17 جولائی 2018
تازہ ترین
جہان سپیشل

 رہنما متحدہ قومی موومنٹ فاروق ستار نے کہا کہ آپ کا جوش و خروش دیکھ کر یقین ہے مخالفین کی نیندیں اڑ جائیں گیں ، کل بھی سب کچھ ایم کیو ایم کا تھا آج بھی ایم کیو ایم کا ہے، پی آئی بی میں کارنر میٹنگ سے خطاب کرتے ہوئے فاروق ستار نے کہا کہ کچھ نہیں بدلا سب کچھ ویسا ہی ہے آپ کا جوش و جذبہ  اور محبت، ٜ25جولائی کو دل والے دلہنیا لےجائیں گے، مخالفین کے اندازوں کا خاتمہ ریلیوں نے کر دیا، آئندہ بھی سب کچھ  ایم کیو ایم کا ہوگا، انہوں نے پی ایس پی کو تنقید کا نشانہ بناتے ہوئے کہا کہ ٹیڑھی ڈولفن کےساتھ 2تصویریں لگانے سے کیا ہوتا ہے، کیا  لوگوں کے دلوں میں جگہ بنا سکتے ہو؟ اتنا سب کچھ ہونے کے بعد آج بھی ایم کیو ایم قائم و دائم ہے،ایم کیو ایم کے قیام کی وجہ شہیدوں کی قربانی ہے، شہیدوں، اسیروں اور لاپتا ساتھیوں کی قربانیوں سے ا یم کیو ایم قائم ہے، ان کا کہنا تھا کہ جیل میں لگے جیمرز کی وجہ سے اطراف کی آبادیوں کے موبائل نہیں  چل سکتے، تینوں جماعتیں کراچی میں دوبارہ مردم شماری اور حلقہ بندیوں کا مطالبہ کریں، مردم شماری اور حلقہ بندیوں میں دھوکا دیا گیا ، عمران خان، شہباز شریف، بلاول سے کہتا ہوں ہمارے مطالبات مان لیں، آخر میں انہوں نے کہا کہ دو بیویاں سنبھالنا آسان ہے مگر دو حلقے سنبھالنا مشکل ہے۔  
image

العزیزیہ اور فلیگ شپ ریفرنس کیس میں سابق وزیرِ اعظم نواز شریف کا ٹرائل اوپن کورٹ میں کرنے کا فیصلہ کر لیا گیا ہے۔ نجی ٹی وی کے ذرائع کے مطابق وفاقی کابینہ آج جیل ٹرائل کا نوٹی فکیشن واپس لینے کی منظوری دے گی۔ اس کے علاوہ امن و امان کی بگڑتی صورتحال پر بھی اہم فیصلے متوقع ہیں۔ ذرائع کے مطابق وفاقی وزیرِ داخلہ دہشت گردی کے واقعات کے بعد امن و امان کی صورتحال پر بریفنگ دیں گے، ڈیمز کے معاملہ پر تنخواہوں کی کٹوتی کے حوالے سے بھی منظوری دی جائے گی، جی ڈی سی ایل اور پی پی ایل کے ڈائریکٹرز کی نامزدگی واپس لینے کی منظوری بھی دی جائے گی۔
image

 نیب نے سرکاری ہیلی کاپٹرز کے ذاتی استعمال کا الزام میں عمران خان کو آج  طلب کرلیا، چیئرمین نیب نے عمران خان کے خلاف انکوائری کا حکم دیا تھا، عمران خان پرخیبر پختونخوا کے 2ہیلی کاپٹروں کو ذاتی استعمال میں لانے کا الزام ہے۔ نجی ٹی وی  کے مطابق نیب نے سرکاری ہیلی کاپٹرز کے ذاتی استعمال کا الزام میں عمران خان کو آج  طلب کرلیا، چیئرمین نیب جسٹس  ر  جاوید اقبال نے چیئرمین پاکستان تحریک انصاف عمران خان کے خلاف انکوائری کا حکم دیا تھا، عمران خان پر خیبر پختونخوا کے 2ہیلی کاپٹروں کو ذاتی استعمال میں لانے کا الزام ہے، واضح رہے عمران خان کو نیب پہلے بھی سرکاری ہیلی کاپٹر کے استعمال کے الزام میں طلب کر چکی ہے، جس میں چیئرمین پی ٹی آئی پیش نہیں ہوئے ، چیئرمین پی ٹی آئی نے خیبر پختونخواہ کا سرکاری ہیلی کاپٹر 74 گھنٹے تک ذاتی طور پر استعمال کیا تھا جس پر چیئرمین نیب نے نوٹس لیتے ہوئے انہیں طلب کیا۔
image

مسلم لیگ ن کے صدر شہباز شریف نے کہا کہ عوام 25 جولائی کو ملک کو دوبارہ ترقی کی راہ پر گامزن کریں گے۔انہوں  نے علی پور چٹھہ میں جلسے سے خطاب کرتے ہوئے کہا کہ 13 جولائی سیاسی تاریخ کا تاریک دن تھا، باپ کے سامنے اس کی بیٹی کو گرفتار کیا گیا، اگر کسی باپ کے سامنے بیٹی کو گرفتار کیا جائے تو باپ پر کیا گزرتی ہے۔ سابق وزیر اعلیٰ پنجاب نے اپنے دھواں دار خطاب میں کہا کہ نوازشریف کی اہلیہ زندگی اور موت کی کشمکش میں ہیں، نواز شریف اپنی ذات نہیں قوم کے مستقبل کیلیے آئے، نوازشریف کےخلاف کرپشن ثابت نہیں ہوئی، عوام 25 جولائی کو ملک کو دوبارہ ترقی کی راہ پر گامزن کریں گے۔ سابق حکومت کی کارکردگی کا تذکرہ کرتے ہوئے میاں شہباز شریف کا کہنا تھا کہ 2013 میں ملک میں 20،20 گھنٹے کی لوڈشیڈنگ ہوتی تھی، نوازشریف نے ملک سے لوڈشیڈنگ کا خاتمہ کر دیا، ہم نے11 ہزار میگاواٹ بجلی سسٹم میں شامل کی، نوازشریف نے کسانوں کو اربوں روپے کے قرضے دیئے۔ ہمارے خلاف دہشت گردی کے مقدمات درج کیے گئے، اگر بجلی مہیا کرنا، عوام کی خدمت، نواز شریف سے محبت کرنا دہشت گردی ہے تو سو د فعہ دہشت گردی کے مقدمات درج کرو۔ انہوں نے سیاسی حریفوں کو آڑے ہاتھوں لیتے ہوئے کہا کہ عمران خان نے الزام تراشی کے علاوہ کچھ نہیں کیا، خیبر پختونخوا میں ایک نئی یونیورسٹی یا اسپتال نہیں بنا، ہم نے یونیورسٹیاں، اسپتال، اسکول، سڑکیں بنائیں، عمران خان نے خیبرپختونخوا میں کرپشن کا کوئی نوٹس نہیں لیا، عمران خان نے کرپٹ لوگوں کو پارٹی ٹکٹ دیے، اربوں کی کرپشن کرنے والا بابر اعوان تحریک انصاف میں ہے۔
image

سابق وزیرداخلہ چودھری نثار نے کہا ہے کہ نواز شریف کو صرف یہ کہا تھا کہ اداروں سے نہ لڑو، اللہ کرے سابق وزیراعظم کی مشکلات میں کمی آئے ، نواز شریف پر مشکلات ان کی اپنی کوتاہیوں کی وجہ سے آئیں۔ فتح جنگ میں جلسے سے خطاب کرتے ہوئے انہوں نے کہا کہ میں یہاں آپ کو قائل کرنے نہیں آیا ، آپ تو پہلے ہی مجھ سے قائل ہیں ، لوگوں نے نواز شریف کے کان بھرے کہ میں صحیح مشورہ نہیں دیتا ہوں ، اس بات کی بنا پر مجھے کہا گیا کہ ٹکٹ کیلیے درخواست جمع کروائیں حالانکہ میں نے کبھی پارٹی ٹکٹ کے لیے خود درخواست نہیں دی۔ انہوں نے کہا کہ ہمارے سیاسی لیڈروں نے نہیں بتایا کہ ملک کو کیا خطرات لاحق تھے، آج دیکھ لیں ڈالر کہاں تک پہنچ گیا ہے، ڈالر کی قیمت بڑھنے سے عام آدمی کو فر ق پڑتا ہے مگر کوئی نہیں بتا رہا اس ملک میں مہنگائی کیسے کم ہو گی؟ سارے سیاسی لیڈر ایک دوسرے کے ساتھ دست و گریباں ہیں  جبکہ پاکستان آج نازک موڑ پر کھڑا ہے۔
image

متحدہ مجلس عمل کے صدر و جمعیت علمائے اسلام ف  کے سربراہ مولانا فضل الرحمان نے کہا ہے کہ تحریک انصاف کی حکومت آ گئی تو ملک میں اسلام نہیں رہے گا۔ ڈیرہ اسماعیل خان میں میڈیا سے بات کرتے ہوئے انہوں نے کہا کہ دہشت گردی کے خلاف لڑی گئی جنگ کے باوجود امن و امان کی خطرناک صورتحال ان اداروں کی کارکردگی پر سوالیہ نشان ہے، بتایا جائے جن کی کمر توڑ دی وہ کیوں اٹھ گئے۔ انہوں نے کہا کہ شمالی وزیرستان میں ہماری جماعت کے تین کارکنان کو قتل کیا گیا، بلور خاندان کے خوبصورت نفیس نوجوان کو مارا گیا جب کہ مستونگ میں خود کش دھماکا اور اکرم درانی پر حملہ ہوا ، ان سب  کا کیا مقصد ہے ہم نے دھمکیوں کے باوجود الیکشن مہم نہیں روکی جب کہ پولنگ کے دن بھی خطرہ  محسوس کر رہے ہیں۔ انہوں نے کہا کہ ایم ایم اے کا مقابلہ مذہب کی مداخلت کو ختم کرنے والوں کے خلاف ہے اگر تحریک انصاف کی حکومت آ گئی تو ملک میں اسلام نہیں رہے گا، متحدہ مجلس عمل میں اتحاد ہے جب کہ دیگر جماعتوں میں ٹکٹوں کی تقسیم پر مسئلہ بنا، مینڈیٹ ملنے کے بعد اتحاد کا فیصلہ کیا جائے گا۔
image

کاؤنٹر ٹیررازم ڈیپارٹمنٹ (سی ٹی ڈی) نے کارروائی کے دوران کالعدم تنظیم کے 4 مبینہ دہشت گردوں کو گرفتار کرلیا۔ نجی ٹی وی کے مطابق کراچی کے علاقے شاہ فیصل کالونی میں کارروائی کرتے ہوئے کالعدم تنظیم کے 4 مبینہ دہشت گردوں کو گرفتار کرلیا ہے۔ ایس ایس پی سی ٹی ڈی جنید شیخ نے میڈیا سے بات کرتے ہوئے بتایا ہے کہ گرفتار ہونے والے دہشت گردوں کی شناخت ابوبکر ، محمد جواد ، ابراہیم اور فہد سے ہوئی ہے ۔ پولیس نے چاروں ملزمان کا تعلق کالعدم تنظیموں تحریک طالبان، لشکر جھنگوی اور انصارالشریعہ سے بتایا ہے۔ایس ایس پی جنید شیخ کے مطابق گرفتار دہشت گردوں نے افغانستان سے دہشت گردی کی تربیت حاصل کی اور یہ جنوبی وزیرستان میں ایف سی کی متعدد چوکیوں پر حملوں میں بھی ملوث ہیں۔ مبینہ دہشت گرد سولہ ماہ سے کراچی کے علاقے شاہ فیصل کالونی میں واقع ایک  مدرسے میں رہ رہے تھے ۔ انتخابات سے قبل سیاسی جماعتوں کے رہنماؤں کو نشانہ بنانے کے علاوہ تخریب کاری کی وارداتیں کرنا چاہتے تھے علاوہ ازیں ملک بھر میں آپریشن رد الفساد جاری ہے، گزشتہ روز پنجاب رینجرز نے پولیس اور خفیہ اداروں کے ساتھ ملکر پنجاب کے مختلف علاقوں میں سرچ آپریشن کیا، آپریشن اٹک ،سیالکوٹ ، میانوالی و دیگر شہروں میں کیا گیا، سی ٹی ڈی نے ملتان میں دہشت گردوں کا منصوبہ ناکام بنا دیا ، انسداد دہشت گردی فورس نے ملتان میں دہشت گردی کا منصوبہ ناکام بناتے ہوئے کالعدم تنظیم کے 4 دہشت گرد گرفتار کر لیے۔ سی ٹی ڈی حکام کے مطابق دہشت گردوں کو بائی پاس روڈ ملتان سے خفیہ اطلاع پر گرفتار کیا گیا۔ گرفتار دہشت گردوں میں عبدالسلام، لیاقت، واجد اللہ اور محمد احمد شامل ہیں، جن کا تعلق کالعدم تنظیم سے ہے۔ گرفتار دہشت گردوں کے قبضہ سے 5 دستی بم، آتشیں اسلحہ اور اہم نقشہ جات برآمد کر کے تفتیش کے لئے نامعلوم مقام پر منتقل کر دیا گیا ہے۔ سی ٹی ڈی حکام کا کہنا ہے کہ مذکورہ دہشت گردوں نے ابتدائی تفتیش کے دوران ملتان میں اہم سیاسی قائدین کو ہدف بنانے کی منصوبہ بندی کا اعتراف کیا ہے، تاہم ان سے مزید تفتیش جاری ہے۔ لاہور سے 24افراد غیر قانونی اسلحہ سمیت گرفتار کیا گیا، ڈی جی خان سے 5دہشت گردوں کو گرفتار کیا گیا۔
image

ہائی کورٹ نے انتخابی بینرز پر چیف جسٹس میاں ثاقب نثار اور سربراہ پاک فوج جنرل قمر جاوید باجوہ کی تصاویر لگانے کی وجہ سے تحریک انصاف کے امیدوار ناصر چیمہ کو انتخابات میں حصہ لینے کی اجازت دے دی۔نجی ٹی وی کے مطابق لاہور ہائی کورٹ میں گوجرانوالہ کے حلقہ پی پی 53 سے تحریک انصاف کے امیدوار ناصرچیمہ کی الیکشن کمیشن کے فیصلے کے خلاف درخواست پر سماعت ہوئی۔ کیس کی سماعت جسٹس امین الدین خان اور جسٹس ساجد محمود سیٹھی نے کی۔ درخواست میں مؤقف پیش کیا گیا کہ الیکشن کمیشن نے انتخابی ضابطہ اخلاق کے اجراء سے قبل 19 اپریل 2018 کو لگائے گئے بینرز کو بنیاد بنا کر نااہل قرار دے دیا جب کہ الیکشن شیڈول کا اجراء 31 مئی اور ضابطہ اخلاق کا اجراء 14 جون کو ہوا۔ وکیل درخواست نے عدالت سے استدعا کرتے ہوئے کہا کہ ناصر چیمہ کے خلاف کسی نے بھی کوئی درخواست نہیں دی اور ناہی کوئی الیکشن کمیشن کے روبرو پیش ہوا، جب کہ الیکشن کمیشن نے بھی نااہل قرار دینے کے بارے کسی قانون کا ذکر نہیں کیا، الیکشن کمیشن کا امیدوار کو نااہل کرنا آئین کے آرٹیکل 10 اے کے تحت شفاف ٹرائل کی سنگین خلاف ورزی ہے،عدالت الیکشن کمیشن کی جانب سے نااہلی کے فیصلے کو کالعدم قرار دے۔ عدالت نے فریقین کے وکلاء کے دلائل سننے کے بعد ناصرچیمہ کے کاغذاتِ نامزدگی منظور کرلئے جب کہ انہیں انتخابات میں حصہ لینے کی اجازت دے دی
image

تحریک انصاف نے این اے 124 سے پیپلز پارٹی وکٹ گرا دی، پیپلز پارٹی کے امیدوار چودھری ظہیر احمد تحریک انصاف کے امیدوار نعمان قیصر کے حق میں دستبردار اور تحریک انصاف میں شمولیت کا اعلان کر دیا۔ اس موقع پر پریس کانفرنس کرتے ہوئے سابق گورنر پنجاب چودھری سرور نے کہا کہ پیپلز پارٹی اور ن لیگ سے تعلق رکھنے والے لوگوں کی کثیر تعداد تحریک انصاف میں شمولیت اختیار کر رہی ہے۔ تحریک انصاف کے شفقت محمود نے کہا کہ ن لیگ عمران خاں کی کردار کشی کر رہی ہے، ساری عمر دھاندلی کرنے والے آج دھاندلی کی باتیں کر رہے ہیں۔ الیکشن مہم میں نازیبا الفاظ  کے استعمال کی شدید مذمت کرتے ہوئے انہوں نے کہا کہ رواداری برقرار رکھنی چاہئے، نازیبا الفاظ کوئی بھی ادا کرے، اس کی مذمت کرتے ہیں ایسا نہیں ہونا چاہئے۔  
image

احتساب عدالت نے سابق وزرائے اعظم کے پرنسپل سیکرٹری فواد حسن فواد کو ایک روزہ ریمانڈ پر نیب کے حوالے کردیا۔ نیب لاہور کے حکام نے فواد حسن فواد کا جسمانی ریمانڈ مکمل ہونے پر انہیں احتساب عدالت میں پیش کیا۔ نیب پراسیکیوٹر نے اپنے دلائل میں کہا کہ عوام نے اپنے گھرکے خواب سجائے،آشیانہ اقبال پراجیکٹ میں درخواستیں دیں، فواد حسن فواد نے اپنے اختیارات کا ناجائز استعمال کیا اور ٹھیکہ کاسا ڈیولپرز کو دلوایا، ان کے غیر قانونی اقدامات سے قومی خزانے کو اربوں روپے کا نقصان پہنچا۔ نیب پراسیکیوٹر نے عدالت کو بتایا کہ فواد حسن فواد نے انکوائری کمیٹی کی رپورٹ دبا دی، آشیانہ اقبال پراجیکٹ کی رپورٹ بنانے والے افسران کو بھی طلب کیا ہے۔ عدالت نے نیب پراسیکیوٹر کے دلائل کے بعد ملزم فواد حسن فواد کو ایک روز کے ریمانڈ پر نیب کے حوالے کردیا۔
image

چیئرمین پیپلز پارٹی بلاول بھٹو زرداری نے کہا  ہے کہ تمام جمہوری جماعتوں سے نئے میثاق جمہوریت پر بات کیلئے تیار ہیں۔ پارٹی کے سینئر رہنما اعتزاز احسن اور نیئر بخاری کے ہمراہ پریس کانفرنس کرتے ہوئے بلاول بھٹو زرداری نے کہا کہ نواز شریف اور شہباز شریف کے ساتھ ماضی کا ہمارا تجربہ مثبت نہیں رہا لیکن میثاق جمہوریت کی نئی قسم پر بات کرنے میں کوئی مسئلہ نہیں۔ مخالفین پر تنقید انتخابی سیاست کا حصہ ہے لیکن گالم گلوچ اور نفرت کی سیاست کو لائیں گے تو نوجوان سمجھیں گے کہ اسی طرح کرنا ہے۔
image

 نقیب اللہ قتل کیس میں مدعی کے وکیل نے عدالتی کارروائی کا بائیکاٹ کر دیا۔ کراچی کی انسدادِ دہشت گردی عدالت نے جعلی پولیس مقابلہ کے دوران اسلحہ برآمدگی کیس میں رائو انوار اور دیگر ملزموں کی درخواستِ ضمانت کی سماعت کی۔ مدعی کے وکیل صلاح الدین پنہور نے عدالتی کارروائی روکنے کی استدعا کرتے ہوئے کہا کہ ہم نے سندھ ہائیکورٹ میں یہ مقدمہ دوسری عدالت منتقل کرنے کی درخواست دائر کی ہے، ہم اس عدالت پر پہلے ہی عدم اعتماد کا اظہار کر چکے ہیں، ہماری درخواست ہے کہ آپ اس کیس میں کارروائی نہ کریں اور مزید سماعت روکی جائے۔ انسداد دہشتگردی عدالت نے مدعی کے وکیل کی استدعا مسترد کردی۔ تو مدعی مقدمہ کے وکیل نے عدالتی کارروائی کا بائیکاٹ کر دیا۔ عدالت نے مدعی کے وکیل کی غیر موجودگی میں ہی کیس کی سماعت دوبارہ شروع کردی۔ سابق ڈی ایس پی قمر احمد سمیت دیگر ملزمان کی ضمانت کی درخواستوں پر دلائل جاری ہیں۔
image

میاں نواز شریف اور مریم نواز کی اڈیالہ جیل میں سیکیورٹی ریڈ الرٹ کردی گئی ہے۔ جیل ذرائع کے مطابق نواز شریف کی سیکیورٹی پر 6 اہلکار تعینات ہیں اور ان کے ساتھ ایک مشقتی کام کررہا ہے۔ مریم نواز کی سیکیورٹی پر بھی خاتون ڈپٹی سپرنٹنڈنٹ سمیت 6 خواتین اہلکار تعینات ہیں۔ جیل کھلنے کے دوران نواز شریف کو نقل و حرکت محدود رکھنے کی ہدایات جاری کردی گئی ہیں اور مریم نواز کو بھی محتاط رہنے کی ہدایت کی گئی۔ نواز شریف کو اخبارات مہیا کردیئے گئے ہیں۔ سیکیورٹی حکام نے نواز شریف کے مشقتی پر بھی گہری نظر رکھنے کی ہدایت کی ہے۔ نواز شریف اور مریم نواز کو مہیا کیے جانے والے کھانے اور پانی کی نگرانی خود جیل سپرنٹنڈنٹ کریں گے۔ سابق وزیراعظم کی سیکیورٹی بڑھانے کے ساتھ ساتھ جیل کی فضائی نگرانی بھی شروع کردی گئی ہے۔ سیکورٹی حکام نے ہیلی کاپٹر سے جیل کے مختلف حصوں کا فضائی معائنہ کیا ہے۔
image

 انتخابات کے پرامن انعقاد اور سیکیورٹی خدشات کے پیش نظر چمن بارڈر پر باب دوستی کو 24 سے 26 جولائی تک بند کرنے کا فیصلہ کیا گیا ہے۔ ڈپٹی کمشنر چمن طفیل احمد بلوچ کے مطابق ضلع قلعہ عبداللہ اور چمن میں دہشت گردی کے خطرے کے پیش نظر سیکیورٹی ہائی الرٹ جاری کردیا گیا ہے اور انتخابات کے پر امن انعقاد کے سلسلے میں پاک افغان سرحد باب دوستی 3 دن 24، 25 اور 26 جولائی کو ہرقسم کی آمدورفت ا ور تجارتی سرگرمیوں کے لیے بند کرنے کا فیصلہ کیاگیا ہے۔ ڈپٹی کمشنر کا کہنا ہےکہ ضلع چمن میں دفعہ 144 نافذ کرکے امیدواروں کی اسلحہ نمائش اور ہوائی فائرنگ پر پابندی عائد کر دی ہے جب کہ جلسے اور کارنر میٹنگ کھلے میدان یا بازاروں میں کرنے پر پابندی عائد کرکے چاردیواری کے اندر کرنے کی ہدایت کی ہے۔ ڈپٹی کمشنر کے مطابق امیدواروں کے جلسے اور کارنرمیٹنگز کی سیکیورٹی کے لیے ایف سی کی خدمات لی جائیں گی، امیدواروں کو جلسہ، جلوس اور کارنر میٹنگز کے لیے 24 گھنٹے قبل اجازت لینا پڑے گی۔ ڈپٹی کمشنر نےبتایا کہ عوامی نیشنل پارٹی، متحدہ مجلس عمل، پشتونخوا میپ اور بلوچستان عوامی پارٹی کے چار امیدواروں کو ضابطہ اخلاق کی خلاف ورزی پر شوکاز نوٹس بھی جاری کیا گیا۔
image

سابق صدر پرویز مشرف کی سیاسی جماعت آل پاکستان مسلم لیگ  کے صدر ڈاکٹر امجد نے عام انتخابات میں عمران خان کی حمایت کا اعلان کر دیا۔ ڈاکٹر امجد نے چیئرمین پاکستان تحریک انصاف عمران خان سے ملاقات  کی اور این اے 54سے پی ٹی آئی کے امیدوار اسد عمر اور این اے 53سے عمران خان کے حق میں بھی دستبرداری کا اعلان کر دیا۔ ملاقات میں عمران خان کی جانب سے انتخابات میں حمایت کرنے کے اعلان کا خیرمقدم کیا گیا اور عمران خان نے ڈاکٹرامجد کا شکریہ بھی ادا کیا
image

 عوامی مسلم لیگ کے سربراہ شیخ رشید سمیت  23 افراد کے خلاف مقدمہ درج کرلیا گیا۔ راولپنڈی کے تھانہ سٹی میں درج مقدمے میں شیخ رشید اور ان کے بھتیجے شیخ راشد شفیق سمیت 8 افراد کو نامزد کیا گیا ہے جب کہ مقدمے میں دیگر 15 نامعلوم افراد بھی شامل ہیں۔ پولیس کے مطابق مقدمہ این اے 60 اور این اے 62 کی یونین کونسل 40 میں آتشبازی پر درج کیا گیا جب کہ پولیس افسر محمد یعقوب کی مدعیت میں زیر دفعات 285 اور 286 کے تحت درج کیا گیا ہے۔ ایف آئی آر کے متن کے مطابق پنجاب حکومت کی جانب سے آتشبازی کرنے پر پابندی عائد کی گئی ہے تاہم اس کے باوجود ملزموں نے تلواڑاں بازار میں آتشبازی کے مرتکب قرار پائے۔
image

 سپریم کورٹ نے تحریک انصاف کے رہنما فواد چودھری کو الیکشن لڑنے کے لیے اہل قرار دے دیا۔ جسٹس عظمت سعید کی سربراہی میں سپریم کورٹ کے دو رکنی بینچ نے فواد چوہدری کے کاغذات نامزدگی منظور کیے جانے کے خلاف درخواست کی سماعت کی۔ فواد چوہدری کے مد مقابل جسٹس اینڈ ڈیموکریٹک پارٹی کے امیدوار سید فخر حیدر کی جانب سے دائر درخواست عدالت نے سماعت مکمل ہونے کے بعد خارج کرتے ہوئے فواد چودھری کو الیکشن لڑنے کے لیے اہل قرار دیا۔ جسٹس عظمت سعید نے درخواست گزار سے استفسار کیا کہ آپ نے کاغذات نامزدگی کے وقت اعتراض دائر نہیں کیا، نئی درخواست کے بجائے اپیل مسترد ہونے کے فیصلے کو چیلنج کرنا چاہیے تھا۔
image

 مسلم لیگ ن کے قومی و صوبائی اسمبلی کے امیدواروں شیخ آفتاب احمد اور ان کے بیٹے شیخ سلیمان پر نامعلوم افراد نے فائرنگ کردی۔ نجی ٹی وی کے مطابق حلقہ این اے 55 اٹک ون سے ن  لیگ کے قومی اسمبلی کے امیدوار شیخ آفتاب احمد اور ان کے بیٹے شیخ سلمان کی گاڑیوں پر نامعلوم افراد نے فائرنگ کردی تاہم واقعے میں دونوں محفوظ رہے۔ فائرنگ کا یہ واقعہ تھانہ صدر اٹک کی حدود میں پیش آیا جس میں دونوں کی گاڑیوں میں سوراخ ہوگئے۔ شیخ آفتاب احمد کے بیٹے شیخ سلمان سرور بھی مسلم لیگ ن کے ٹکٹ پر اٹک سے صوبائی نشست کے لیے امیدوار ہیں۔ شیخ آفتاب احمد اور ان کے بیٹے پر فائرنگ کے وقت چئیرمین پیپلز پارٹی بلاول بھٹو زرداری چند کلومیٹر کے فاصلے پر اٹک میں موجود تھے۔
image

 فاروق ستار کراچی میں انتخابی مہم کے دوران مشکل سے دوچار ہو گئے، وعدے کے باوجود سرکاری کوارٹرز کے مالکانہ حقوق نہ دلوانے پر متاثرہ خواتین بپھر گئیں، کارنر میٹنگ میں متحدہ کی کارکنان سے گتھم گتھا ہوگئیں  ۔  ایم کیو ایم کی کارنر میٹنگ بدنظمی کا شکار رہی، اس دوران کیمرے بند کرانے کی کوشش بھی کی گئی۔ متاثرہ خاتون سٹیج پر پہنچ گئی اور شکوہ کیا کہ سرکاری کوارٹرز سے بے دخل کر دیا گیا، ایم کیو ایم نے مالکانہ حقوق دلوانے کا وعدہ کیا، اب پھر یقین دہانی کرانے آ گئے ، اس موقع پر فاروق ستار نے سرا ملبہ پی ایس پی پر ڈالتے ہوئے کہا کہ ہم سرکاری کوارٹرز کے متاثرین کو نکالنے نہیں دیں گے، متبادل جگہ فراہم کریں گے۔  
image

ملتان کے علاقے گلشن مارکیٹ میں واقع ہوٹل میں دھماکہ ہوا ، جس میں 3افراد جاں بحق اور 25 زخمی ہوگئے ۔ تفصیلات کے مطابق ڈپٹی کمشنر ملتان کا کہنا ہے کہ دھماکہ ہوٹل میں موجود سلنڈر سے ہوا جس سے ہوٹل اور قریبی عمارتوں کو شدید نقصان پہنچا ہے۔ انہوں نے مزید کہا کہ دھماکے کی جگہ پر پولیس ، بم ڈسپوزل اور ریسکیو ٹیموں کو طلب کرلیا گیا۔  ریسکیو اہلکاروں نے جائے حادثہ پر پہنچ کر امدادی کاموں کا آغاز کرتے ہوئے زخمیوں کو طبی امداد فراہم کرنے کے لئے ہسپتال منتقل کر دیا، جبکہ پولیس نے واقعہ کی تحقیقات شروع کردی ہیں۔
image

پاکستان پیپلز پارٹی کے چیئرمین بلاول بھٹو زرداری نے کہا ہے کہ مسلم لیگ ن  کے صدر شہباز شریف اور پاکستان تحریک انصاف  کے چیئرمین عمران خان کے ساتھ ان کے نظریاتی اختلافات ہیں۔ کوئٹہ میں پریس کانفرنس کے دوران بلاول بھٹو زرداری نے کہا کہ عام انتخابات کے بعد اگر پیپلز پارٹی کو کسی جماعت کے ساتھ اتحاد کرنا پڑا تو دیکھیں گے کہ کون سی پارٹی ہمارے منشور کے قریب ہے۔ ساتھ ہی انہوں نے اپیل کی کہ عوام 25 جولائی کو پاکستان پیپلز پارٹی کو کامیاب کروائیں۔ پی ٹی آئی چیئرمین پر تنقید کرتے ہوئے بلاول بھٹو زرداری نے کہا کہ عمران خان دوسروں کے بارے میں بہت باتیں کرتے ہیں، لیکن عوام اب باتوں پر نہیں چلتے، عمران خان ہر دن نئی چیز کہتے ہیں، ان کے یوٹرنز کے بارے میں کچھ نہیں کہہ سکتا۔  احتساب کا قانون سب کے لیے یکساں ہونا چاہیے اور پیپلز پارٹی پہلے بھی احتساب کی بات کرچکی ہے۔
image

غیر ملکی کمپنی نے قومی احتساب بیورو پر شریف خاندان کیخلاف تحقیقات کا معاوضہ ادا نہ کرنے کا الزام عائد کیا ہے۔ سپریم کورٹ کے جسٹس شیخ عظمت سعید نے پاناما جے آئی ٹی رپورٹ کے والیم دس کی فراہمی کے لیے دائر درخواست کی اپنے چیمبر میں سماعت کی۔ عدالت نے غیر ملکی کمپنی براڈشیٹ، ایل ایل سی کی درخواست پر رجسٹرار آفس کے اعتراضات ختم کرتے ہوئے سماعت کیلئے منظور کرلیا۔ عدالت نے حکم دیا کہ درخواست 20 جولائی کے بعد سماعت کے لیے مقرر کی جائے۔ غیر ملکی کمپنی نے جے آئی ٹی رپورٹ کے والیم دس کی فراہمی کے لیے درخواست دائر کی ہے۔  براڈشیٹ، ایل ایل سی نے بیرون ملک نیب کے خلاف واجبات کی ادائیگی کے لیے قانونی چارہ جوئی کر رکھی ہے۔ کمپنی نے اس سلسلے میں پاکستان میں جے آئی ٹی کا والیم دس فراہم کرنے کی درخواست دائر کی ہے۔ غیر ملکی کمپنی کا موقف ہے کہ اس نے نیب کو شریف خاندان کے غیر ملکی اثاثوں کی معلومات کے حوالے سے خدمات فراہم کیں، لیکن نیب نے اس کی خدمات کے لاکھوں ڈالر ادا نہیں کیے۔ نیب کی جانب سے واجبات ادا نہ کرنے پر کمپنی نے بیرون ملک عدالت سے رجوع کرلیا۔
image

پاکستان مسلم لیگ  ن  کے مرکزی رہنما حمز ہ شہباز نے کہا ہے کے قائد جمہوریت نواز شریف نے اپنے حصے کا کام کر دیا اب قوم اپنا فرض ادا کرے گی اور 25جولائی کو پوری قوم شیر پر مہر لگا کر اپنے پائوں میں پڑی زنجیریں ہمیشہ کےلئے توڑ ڈالے گی۔ مسلم لیگ ن  کے مرکزی سیکرٹریٹ ماڈل ٹائون میں اہم مشاورتی اجلاس ہوا جس میں سینئر سیاستدانوں، ٹکٹ ہولڈرز، خواتین ،سابق اراکین اور پارٹی کے متحرک کارکنوں نے شرکت کی ۔ اجلاس میں انتخابی مہم ،پولنگ کے روز ووٹروں کو گھروں سے باہر نکالنے ، پولنگ کیمپوں میں ڈیوٹیوں سمیت دیگر امور پر تبادلہ خیال کیا گیا ۔ حمزہ شہباز نے کہا کہ نواز شریف کے استقبال کے لئے ریلی میں شریک ہونے والوں کے شکر گزار ہیں ۔قائد جمہوریت نواز شریف نے اپنے حصے کا کام کردیا اب قوم اپنا فرض ادا کرے گی۔ قوم کے محسنوں کو سزا کی مذموم روایت ختم ہوکر رہے گی۔ حمزہ شہباز نے مزید کہا کہ نواز شریف پاکستان ، جمہوریت اور سیاست کی نئی قابل فخر تاریخ کا آغاز ہیں۔25 جولائی کو پوری قوم شیر پر مہر لگا کر اپنے پائوں میں پڑی زنجیریں ہمیشہ کےلئے توڑ ڈالے گی۔ اجلا س میںدہشت گردی کی نئی لہر پر اظہار تشویش کرتے ہوئے کہا کہ شہدائ کی روح کے ایصال ثواب ، محترمہ بیگم کلثوم نواز کی جلد صحتیابی اور قائدین کی صحت و سلامتی اور انتخابات2018 میں کامیابی کے لئے خصوصی دعا بھی کی گئی۔
image

چیئرمین سینیٹ محمد صادق سنجرانی کا اے این پی کے رہنما و سابق سینیٹر دائود خان اچکزئی  سے ٹیلی فون پر رابطہ ۔محمد صادق سنجرانی نے سینیٹر داؤد خان اچکزئی کی خیریت دریافت کرتے ہوئے ان کی جلد صحت یابی کی دعا کی ۔ محمد صادق سنجرانی نکوئٹہ میں فائرنگ کے واقعے کو قابل افسوس قرار دیتے ہوئے کہا کہ اس کی جتنی بھی مذمت کی جائے وہ کم ہے ، دہشت گرد اور امن دشمن قوتیں اپنے مذموم مقاصد میں کبھی کامیاب نہیں ہونگے ۔چیئرمین سینیٹ نے اس واقعہ کے ذمیداروں کا جلد تعین کرنے اور انہیں قانون کے کٹہرے میں لانے کی ہدایت کی  ۔ انہوں نے سابق سینیٹر کو بہترین طبی سہولیات فراہم کرنے کی بھی ہدایت کی،صادق سنجرانی نے داؤد اچکزئی کو اپنے بھر پور تعاون کی یقین دہانی کرائی ۔
image

 ملکی تاریخ میں پہلی مرتبہ الیکشن کمیشن نے امیدواروں کے انتخابی اخراجات کی جانچ پڑتال کا فیصلہ کرلیا، جیتنے اور ہارنے والے امیدواروں کو ہر صورت انتخابی اخراجات کی تفصیلات پیش کرنا ہوںگی، مقررہ حد سے زیادہ اخراجات پر امیدوار کیخلاف کارروائی ہوگی۔ الیکشن کمیشن امیدواروں کے انتخابی اخراجات کی تفصیلات ملنے کے 90 روز بعد پولیٹیکل فنانس ونگ اکائونٹس کی جانچ پڑتال کرے گا، الیکشن کمیشن کی جانب سے قومی اسمبلی کے امیدوار کیلئے اخراجات کی حد 40 لاکھ روپے جبکہ صوبائی اسمبلی کے امیدوار کیلئے انتخابی اخراجات کی حد 20 لاکھ روپے رکھی گئی ہے، حد سے زیادہ اخراجات کرنے والے امیدوارکیخلاف کرپٹ پریکٹس کے تحت کارروائی ہوگی۔ الیکشن کمیشن کے مطابق ایک ہزار روپے سے زائد کے خرچ پر رسید الیکشن کمیشن میں جمع کرانا ہوگی، الیکشن کیلئے کھلوائے گئے بینک اکائونٹ کے علاوہ کسی اور اکائونٹ سے اخراجات کی اجازت نہیں۔
image

عوامی سروے

سوال: الیکشن 2018 کیلئے کونسی جماعت آپکی فیورٹ؟