۔ صوبے میں پانی کا مسئلہ ہے پھر بھی سندھ کا صاف پانی پراجیکٹ پنجاب سے زیادہ بہتر ہے، پینے کے پانی کیلئے آر او پلانٹ لگائے گئے ہیں۔ انہوں نے کہا کہ تھر کے حوالے سے پروپگنڈا کیا گیا، پیپلز پارٹی ہمیشہ غریبوں کے حقوق کی بات کرتی ہے۔ بینظیر انکم سپورٹ پروگرام کے ذریعے غریبوں کی مدد کی، پیپلز پارٹی نے غریبوں کو بلاسود قرضے دیئے، سندھ میں تعلیم اور صحت کے شعبے میں کافی بہتری آئی ہے۔ پورے صوبے میں امن و امان کی صورتحال بہتر ہے۔بلاول بھٹو نے مزید کہا کہ خواتین کو با اختیار کر رہے ہیں تاکہ وہ کاروبار کر سکیں، غریب خواتین کو بلاسود قرضے فراہم کر رہے ہیں۔  
image

 قومی اسمبلی میں قائد حزب اختلاف خورشید شاہ نے کہا ہے کہ نگراں وزیر اعظم کے نام پر اتفاق نہ ہونے کے باعث معاملہ پارلیمانی کمیٹی میں جائے گا جس میں اپوزیشن کی جانب سے چار نام دینے کا اختیار میرے پاس ہے لیکن ہمیشہ کی طرح سب کو ساتھ لے کر چلوں گا اور پارلیمانی کمیٹی میں پیپلز پارٹی کی طرف سے شیری رحمان اور نوید قمر کے نام دیئے جائیں گے جبکہ تحریک انصاف اور ایم کیو ایم کا ایک ایک رکن شامل ہو گا ۔ تفصیلات کے مطابق قومی اسمبلی میں قائد حزب اختلاف سید خورشید شاہ نے کہا ہے کہ تمام تر کوشش کے باوجود نگراں وزیر اعظم کے نام پر اتفاق نہیں ہو سکا اس لئے معاملہ اب پارلیمانی کمیٹی میں جائے گا ۔ پارلیمانی کمیٹی میں اپوزیشن کی جانب سے چار نام دینے کا اختیار میرے پاس ہے لیکن ہمیشہ بطور سیاست دان سب جماعتوں کو ساتھ لے کر چلا ہوں اور اب بھی دیگر اپوزیشن جماعتوں کو ساتھ لے کر چلوں گا انہوں نے کہا کہ پارلیمانی کمیٹی میں شیری رحمان اور نوید قمر پیپلزپارٹی کی نمائندگی کریں گے جبکہ تحریک انصاف اور ایم کیو ایم کا بھی ایک ایک رکن شامل ہو گا ۔ انہوں نے کہا ہے کہ اب بھی پرامید ہوں کہ پارلیمانی کمیٹی متفقہ اور کثرت رائے سے نگراں وزیر اعظم کے نام کا فیصلہ کر لے گی لیکن اگر اتفاق رائے نہ ہو سکا تو معاملہ الیکشن کمیشن میں جائے گا ۔
image

  وفاقی بجٹ برائے سال 2019-2018 کو کالعدم قرار دینے کے لئے درخواست سپریم کورٹ رجسٹرار آفس کے اعتراضات دور کر کے دوبارہ دائر کر دی گئی درخواستگزار نے  موقف اختیار  کیا ہے  کہ موجودہ حکومت کو مدت پوری ہونے کی بنا پر وفاقی بجٹ پیش کرنے کا اختیار ہی حاصل نہیں، مفتاح اسماعیل کو بجٹ پیش کرنے کا غیر قانونی اختیار سونپاگیا ۔ درخواست سپریم کورٹ رجسٹرار آفس کے اعتراضات دور کر کے دوبارہ دائر کر دی گئی ہے  دائر درخواست میں کہا گیا ہے کہ وفاقی بجٹ کے خلاف درخواست کی سماعت کا ملک میں کوئی اور فورم موجود نہیں۔ آئین کے آرٹیکل 80 کے تحت حکومت اپنی معیاد کے اندر رہتے ہوئے سالانہ بجٹ ہر سال پیش کرنے کی پابند ہے،موجودہ حکومت کو مدت پوری ہونے کی بنا پر وفاقی بجٹ پیش کرنے کا اختیار ہی حاصل نہیں، حکومت نے وفاقی بجٹ پیش کر کے اپنے اختیار سے تجاوز کیا جو کہ ماورائے آئین اقدام ہے۔ آئین کے تحت ایوان بالا اور ایوان زیریں سے تعلق نہ رکھنے والا کوئی شخص بجٹ پیش ہی کرنے کا مجاز نہیں، حکومت نے وزیر اعظم کے مشیر مفتاح اسماعیل کو وفاقی وزیر خزانہ کا درجہ دے کر بجٹ پیش کرنے کا غیر قانونی اختیار سونپا جو حکومتی بدنیتی کو ظاہر کرتا ہے۔ آئین کے آرٹیکل 86 کے تحت نگران حکومت اپنی آمدن اور اخراجات خود پورا کرنے کی پابند ہے جبکہ حکومتی مدت پوری ہونے کی بنا پر جانے والی حکومت نئی آنے والی حکومت کا سالانہ بجٹ پیش نہیں کر سکتی درخواست میں مزید کہا گیا ہے کہ ووٹرز نے موجودہ حکومت کو پانچ سال کے لئے اعتماد اور ووٹ دیا تھا، موجودہ حکومت نے معیاد مکمل ہونے کے باوجود وفاقی بجٹ پیش کر کے ووٹرز کے اعتماد، خواہشات اور ان کے ووٹوں کی توہین کی ہے،  معیاد مکمل ہونے کی بنا پرحکومت کو وفاقی بجٹ پیش کرنے اور ووٹرز کے استحقاق کو مجروع کرنے کا کوئی اختیارحاصل نہیں،موجودہ حکومت وفاقی بجٹ پیش کر کے ماورائے آئین اقدام کی مرتکب ہوئی ہے لہٰذا عدالت بدنیتی پر مبنی وفاقی بجٹ کے اقدام کو کالعدم قرار دے۔
image

 وزیراعلیٰ خیبرپختون خوا پرویز خٹک کی اہلیہ عامرہ خٹک کو اورسیز قومی شناختی کارڈ نہ ہونے کی وجہ سے امیگریشن عملے نے جہاز سے اتار لیا۔ نجی ٹی وی کے مطابق وزیراعلیٰ خیبرپختون خوا پرویز خٹک کی اہلیہ کو پشاور ائیر پورٹ پر قومی شناختی کارڈ نہ ہونے پر جہاز سے اتار لیا گیا۔ ذرائع کے مطابق پرویز خٹک کی اہلیہ عامرہ خٹک پشاور سے امریکا جا رہی تھیں اور ان کے پاس اورسیز قومی شناختی کارڈ نہیں تھا جس پر امیگریشن عملے  نے انہیں جہاز پر سوار ہونے کے بعد واپس اتار لیا۔
image

 وزیراعلیٰ پنجاب شہباز شریف نے کہا  ہے کہ نیب آئینی ادارہ ہے جس کو چاہے بلا سکتا ہے۔ مظفر گڑھ میں رجب طیب اردوان ہسپتال کے توسیعی منصوبے کی تقریب سے خطاب کے دوران وزیراعلیٰ پنجاب نے کہا کہ نیب آئینی ادارہ ہے جس کوچاہے بلاسکتا ہے، نیب نے مجھے بلایا، اگر وہ دوبارہ بھی بلانا چاہے تو بلا سکتا ہے، ہمیں قانون کے آگے سر جھکانا ہوگا، قومیں تب ہی بنتی ہیں جب قانون پر عمل ہو۔ہم پنجاب میں صحت کے شعبے میں انقلاب لے کرآئے ہیں، پنجاب کے ہسپتال یورپ کے ہسپتالوں کی مانند ہیں، پنجاب کے 26 ڈسٹرکٹ ہیڈ کوارٹر ہسپتالوں میں سی ٹی سکین لگ گئے ہیں، یہ 24 مشینیں گھنٹے چلتی رہیں گی، صوبائی حکومت نے ہیپاٹائٹس کے خلاف مہم شروع کر رکھی ہے، ہر ضلع میں ہیپاٹائٹس سنٹر قائم کر رکھے ہیں، ہسپتالوں میں لوگوں کو مفت ادویات ملتی ہیں۔
image

معروف ناول نگار اور عمران سیریز کے سیکڑوں ناول لکھنے والے مظہر کلیم ملتان میں انتقال کر گئے۔ نامور ادیب مظہر کلیم طویل عرصے سے بیمار تھے۔ ان کی نماز جنازہ دوپہر ملتان کی ابدالی مسجد میں ادا کی جائے گی۔ مظہر کلیم کا شمار پاکستان کے کامیاب قانون دانوں میں ہوتا تھا لیکن ان کی ایک وجہ شہرت معروف جاسوسی ناول عمران سیریز بھی تھی۔ 22 جولائی 1942 کوملتان میں پیدا ہونے والے مظہر کلیم نے ریڈیو ملتان کا مشہور سرائیکی ٹاک شو جمہور دی آواز کے اینکر پرسن بھی رہے۔ مظہر کلیم نے بہائو الدین زکریا یونیورسٹی سے اردو ادب میں ایم اے اور ایل ایل بی کیا۔ جس کے بعد وہ ملتان بار کونسل کے نائب صدر بھی منتخب ہوئے اور ملتان کی ضلعی عدالتوں کی سربراہ بھی رہے۔جاسوسی ناول عمران سیریز  کا آغاز اگرچہ ابن صفی نے کیا لیکن مظہر کلیم نے اپنی عمران سیریز  میں نئے کرداروں کو متعارف کروایا۔
image

 حمزہ شہباز نے کہا  ہے کہ دو ہزار دنوں میں کچھ نہ کرنے والے 100 دن میں جادو دکھانے کے جھوٹے دعوے کر رہے ہیں، انشا اللہ اگلا وزیراعظم بھی نون لیگ سے ہوگا۔ مسلم لیگ ن کے پارٹی سیکرٹریٹ ماڈل ٹائون لاہور میں مختلف وفود سے ملاقاتیں کرتے ہوئے حمزہ شہباز نے کہا کہ قوم میں سیاسی شعور اور بیداری اپنی انتہا پر ہے، نوجوان زوردار انتخابی مہم چلائیں اور اہم ذمہ داریاں سنبھالنے کے لئیے خود کو تیار کر لیں ،سیاست سمیت ہر شعبے میں نوجوانوں کو زیادہ مواقع فراہم کر کے انشا اللہ توقعات سے بھی کہیں بڑھ کر کامیابی حاصل کریں گے، ملاقاتوں میں منتخب عوامی نمائیندگان کی کارکردگی، ووٹر لسٹوں کی اپڈیشن سمیت دیگر سیاسی امور زیر غور رہے۔
image

شہرقائد میں جاری گرمی کی لہر ختم ہونے کا نام نہیں لے رہی اورآج بھی پارہ 42 ڈگری تک جانے کا امکان ظاہر کیا گیا ہے۔ محکمہ موسمیات کے مطابق شہر قائد میں آج بھی گرمی کا پارہ 40 ڈگری سے آگے جائے گا، شہرمیں مغربی اور جنوب مغربی ہوائیں چل رہی ہیں، اس وقت ہوا میں نمی کا تناسب 57 فیصد جب کہ شہر کا درجہ حرارت 32 ڈگری سینٹی گریڈ ہے۔ محکمہ موسمیات اورطبی ماہرین نے گرم موسم میں ماہ رمضان کے پیش نظرشہریوں کو احتیاطی تدابیراختیارکرنے کی ہدایات بھی جاری کی ہیں۔ دوسری جانب ملک کے بیشتر علاقوں میں موسم گرم اور خشک رہے گا جب کہ بالائی خیبر پختونخوا، راولپنڈی ڈویږن، اسلام آباد، فاٹا، کشمیر اور گلگت بلتستان میں چند مقامات پر بارش کاامکان ہے۔
image

 صوبہ سندھ کے دوسرے بڑے شہر حیدرآباد میں سحرش نگر کے علاقے میں ریلوے ٹریک پر 2 دھماکے ہوئے، جس میں اَپ اور ڈائون ٹریک پر گڑھے پڑ گئے۔ پولیس کے مطابق سحرش نگر ریلوے ٹریک پر دو دھماکے ہوئے، دھماکوں کے بعد پولیس اور رینجرز کی بھاری نفری جائے وقوع پر پہنچ گئی۔ دوسری جانب بم ڈسپوزل سکواڈ کو بھی طلب کیا گیا، جس نے ٹریک کی سرچنگ کا کام شروع کیا۔ بعدازاں بم ڈسپوزل سکواڈ کی جانب سے ریلوے ٹریک کو کلیئر قرار دے دیا گیا، جس کے بعد ریلوے ٹریفک بحال کردی گئی۔
image

 رحیم یار خان میں قومی شاہراہ پر ایک ٹرالر پر رکھا کنٹینر جھونپڑیوں پر الٹ گیا، جس سے جھونپڑیوں میں سوئے 3 بچوں اور ایک خاتون سمیت 4 افراد جاں بحق اور 2 زخمی ہوگئے۔ ریسکیو ذرائع کے مطابق رحیم یار خان کے علاقے لیاقت پور میں ترنڈہ قومی شاہراہ پر لاہور سے کراچی جانے والے ٹرالر پر لدا کنٹینر ملحقہ جھونپڑیوں پر الٹ گیا ،حادثے سے کنٹینر کے نیچے دب کر ایک ہی خاندان کے 3 معصوم بچے اور ان کی والدہ جاں بحق جبکہ 2 افراد زخمی ہوگئے۔ بدنصیب خاندان کے اوپر گرے کنٹینر کو کرین کی مدد سے ہٹایا گیا جبکہ ریسکیو اہلکاروں نے لاشوں اور زخمیوں کو رورل ہیلتھ سنٹر ترنڈہ محمد پناہ منتقل کردیا۔ پولیس کے مطابق ٹرالر ڈرائیور موقع سے فرار ہوگیا، جس کی تلاش میں چھاپے مارے جارہے ہیں۔
image

جمعیت علم اسلام ف نے فاٹا کے خیبر پختونخوا میں انضمام کے خلاف دھرنا دینے کا اعلان کردیا۔میڈیا رپورٹ کے مطابق قومی اسمبلی اور سینیٹ سے فاٹا کے خیبر پختونخوا میں انضمام کے بل کی منظوری پر جے یو آئی ف نے احتجاجی مہم شروع کرنے کا فیصلہ کیا ہے اور اس سلسلے میں   پشاور میں دھرنا دینے کا اعلان کیا ہے۔جے یو آئی ف 27 مئی کو پشاور میں صوبائی اسمبلی کے باہر دھرنا دے گی جس کے لیے تیاری شروع کردی گئی ہے، جے یو آئی نے کارکنوں کو  اتوار کے روز اسمبلی سیکرٹیریٹ کے سامنے جمع  ہونے کی ہدایت کردی ہے۔واضح رہے کہ فاٹا اصلاحات کے لیے 31 ویں آئینی ترمیم پر جے یو آئی ف کے ارکان نے قومی اسمبلی اور سینیٹ سے احتجاجاً واک آئوٹ کیا تھا۔  
image

سابق صدر جنرل پرویز مشرف نے کہا ہے کہ اگر میں اِس وقت صدر ہوتا تو ڈاکٹر شکیل آفریدی کو رہا کر کے امریکا کے حوالے کر دیتا تاہم یہ  کچھ دو اور کچھ لو کے تحت ہوتا۔  وائس آف امریکا کو دیئے گئے اپنے ایک انٹرویو میں پاکستان کے سابق صدر جنرل)ر(پرویز مشرف نے کہا ہے کہ موجودہ دور میں امریکا اور پاکستان کے درمیان تعلقات خراب ترین سطح پر آگئے ہیں اگر اس وقت میں صدر ہوتا تو ڈاکٹر شکیل آفریدی کو جیل سے رہا کر کے امریکا کے حوالے کر دیتا لیکن اس کے لیے امریکا کے ساتھ کچھ لو اور کچھ دو کے تحت سمجھوتا کرتا۔ انہوں نے کہا کہ پاکستان نے ہر مشکل وقت میں ایک دوست ملک کی حیثیت سے امریکا کا ساتھ دیا لیکن امریکا نے صرف ضرورت کے وقت ہی پاکستان کی جانب دوستی کا ہاتھ بڑھایا، یہی وجہ ہے کہ دونوں ممالک کے درمیان تعلقات نہایت کشیدہ ہیں، اس بات کی اشد ضرورت ہے کہ دونوں ملک اختلافات دور کرنے کے لیے مذاکرات کی میز پر بیٹھیں اور تحفظات کو دور کریں۔ انہوں نے کہا کہ امریکا اور پاکستان کے درمیان اختلافات کی وجہ افغانستان میں جاری کشمکش ہے، پُر امن افغانستان اور ایک منتخب جمہوری حکومت کا قیام پاکستان اور افغانستان کے ساتھ ساتھ خود امریکا کے مفاد میں بھی ہے اور اسی طرح خطے میں قیام امن کے لیے بھی افغانستان کے معاملے کو مذاکرات کے ذریعے حل کرنا ہوگا۔ انہوں  نے کہا کہ امریکا کو لگتا ہے کہ پاکستان ڈبل کراس کر رہا ہے لیکن یہ امریکی شکایت حقیقت پر مبنی نہیں کیوں کہ پاکستان نے سیٹو اور سینٹو معاہدوں میں شامل ہوکر امریکا کی جانب ہاتھ بڑھایا تھا لیکن 1965 کی جنگ کے بعد امریکا کا جھکاؤ بھارت کی جانب بڑھ گیا اور پاکستان پر پابندی عائد کردی گئی جو کے 1979 تک جاری رہی تاہم افغانستان میں روسی حملے کے بعد پاکستان اور امریکا ایک دوسرے کے قریب آئے لیکن جیسے ہی روس افغانستان سے نکلا امریکا نے پھر سے آنکھیں پھیر لیں۔ واضح رہے کہ پاکستان کے سابق صدر جنرل )ر(پرویز مشرف آرٹیکل  چھ کے تحت غداری کے جاری مقدمے کی سماعت کے دوران علاج کے غرض سے پاکستان سے دبئی منتقل ہو گئے تھے اور تاحال واپس نہیں آئے۔  
image

وزیر اعظم شاہد خاقان عباسی نے وفاقی ملازمین کو تین ماہ کی بنیادی تنخواہ کے برابر اعزازیہ جاری کرنے کے احکامات جاری کر دیئے ہیں۔ نجی ٹی وی کے مطابق  وزیر اعظم کے پرنسپل سیکریٹری فواد حسن فواد کے دستخطوں سے جاری ہونے والے حکم نامے میں کہا گیا ہے کہ یہ تنخواہ رواں مالی سال کے بجٹ سے ادا کی جائے گی، یہ اعزازیہ جاری کرنے کی کوئی وجہ نہیں بتائی گئی۔ حکم نامے میں کہا گیا ہے کہ مستقبل میں اعزازیہ جاری کرنے کے لئے پالیسی اگلی حکومت بنائے گی، اس کے علاوہ بجٹ سازی کے کام میں حصہ لینے والے ملازمین کو پانچ ماہ کی بنیادی تنخواہ کے برابر اعزازیہ جاری کرنے کے احکامات بھی جاری کئے گئے ہیں۔ ماضی میں یہ اعزازیہ چار ماہ کے لئے جاری کیا جاتا رہا ہے۔  
image

 سینیٹر رضا ربانی نے کہا کہ اگر کسی سیاست دان نے پاکستان اور بھارت کی انٹیلی جنس ایجنسیز کے سابق سربراہان کی طرح کتاب لکھی ہوتی تو بغاوت کے فتوے لگ جاتے۔ سینیٹ اجلاس میں بھی سابق آئی ایس آئی سربراہ جنرل( ر)اسد درانی اور بھارتی خفیہ ایجنسی را  کے سربراہ کی کتاب زیر موضوع رہی جب کہ چیئرمین سینیٹ نے وزارت خارجہ سے اس حوالے سے رپورٹ طلب کرلی ہے۔ دوسری جانب سینیٹر رضا ربانی نے سینیٹ میں اظہار خیال کرتے ہوئے  کہا کہ پاکستان اور بھارت کی انٹیلی جنس ایجنسیز کے 2 سابق چیفس نے ایک کتاب لکھی، 2 انٹیلی جنس ایجنسیز کے سابق چیف یہ کیا کر رہے ہیں اور کیا جنرل ) ر(اسد درانی نے حکومت سے اس بارے میں اجازت لی تھی تاہم اگر یہ کتاب کسی سیاست دان نے لکھی ہوتی تو بغاوت کے فتوے لگ جاتے۔  
image

سابق وزیر داخلہ چودھری نثار کا کہنا ہے کہ نگراں وزیراعظم کیلیے پہلی ترجیح تصدق حسین جیلانی کی نظر آرہی ہے۔ اسلام آباد میں صحافیوں سے غیررسمی گفتگو میں سابق وزیرِداخلہچودھری نثار علی خان کا کہنا تھا کہ اس میں کوئی شک نہیں رہا کہ نگراں وزیراعظم کی تقرری کا معاملہ پارلیمانی کمیٹی میں جائے گا، نگراں وزیراعظم کے لیے پہلی ترجیح تصدق حسین جیلانی کی نظر آرہی ہے۔صحافی کی جانب سے سوال پر کہ کیا عمران خان آئندہ وزیراعظم بننے میں کامیاب ہوسکتے ہیں، چوہدری نثار نے جواب دیا کہ یہی سوال میرا آپ سے ہے۔ انہوں نے کہا کہ ضروری نہیں کہ تحریک انصاف میں شامل ہونے والے انتخابات میں کامیاب ہوں جب کہ ہر سیاسی جماعت کے الیکٹ ایبل اپنے اپنے ہوتے ہیں۔ آئندہ عام انتخابات میں 4 حلقوں سے انتخاب لڑنے کا فیصلہ کیا ہے، قومی اسمبلی کے 2 اور صوبائی اسمبلی کے 2 حلقوں سے الیکشن لڑوں گا۔ صحافی کی جانب سےچودھری نثار سے سوال کیا گیا کہ کیا آپ کے موقف کو پذیرائی مل رہی ہے،چودھری نثار نے جواب دیا کہ پچانوے فیصد ایم این اے میرے ہم خیال تھے لیکن کوئی موقف کو عملی جامہ پہنانے والا بھی تو ہو۔
image

 وزیر اعظم شاہد خاقان عباسی اور اپوزیشن لیڈر سید خورشید شاہ کے مابین نگراں وزیر اعظم کا نام فائنل نہ ہونے پر پیپلزپارٹی نے نگران وزیر اعظم کے مجوزہ نام پارلیمانی کمیٹی کو بھیجنے کا فیصلہ کر لیا ۔  سید خورشید شاہ نے صحافیوں سے غیر رسمی گفتگو میں کہا ہے کہ نگراں وزیر اعظم کے لئے وزیر اعظم سے اب کوئی ملاقات نہیں ہو گی۔ سپیکر قومی اسمبلی کو نگراں وزیر اعظم کے لئے ذکا اشرف اور جلیل عباس جیلانی کے نام بھیجیں گے ۔ اپوزیشن لیڈر اور وزیر اعظم کی جانب سے نگراں وزیر اعظم کے ناموں پر اتفاق نہ ہونے سے معاملہ پارلیمانی کمیٹی کی طرف جا رہا ہے ۔ 
image

 ہائی کورٹ کے ڈویژن بنچ نے چینلز پر پانچ وقت اذان نشر کرنے کا حکم معطل کردیا ہے۔  جسٹس عامر فاروق اور جسٹس محسن اختر کیانی پر مشتمل اسلام آباد ہائی کورٹ کے ڈویژن بنچ نے چینلز پر 5 وقت اذان نشر کرنے کا حکم معطل کردیا ہے۔ 26 صفحات پر مشتمل عدالتی فیصلے میں مغرب کی اذان سے قبل اشتہارات نہ چلانے جب کہ درود شریف اور ملکی سلامتی کی دعائیں چلانے کا حکم بھی معطل کردیا گیا ہے۔  اس کے علاوہ ٹی وی چینلز پر بھارتی مواد چلانے کے حوالے سے احکامات اور رمضان ٹرانسمیشن ضابطہ اخلاق پر عمل درآمد کے لیے وزارت داخلہ کی کمیٹی کو بھی غیرقانونی قرار دیا گیا ہے۔ عدالتی حکم نامے کے مطابق عدالت نے پہلے عشرے کی جو عمل درآمد رپورٹ مانگی ہے وہ پیمرا کا اختیار ہے، پیمرا کے پاس ضابطہ اخلاق پر عمل درآمد کرانے کا مکمل اختیار ہے جب کہ ہائی کورٹ ریگولیٹر کا کردار ادا نہیں کرسکتی، پیمرا ریگولیٹر ہے وہی چینلز کو اپنے ضابطہ اخلاق کا پابند بنائے اور چینلز رمضان کے تقدس کو مدنظر رکھتے ہوئے خود اقدامات اٹھائیں۔ واضح رہے کہ اسلام آباد ہائی کورٹ کے جسٹس شوکت عزیز صدیقی نے چینلز پر 5 وقت اذان سمیت ماہ مقدس کے حوالے سے احکامات جاری کیے تھے جس پر نجی چینل اور پاکستان براڈکاسٹنگ ایسوسی ایشن نے جسٹس شوکت عزیز صدیقی کے 9 مئی کے فیصلے کو چیلنج کیا تھا۔
image

عوامی سروے

سوال: کیا نواز شریف کے ممبئی حملوں سے متعلق بیان کے بعد ان کے خلاف سخت کارروائی ہونی چاہئے؟